నాగార్జునసాగర్‌: ఆరుగాలం కష్టించే రైతుకు యూరియా కోసం ఎదురీదక తప్పడం లేదు. నాగార్జున సాగర్‌ నియోజకవర్గంలో నిన్న యూరియా పంపిణీ చేస్తారనే వార్త తెలియగానే ఆదివారం రాత్రి వందలాది మంది రైతులు తిరుమలగిరి సబ్ మార్కెట్ యార్డ్ వద్ద గుమిగూడారు. గత పది రోజులుగా పంపిణీ జరగకపోవడంతో, రైతులు రాత్రిపూట యార్డ్‌లో ఆశగా బస చేశారు. మరోవంక అర్ధరాత్రి ఆ ప్రాంతంలో భారీ వర్షం కురిసింది. దీంతో కొంతమంది రైతులు సమీపంలోని పోలీస్ స్టేషన్ లోపల ఆశ్రయం పొందారు. మరికొందరు బయట చెట్ల కింద రాత్రంతా వేచి ఉన్నారు.
అయితే దిగ్బ్రాంతికరమైన విషయమేమిటంటే సోమవారం, కేవలం 440 బస్తాల యూరియా మాత్రమే వచ్చింది, ప్రతి రైతుకు ఒక బ్యాగ్ మాత్రమే కేటాయించారు. అయినప్పటికీ, పరిమిత సరఫరా అధిక డిమాండ్‌ను తీర్చలేక పోవడంతో చాలా మంది రైతులు నిరాశతో ఇంటికి తిరిగి రావలసి వచ్చింది.
వాస్తంగా నల్గొండ జిల్లా తిరుమలగిరి మండలంలోని రైతులు యూరియా పొందడంలో నిరంతరం ఇబ్బందులను ఎదుర్కొంటున్నారు. మండలానికి ప్రత్యేక ప్రాథమిక వ్యవసాయ సహకార సంఘం (PACS) లేకపోవడంతో అనుముల మండల కేంద్రంపై ఆధారపడటం కొనసాగుతుండటం ఆందోళనకరమైన విషయం. ప్రారంభంలో, ఈ ప్రాంత రైతులు హాలియాలోని కొత్తపల్లి సహకార సంఘం నుండి యూరియాను సేకరించాలని ఆదేశించారు. ఇక్కడనుంచి మరొక మండల రైతులకు కూడా సేవలు అందుకుంటున్నారు. ఫలితంగా, రెండు మండలాల రైతులు ఒకే కేంద్రంలో గుమిగూడుతున్నారు. దీంతో ఇది గందరగోళం మరియు తీవ్ర అసౌకర్యానికి దారితీసింది.
మొత్తంగా రాష్ట్రంలో కర్షకులకు యూరియా కష్టాలు కన్నీళ్లు తెప్పిస్తున్నాయి. వానాకాలం సీజన్‌లో పంటల సాగును పండుగలా సాగిద్దామనుకున్న వారికి తీవ్ర నిరాశే ఎదురవుతోంది. పంట కాలానికి సరిపడా యూరియా అందుబాటులో లేకపోవడంతో రైతుకు కావాల్సినన్ని యూరియా సంచులు అందకపోవడంపై సర్వత్రా ఆందోళన వ్యక్తం అవుతోంది.
