హైదరాబాద్‌: నగరంలోని కొండాపూర్‌లో జరిగిన రేవ్ పార్టీని తెలంగాణ ఈగల్‌ టీమ్‌, నగర పోలీసులు భగ్నం చేశారు. ముగ్గురు వ్యాపారవేత్తలు, ఒక గృహిణి, ఒక సాఫ్ట్‌వేర్ ఇంజనీర్, ఒక ఇంజనీరింగ్ విద్యార్థితో సహా ఆరుగురు వ్యక్తులను అరెస్టు చేశారు.
సైబరాబాద్ పోలీసులు, ప్రత్యేక మాదకద్రవ్యాల నిరోధక బృందంతో కలిసి సోమవారం కొండాపూర్‌లోని రాజేశ్వరి నిలయం సర్వీస్ అపార్ట్‌మెంట్‌పై దాడి చేసి, 20 గ్రాముల కొకైన్, 8 ఎక్స్‌టసీ మాత్రలు (20 గ్రాములు),3 గ్రాముల MDMAతో సహా గణనీయమైన మొత్తంలో అక్రమ మాదకద్రవ్యాలను స్వాధీనం చేసుకున్నారు. ఈ మేరకు ఇద్దరు పెడ్లర్లు, ఒక ట్రాన్స్‌పోర్టర్, ముగ్గురు వినియోగదారులను అరెస్టు చేసినట్టు మాదాపూర్ DCP G. వినీత్ ధృవీకరించారు.
క్లౌడ్ కిచెన్ వ్యాపార యజమాని తేజగా గుర్తించిన 28 ఏళ్ల వ్యక్తి ఈ సంఘటనకు ప్రధాన సూత్రధారి అని చెబుతున్నారు. పౌల్ట్రీ ఫామ్ వ్యాపారి విక్రమ్ పెడ్లర్ అని చెబుతున్నారు.
41 ఏళ్ల గృహిణి నీలిమను వినియోగదారుడిగా గుర్తించారు. వైన్ షాపు యజమాని అయిన 36 ఏళ్ల ప్రశాంత్ రెడ్డి, సాఫ్ట్‌వేర్ ఇంజనీర్ అయిన 31 ఏళ్ల భార్గవ్‌లను కూడా వినియోగదారులుగా గుర్తించారు. పోలీసులు తెలిపిన వివరాల ప్రకారం, ఇంజనీరింగ్ విద్యార్థి అయిన 20 ఏళ్ల చందన్ ట్రాన్స్‌పోర్టర్‌గా వ్యవహరించాడు.
బెంగళూరుకు చెందిన రాహుల్ అలియాస్ సోనుగా గుర్తించిన కీలక సరఫరాదారు ప్రస్తుతం పరారీలో ఉన్నాడు. అతని కోసం వేట కొనసాగుతోంది.
ప్రధాన సూత్రధారి తేజ బెంగళూరులోని రాహుల్ నుండి కొకైన్ సేకరించడానికి బాధ్యత వహించాడని డిసిపి వినీత్ తెలిపారు. ఆ తర్వాత సర్వీస్ అపార్ట్‌మెంట్‌లు, ఫామ్‌హౌస్‌లలో తరచుగా నిర్వహించే పార్టీలలో డ్రగ్స్ పంపిణీ చేసారు.
“వారు రాహుల్ నుండి డ్రగ్స్ కొనుగోలు చేస్తున్నారు, రాజమండ్రి, గోవా నుండి తీసుకువస్తున్నారు. హైదరాబాద్‌లో రేవ్ పార్టీలు నిర్వహిస్తున్నారు. తేజ గోవాలో నూతన సంవత్సర పార్టీని కూడా నిర్వహించారు” అని ఆయన అన్నారు.
దర్యాప్తులో మాదకద్రవ్యాల అక్రమ రవాణాకు సంబంధించిన ఒక కొత్త రకమైన పద్ధతి కూడా బయటపడింది, రాజమండ్రిలోని DTDC కొరియర్ సర్వీస్ ద్వారా తేజ “స్కిన్ కేర్ ఇంజెక్షన్లు” (గ్లూటాథియోన్) రూపంలో కొకైన్‌ను అందుకున్నట్లు ఆరోపణలు ఉన్నాయి.
అరెస్టు చేసిన వ్యక్తులపై నిర్వహించిన మాదకద్రవ్య పరీక్షల్లో నీలిమా మూడు రకాల మాదకద్రవ్యాలకు పాజిటివ్‌గా తేలగా, తేజ ఐదు రకాల డ్రగ్స్ సేవించినట్టు పాజిటివ్‌గా తేలింది. మిగతా ఇద్దరు వినియోగదారులు కూడా రెగ్యులర్‌ వినియోగదారులుగా తేలింది. అయితే, రవాణాదారు చందన్‌కు పరీక్షలో నెగటివ్‌గా వచ్చింది.
నగరంలో పెరుగుతున్న మాదకద్రవ్యాల దుర్వినియోగం, అక్రమ పార్టీల ధోరణిని అరికట్టడానికి తెలంగాణ పోలీసులు చేస్తున్న ప్రయత్నంలో ఈ అరెస్టు ఒక భాగమని తెలుస్తోంది.
