హైదరాబాద్: హైదరాబాద్ సహా రాష్ట్రంలోని మిగతా చోట్ల భారీ వర్షాల నేపథ్యంలో, ముఖ్యమంత్రి రేవంత్ రెడ్డి అధికారులు అప్రమత్తంగా ఉండాలని, ముందస్తు చర్యలు తీసుకోవాలని ఆదేశించారు. వరద ప్రభావిత ప్రాంతాల్లో రక్షణ, సహాయ చర్యల సమయంలో GHMC, HMDA, హైదరాబాద్ మెట్రోపాలిటన్ నీటి సరఫరా, మురుగునీటి బోర్డు, విద్యుత్‌, పోలీసు విభాగాలు సమన్వయంతో పనిచేయాలని ముఖ్యమంత్రి కోరారు.
హైదరాబాద్‌లో భారీ వర్షాలతో లోతట్టు ప్రాంతాలు మునిగిపోయాయి. ఈ నేపథ్యంలో రాష్ట్ర విపత్తు ప్రతిస్పందన దళం (SDRF), జాతీయ విపత్తు ప్రతిస్పందన దళం (NDRF), HYDRAA బృందాలు, ఇతర సంబంధిత విభాగ అధికారులను కూడా అప్రమత్తంగా ఉండాలని సీఎం ఆదేశించారు. వర్ష ప్రభావిత ప్రాంతాల నుండి వచ్చిన ప్రజల ఫిర్యాదులపై వెంటనే స్పందించాలని, ఆలస్యం లేకుండా అవసరమైన చర్యలు ప్రారంభించాలని ఆయన ప్రత్యేకంగా అధికారులకు సూచించారు. భారీ వర్షం వల్ల తలెత్తే ఏవైనా సమస్యలకు సత్వర ఉపశమనం అందించడమే ఈ ఆదేశం లక్ష్యం.
హైదరాబాద్‌లోని పలు ప్రాంతాల్లో కురిసిన వర్షానికి రోడ్లన్నీ జలమయమయ్యాయి. ఉప్పల్ – హబ్సిగూడ, మియాపూర్ – గచ్చిబౌలి మార్గాల్లో, వివిధ కూడళ్లలో నీరు నిలిచిపోవడంతో వాహనదారులు తీవ్ర ఇబ్బందులు ఎదుర్కొన్నారు. గచ్చిబౌలి బయోడైవర్సిటీ నుంచి ఐకియా మార్గంలో ట్రాఫిక్ జామ్ ఏర్పడింది. వర్షం ధాటికి రసూల్‌పురాలోని ఓ కార్ల షోరూమ్‌లోకి 4 అడుగుల మేర వరద చేరింది. దీంతో అందులో పనిచేస్తున్న సుమారు 30 మంది ఉద్యోగులను హైడ్రా రక్షించింది. భారీ వర్షంతో హుస్సేన్‌సాగర్ పూర్తిగా నిండింది. నగరంలోని పలు నాలాల నుంచి పోటెత్తిన వరదతో ఏ క్షణంలోనైనా గేట్లు ఎత్తనున్నారు.
మొత్తంగా దక్షిణ కోస్తా, పరిసర ప్రాంతాల్లో ఏర్పడిన ఉపరితల చక్రవాత ఆవర్తనం, తూర్పు పశ్చిమ ద్రోణి ప్రభావంతో ఈ నెల 23 వరకు తెలుగు రాష్ట్రాల్లో భారీ వర్షాలు కురువనున్నట్టు హైదరాబాద్ వాతావరణ కేంద్రం పేర్కొంది. గడిచిన 24 గంటల్లో అత్యధికంగా మహబూబ్‌నగర్‌ జిల్లా బాలానగర్‌లో 10.08సెం.మీటర్ల వర్షపాతం నమోదైంది.
