హైదరాబాద్: తెలంగాణలో సెమీకండక్టర్ ప్రాజెక్టులకు ఆమోదం తెలపాలని కేంద్ర ఐటీ మంత్రికి సీఎం రేవంత్ రెడ్డి విజ్ఞప్తి చేశారు. ఈ మేరకు రాష్ట్ర మంత్రులు శ్రీధర్ బాబు, ఉత్తమ్ కుమార్ రెడ్డిలతో కలిసి సీఎం మంత్రి అశ్విని వైష్ణవ్‌తో భేటీ అయ్యారు. అలాగే కొత్త రైల్వే లైన్లు మంజూరు చేయాలని కోరారు.
తెలంగాణలో ప్రపంచ స్థాయి పరిశోధనలు, అభివృద్ధి కేంద్రాలు ఉన్నాయి. వీటిని పరిగణనలోకి తీసుకుని అడ్వాన్స్‌డ్‌ సిస్టమ్‌ ఇన్‌ ప్యాకేజ్‌ టెక్నాలజీస్‌ (ఏఎస్‌ఐపీ) ప్రాజెక్టు, మైక్రో ఎల్‌ఈడీ డిస్‌ప్లే ఫ్యాబ్‌ ప్రాజెక్టు, క్రిస్టల్‌ మ్యాట్రిక్స్‌కు ఆమోదం తెలపండని సీఎం కేంద్రమంత్రిని కోరారు.
“ఈ సమావేశంలో, EMC 2.0 పథకం కింద రంగారెడ్డి జిల్లా ముచ్చెర్లలో హైటెక్ ఎలక్ట్రానిక్స్ పార్క్ ఏర్పాటు చేయాలన్న కేంద్ర మంత్రి తెలంగాణ అభ్యర్థనను సీఎం దృష్టికి తీసుకువచ్చారు. రీజినల్ రింగ్ రోడ్ (RRR) సమీపంలో కొత్త ఎలక్ట్రానిక్ తయారీ పార్క్‌ను ఏర్పాటు చేయాలని అశ్విని వైష్ణవ్‌ను సీఎం కోరారు. దీనికి కేంద్ర మంత్రి సానుకూలంగా స్పందించారని” రేవంత్ రెడ్డి కార్యాలయం నుండి ఒక పత్రికా ప్రకటన తెలిపింది.
హైదరాబాద్ నుండి మచిలీపట్నం పోర్టుకు రైల్వే లైన్
హైదరాబాద్‌ను ఏపీలోని మచిలీపట్నం (బందర్) పోర్టుకు అనుసంధానించే రైల్వే లైన్‌ను మంజూరు చేయాలనే డిమాండ్‌ను రేవంత్ రెడ్డి ముందుకు తెచ్చారు. తద్వారా మందులు, ఎలక్ట్రానిక్ పరికరాలు, ఆహార ప్రాసెసింగ్ ఉత్పత్తుల ఎగుమతికి సహాయపడుతుందని సీఎం రేవంత్‌రెడ్డి కేంద్ర మంత్రికి చెప్పారు.
తెలంగాణలో రైల్వే కనెక్టివిటీని పెంచడానికి కొత్త ప్రాజెక్టులకు అనుమతి కోరుతూ, హైదరాబాద్ రీజినల్ రింగ్ రోడ్‌కు సమాంతరంగా రీజినల్ రింగ్ రైల్ ప్రాజెక్టును ప్రతిపాదించినట్లు తెలంగాణ ముఖ్యమంత్రి తెలిపారు. రైల్వే బోర్డు ఇప్పటికే తుది స్థాన సర్వేకు అనుమతి ఇచ్చినందున రూ.8000 కోట్ల RRR ప్రాజెక్టుకు రేవంత్ రెడ్డి అనుమతులు కోరినట్లు తెలిసింది.
“తెలంగాణలోని వెనుకబడిన ప్రాంతాల అభివృద్ధికి, ప్రధానంగా పారిశ్రామిక, వ్యవసాయ ఎగుమతులు, దిగుమతులకు సంబంధించిన వివిధ ప్రాంతాల అనుసంధానం కోసం కొత్త రైల్వే లైన్లను మంజూరు చేయాలని ముఖ్యమంత్రి రైల్వే మంత్రిని కోరారు.
దీనిలో భాగంగా, వికారాబాద్-కృష్ణా (122 కి.మీ- అంచనా వ్యయం రూ. 2,677 కోట్లు, కల్వకుర్తి-మాచెర్ల (100 కి.మీ- అంచనా వ్యయం రూ. 2,000 కోట్లు, డోర్నకల్-గద్వాల (296 కి.మీ- అంచనా వ్యయం రూ. 6,512 కోట్లు), డోర్నకల్-మిర్యాలగూడ (97 కి.మీ- అంచనా వ్యయం రూ. 2,184 కోట్లు) మార్గాలను మంజూరు చేయాలని, కొత్త ప్రాజెక్టుల మొత్తం ఖర్చును రైల్వేలే భరించాలని ముఖ్యమంత్రి కేంద్ర మంత్రిని కోరారు”.
