టెహ్రాన్: యుద్ధాన్ని ముగించడానికి ఎలాంటి రహస్య చర్చలు జరగవని ఇరాన్ విదేశాంగ మంత్రి సయ్యద్ అబ్బాస్ అరాఘ్చి తోసిపుచ్చారు. ఈమేరకు మధ్యప్రాఛ్యంలో అమెరికా రాయబారి విట్కాఫ్తో నా చివరి సంభాషణ, ఇరాన్పై మరో చట్టవిరుద్ధమైన సైనిక దాడితో దౌత్యాన్ని ముగించకూడదని ఆయన బాస్ నిర్ణయించుకున్నప్పుడు జరిగింది. దీనికి విరుద్ధంగా వచ్చే ఏ వాదనలైనా కేవలం చమురు వ్యాపారులను, సాధారణ ప్రజలను తప్పుదోవ పట్టించడానికి ఉద్దేశించినవిగా కనిపిస్తున్నాయని ఇరాన్ విదేశాంగమంత్రి అన్నారు.
అంతకుముందు, ఇరాన్ అధ్యక్షుడు మసూద్ పెజెష్కియన్ ఫ్రెంచ్ అధ్యక్షుడితో, “భవిష్యత్తులో మా భూభాగంపై మరిన్ని దాడులు జరగవని మేము నిర్ధారించుకోగలిగే వరకు యుద్ధాన్ని ముగించడం గురించి మాట్లాడటం అర్థరహితం” అని అన్నారు.
అరఘ్చి ఇంతకుముందు అమెరికా మీడియా ఛానల్ సీబీఎస్తో మాట్లాడుతూ, “ఇరాన్ కాల్పుల విరమణను గానీ, చర్చలను గానీ కోరలేదు. అటువంటి వాదనలు భ్రమలతో కూడుకున్నవి. అమెరికన్లు, ఇరానియన్లపై ఆయన రుద్దుతున్న ఈ చట్టవిరుద్ధమైన యుద్ధం తప్పని, అది మళ్లీ పునరావృతం కాకూడదని అమెరికా అధ్యక్షుడు గ్రహించే వరకు మా సాయుధ దళాలు కాల్పులు కొనసాగిస్తాయి… బాధితులకు కూడా నష్టపరిహారం చెల్లించాలి… మేం బేషరతుగా లొంగిపోవడం కోసమే అమెరికా ఈ యుద్ధాన్ని ప్రారంభించింది, ఇప్పుడు హర్ముజ్ జలసంధిని తెరవమని ఇతర దేశాలను వేడుకుంటోంది” అని అన్నారు.
అధ్యక్షుడు ట్రంప్, అమెరికా అధికారులు, ఇరాన్ అధికారులు ఒక ఒప్పందం కోసం ప్రయత్నిస్తున్నారని వాదిస్తున్నప్పటికీ, టెహ్రాన్ నుండి బహిరంగ స్పందన యుద్ధాన్ని ముగించాలన్న అమెరికా ఆశలపై నీళ్లు చల్లేలా ఉంది.
ఈమేరకు ఇరాన్ పార్లమెంట్ స్పీకర్ మొహమ్మద్ బఘేర్ ఘాలిబాఫ్ ట్రంప్ను ఎగతాళి చేసారు. “గత రెండు వారాల్లో మమ్మల్ని తొమ్మిది సార్లు ‘ఓడించానని’ ఆయన చెప్పుకోవడం హాస్యాస్పదం!” అని అన్నారు. చర్చల కోసం విట్కాఫ్ చేస్తున్న వ్యక్తిగత అభ్యర్థనలను తాము పట్టించుకోవడం లేదని ఇరాన్ అధికారులు చెబుతున్నట్లు సమాచారం. మధ్యప్రాచ్యానికి ట్రంప్ ప్రత్యేక రాయబారి, చర్చలు ప్రారంభించాలని ఇరాన్ విదేశాంగ మంత్రికి సందేశాలు పంపుతున్నారని వారు అంటున్నారు.
తాము దీర్ఘకాలిక నిరోధక శక్తిని నెలకొల్పామని ఇరాన్ విశ్వసించినప్పుడు మాత్రమే యుద్ధం ముగుస్తుందని టెహ్రాన్ చెబుతోంది. తాము నమ్మదగనిదిగా భావించే అమెరికాతో చర్చలు జరపడం ప్రతికూల ఫలితాలనిస్తుందని ఇరాన్ నాయకులు కూడా పేర్కొన్నారు. ఇజ్రాయెల్, అమెరికాలు ఇరాన్పై దాడి చేసినప్పుడు, గత ఏడాది, ఈ ఏడాది కూడా తాము విట్కాఫ్, ట్రంప్ అల్లుడు జారెడ్ కుష్నర్లతో చర్చలు జరిపామని టెహ్రాన్ గుర్తుచేస్తోంది.
