న్యూఢిల్లీ : ఆపరేషన్‌ సింధూర్‌ తర్వాత, పాకిస్తాన్ ప్రాయోజిత ఉగ్రవాదంపై భారత పోరాటానికి మద్దతు కోరుతూ మన ఎంపీలు 30 దేశాల పర్యటనకు వెళ్లిన విషయం తెలిసిందే. తాజాగా ఆయా దేశాలకు వెళ్లిన మన ఎంపీలు ఇటీవలే తిరిగొచ్చారు. జూన్ 10న ప్రధానమంత్రి నరేంద్ర మోడీ ఏడు బహుళ పార్టీ ప్రతినిధులకు స్వాగతం పలికారు.
ఈ దౌత్య పర్యటనలో భాగంగా అమెరికాకు ప్రతినిధి బృందానికి నాయకత్వం వహించిన శశి థరూర్, ఇతరులు ప్రధానమంత్రికి తమ పర్యటనల సారాన్ని వివరించారు. అయితే దాదాపు అదే సమయం వాషింగ్టన్ డిసిలో, యునైటెడ్ స్టేట్స్ సెంట్రల్ కమాండ్ కమాండర్ జనరల్ మైఖేల్ ఎరిక్ కురిల్లా, ఉగ్రవాదాన్ని ఎదుర్కోవడంలో అమెరికాకు పాకిస్తాన్‌ను “అద్భుత భాగస్వామి” అని పేర్కొంటూ ప్రశంసించారు.
ISIS-K ఉగ్రవాదులను వేటాడటంలో పాకిస్తాన్ సైన్యం పాత్రను ఆయన ప్రత్యేకంగా హైలైట్ చేశారు, అల్ ఖైదా చీఫ్ ఒసామా బిన్ లాడెన్ దాదాపు ఒక దశాబ్దం పాటు పాకిస్తాన్ మిలిటరీ అకాడమీ పరిసరాల్లో నివసించాడనే విషయాన్ని ఆయన మర్చిపోయారు. అమెరికా… భారతదేశం-పాకిస్తాన్ రెండింటితోనూ ఉగ్రవాద నిరోధక భాగస్వామ్యాలను కలిగి ఉండవచ్చని ఆయన అమెరికా కాంగ్రెస్ ప్యానెల్‌కు ఇచ్చిన వాంగ్మూలంలో సూచించారు.
కొన్ని నెలల క్రితం అధ్యక్షుడు డొనాల్డ్ ట్రంప్ కూడా పాకిస్తాన్‌ను అమెరికాకు ISIS-K కార్యకర్తను అప్పగించినందుకు బహిరంగంగా ప్రశంసించారు. ఏప్రిల్ 22న పహల్గామ్‌లో జరిగిన మారణహోమం భారతదేశం, పాకిస్తాన్ మధ్య ఉద్రిక్తతలను పెరిగాక, ట్రంప్ ప్రభుత్వం “బాధ్యతాయుతమైన పరిష్కారం” కోసం పిలుపునిచ్చింది. రెండు దేశాలు “కలిసి పనిచేయాలని” సూచించింది. భారతదేశంపై ఉగ్రవాద దాడులకు సహాయం చేసినందుకు వాషింగ్టన్ నుండి ఎవరూ పాకిస్తాన్‌ను నిందించలేదు.
ఏప్రిల్ 26న ట్రంప్ మాట్లాడుతూ… ఉగ్రవాదానికి మద్దతుదారుడు, బాధితుడిని ఒకే గాటన కట్టారు. భారతదేశం, పాకిస్తాన్‌లకు తాను చాలా దగ్గరగా ఉన్నానని, అవి “వేల సంవత్సరాలుగా” పోరాడుతున్న దేశాలు అని ఆయన అన్నారు. మే 10న రెండు దేశాల మధ్య జరిగిన కాల్పుల’విరమణ’కు ఆయన క్రెడిట్ తీసుకున్నారు. కాశ్మీర్ వివాదాన్ని పరిష్కరించడానికి సహాయం చేయడానికి ముందుకొచ్చారు. రెండు పొరుగు దేశాలతో వాణిజ్యాన్ని నిలిపివేస్తామని బెదిరించడం ద్వారా “అణు యుద్ధం” అంచు నుండి వారిని ఆపానని గొప్పలు చెప్పుకున్నారు. దీనిని న్యూఢిల్లీ పదేపదే తిరస్కరించినప్పటికీ ట్రంప్‌ను మాత్రం ఆపలేకపోయారు.
ఎక్కువగా చర్చల్లో ఉన్న మోడీ-ట్రంప్ మధ్య ఉన్న కెమిస్ట్రీ దృష్ట్యా, భారతదేశం, పాకిస్తాన్‌లను తిరిగి కలిపేందుకు 47వ అమెరికా అధ్యక్షుడు తీసుకున్న చర్య నిస్సందేహంగా న్యూఢిల్లీకి దౌత్యపరమైన ఎదురుదెబ్బ. అంతర్జాతీయ ద్రవ్య నిధి, ఆసియా అభివృద్ధి బ్యాంకు ఇస్లామాబాద్‌కు రుణాలు ఇవ్వకుండా ఆపడంలో కూడా నాయకత్వం విఫలమైంది.
ఏప్రిల్ 22న జమ్మూ కాశ్మీర్‌లో జరిగిన ఉగ్రవాద దాడి తర్వాత వాషింగ్టన్ నుండి వచ్చిన తటస్థ ప్రకటన, UN భద్రతా మండలిలో మారణహోమంపై చైనా చేసిన ప్రకటనను అణగదొక్కడానికి ట్రంప్ ప్రభుత్వం ఆసక్తి చూపకపోవడం వంటి చర్యలు ఫిబ్రవరి 13న మోడీ, ట్రంప్ మధ్య ప్రపంచంలోని ప్రతి మూల నుండి ఉగ్రవాద సురక్షిత స్థావరాలను నిర్మూలించడానికి ఏకాభిప్రాయంతో ఉన్నామన్న మాటలు ఖచ్చితంగా సరిపోలడం లేదు.
కనీసం రేపు మంగళవారం నాడు కెనడాలో జరిగే G7 ఔట్రీచ్ సెషన్‌లో పాల్గొనే ప్రధానమంత్రి, ఉగ్రవాదంపై ప్రపంచ పోరాటం “నా-ఉగ్రవాది-మీ-ఉగ్రవాది” అనే విభజన ద్వారా బలహీనపడకూడదని అమెరికా, మిగిలిన పాశ్చాత్య దేశాలకు సందేశం పంపాలి.