చర్చలు ప్రారంభించడానికి ముందు ముందస్తు షరతులుగా, 30 రోజుల్లోగా మధ్యప్రాచ్యం నుండి అమెరికా సైనిక బలగాలన్నింటినీ పూర్తిగా ఉపసంహరించుకోవాలని, ఇరాన్పై విధించిన అన్ని ఆంక్షలను తక్షణమే ఎత్తివేయాలని, యుద్ధం వల్ల కలిగిన నష్టాలకు పరిహారం చెల్లించాలని, 500 బిలియన్ డాలర్ల నష్టపరిహారం చెల్లించాలని ఇరాన్ అధికారులు పిలుపునిచ్చారు. ఈ షరతులను పాటించడానికి గడువు 10 ఏప్రిల్ 2026 అని కొన్ని నివేదికలు పేర్కొన్నాయి. ఈ షరతులు నెరవేర్చకపోతే, హర్ముజ్ జలసంధిని మూసివేస్తామని, అణ్వాయుధాల అభివృద్ధి, మోహరింపును చేపడతామని, అలాగే ఇరాన్ భూభాగంలో చైనా, రష్యాలను సైనిక స్థావరాలు ఏర్పాటు చేసుకోవడానికి అనుమతిస్తామని ఇరాన్ హెచ్చరించింది.
అరాఘ్చి గల్ఫ్ దేశాలకు కూడా ఒక సందేశం ఇచ్చారు. “అమెరికా బలగాలకు ఆశ్రయం కల్పిస్తూ, ఇరాన్పై దాడులను అనుమతిస్తున్న కొన్ని పొరుగు దేశాలు, ఇజ్రాయెల్, అమెరికా చేత ఇరానీయుల ఊచకోతను కూడా చురుకుగా ప్రోత్సహిస్తున్నాయని నివేదికలు పేర్కొంటున్నాయి. వారి వైఖరులపై తక్షణమే స్పష్టత ఇవ్వాలి.” సుప్రీం నేషనల్ సెక్యూరిటీ కౌన్సిల్ కార్యదర్శి అలీ లారిజాని, ‘ప్రపంచ ముస్లింలకు’, ‘ఇస్లామిక్ ప్రభుత్వాలకు’ ఉద్దేశించిన ఒక లేఖను అనుసరించి X పై ఈ పోస్ట్ వెలువడింది. ఈ లేఖలోని విషయాలను భారతదేశంలోని ఇరాన్ రాయబార కార్యాలయం పంచుకుంది.
“…కొన్ని అరుదైన సందర్భాలు, అదీ కూడా కేవలం రాజకీయ స్థాయిలో తప్ప, ఏ ఇస్లామిక్ ప్రభుత్వం కూడా ఇరాన్ జాతికి సహాయం చేయడానికి ముందుకు రాలేదనే విషయం మీకు తెలిసే ఉంటుంది. అయినప్పటికీ, ఇరాన్ ప్రజలు దృఢ సంకల్పంతో దుష్ట శత్రువును అణచివేశారు, ఈ వ్యూహాత్మక ప్రతిష్టంభన నుండి ఎలా తప్పించుకోవాలో ఈ రోజు ఆ శత్రువుకు తెలియని విధంగా… ఇరాన్, పెద్ద,చిన్న సైతానులకు (అమెరికా, ఇజ్రాయెల్) వ్యతిరేకంగా తన ప్రతిఘటన మార్గంలో కొనసాగుతుందని ఆయన అన్నారు.
“…ఇస్లామిక్ ప్రభుత్వాల ప్రవర్తన, ప్రవక్త (సల్లల్లాహు అలైహి వసల్లం) చెప్పిన ఈ మాటకు విరుద్ధంగా లేదా: “ఒక ముస్లిం ఆక్రందనకు మీరు స్పందించకపోతే, మీరు ముస్లిం కాదు.” ఇది ఎలాంటి ఇస్లాం?… కొన్ని దేశాలు ఇంకా ముందుకు వెళ్లి, ఇరాన్ ఆ దేశాల్లోని అమెరికన్ స్థావరాలను, అమెరికా, ఇజ్రాయెల్ ప్రయోజనాలను లక్ష్యంగా చేసుకున్నందున, ఇరాన్ తమ శత్రువుగా మారిందని ప్రకటించాయి. మీ దేశాల్లోని అమెరికన్ స్థావరాల నుండి ఇరాన్పై దాడులు జరుగుతుంటే, అది చూస్తూ ఊరుకోవాలా?” అని ఆ లేఖలో పేర్కొన్నారు.
“అమెరికా మీ పట్ల ఎటువంటి విధేయతనూ చూపదని, అలాగే ఇజ్రాయెల్ మీ శత్రువని మీకు బాగా తెలుసు. ఒక్క క్షణం మీ గురించి, ఈ ప్రాంత భవిష్యత్తు గురించి ఆలోచించండి. ఇరాన్ మీ శ్రేయస్సునే కోరుకుంటుంది తప్ప, మీపై ఆధిపత్యం వహించాలనే ఉద్దేశం దానికి ఏమాత్రం లేదు అని ఆ సందేశంలో ఇరాన్ పేర్కొంది.”
