వాషింగ్టన్: ఇరాన్ నాగరికతను తుడిచిపెట్టేస్తామంటూ హెచ్చరించిన అగ్రరాజ్యాధిపతి చివరకు యూటర్న్ తీసుకున్నారు. బాంబు దాడులు ప్రారంభించడానికి గంట పైగా ముందు, అమెరికా అధ్యక్షుడు డొనాల్డ్ ట్రంప్ ఆకస్మికంగా రెండు వారాల పాటు దానిని నిలిపివేస్తున్నట్లు ప్రకటించారు. ఇరాన్ యొక్క 10-సూత్రాల శాంతి ప్రతిపాదన “ఆచరణీయం” అని ఆయన పేర్కొన్నారు.
హర్మూజ్ జలసంధిని తెరవాలనే షరతుకు లోబడి రెండు వారాల గడువు ఇచ్చేందుకు, కాల్పుల విరమణకు అంగీకరించానని ట్రంప్ అన్నారు. ఇరుదేశాల వైపు నుంచి ఈ కాల్పుల విరమణ ఉంటుంది. ఇరాన్ పది సూత్రాలతో ఒక ప్రతిపాదనను పంపించింది. అవన్నీ సానుకూలంగానే ఉన్నాయి. దీంతో చర్చలు కీలక దశకు చేరుకున్నాయి. ఇరాన్తో శాశ్వత శాంతి ఒప్పందానికి, పశ్చిమాసియాలో శాంతిని నెలకొల్పడానికి ఈ రెండు వారాల గడువు ఉపయోగపడుతుంది. ఈ దీర్ఘకాలిక సమస్య పరిష్కారానికి చేరువవ్వడం గౌరవంగా భావిస్తున్నా” అని ట్రంప్ పేర్కొన్నారు.
కాగా, ఇరాన్ ప్రతిపాదనను ట్రంప్ అంగీకరించడాన్ని ఇరాన్ స్వాగతించింది. ఒకవేళ ఇరాన్పై దాడులు నిలిపివేస్తే, టెహ్రాన్ కూడా తన “రక్షణాత్మక కార్యకలాపాలను” నిలిపివేసి, రెండు వారాల పాటు హర్ముజ్ జలసంధి గుండా నౌకాయానానికి సురక్షిత మార్గాన్ని కల్పిస్తుందని, ఈ సమయంలో తన వద్ద ఉన్న 15-సూత్రాల ప్రతిపాదనతో అమెరికాతో చర్చలు జరుపుతుందని తెలిపింది.
మరోవైపు, ఇరాన్పై రెండు వారాల పాటు దాడులను నిలిపివేసే ట్రంప్ నిర్ణయానికి తాము మద్దతు ఇస్తున్నామని, అయితే లెబనాన్లోని హిజ్బుల్లాతో జరుగుతున్న యుద్ధం ఇందులో చేరదని ఇజ్రాయెల్ ప్రధానమంత్రి బెంజమిన్ నెతన్యాహు కార్యాలయం తెలిపింది.
ఇరాన్ 10-సూత్రాల ప్రతిపాదనలోని అంశాలు:
-తాత్కాలిక కాల్పుల విరమణ కాకుండా, యుద్ధానికి శాశ్వత ముగింపు
-ఇరాన్పై మళ్లీ దాడులు జరగవని హామీ
-లెబనాన్లోని హిజ్బుల్లాపై ఇజ్రాయెల్ దాడులకు ముగింపు
-ఇరాన్పై మాత్రమే కాకుండా, ఇరాన్ చేసే అన్ని ప్రాంతీయ దాడులను కూడా నిలిపివేయడం
-ఇరాన్పై ఉన్న అన్ని అమెరికా మరియు అంతర్జాతీయ ఆంక్షలను పూర్తిగా ఎత్తివేయడం
దీనికి ప్రతిగా, ఇరాన్ తన దిగ్బంధనాన్ని ఎత్తివేసి, హర్ముజ్ జలసంధిని తిరిగి తెరుస్తుంది
-హర్ముజ్ జలసంధి గుండా సురక్షిత ప్రయాణం కోసం ఒక ప్రోటోకాల్
-ఇరాన్ ప్రతి ఓడపై సుమారు $2 మిలియన్ల రవాణా రుసుమును విధిస్తుంది
-ఈ రుసుమును ఒమన్తో పంచుకుంటుంది
-అమెరికా – ఇజ్రాయెల్ ధ్వంసం చేసిన మౌలిక సదుపాయాల పునర్నిర్మాణం
ఇరాన్ తన 10-సూత్రాల కాల్పుల విరమణ ప్రణాళిక ఫార్సీ భాషా రూపంలో, తన అణు కార్యక్రమానికి సంబంధించి “సుసంపన్నీకరణను అంగీకరించడం” అనే పదబంధాన్ని చేర్చింది. అయితే, ఇరాన్ దౌత్యవేత్తలు పాత్రికేయులతో పంచుకున్న ఆంగ్ల రూపాలలో ఇది లేదు. ఇరాన్ అణు కార్యక్రమాన్ని పూర్తిగా అంతం చేయడమే యుద్ధంలో ఒక కీలక అంశమని ట్రంప్ చెప్పారు.
ఇదిలా ఉండగా…ఇరాన్ జాతీయ భద్రతా మండలి అయిన సుప్రీం కౌన్సిల్ ఫర్ నేషనల్ సెక్యూరిటీ, ఇరాన్ విదేశాంగ మంత్రి మితమైన వైఖరికి పూర్తి భిన్నమైన ధోరణిలో ఒక ప్రకటనలో విజయం సాధించినట్లు ప్రకటించింది. “ఇరాన్ దేశంపై తన అన్యాయమైన, చట్టవిరుద్ధమైన నేరపూరిత యుద్ధంలో శత్రువు కాదనలేని, చారిత్రాత్మకమైన మరియు ఘోరమైన ఓటమిని చవిచూసింది,” అని అది రాసింది.
“తమ 10-సూత్రాల ప్రణాళికకు అనుగుణంగా అన్ని వివరాలు ఖరారైన తర్వాతే” ఇరాన్ యుద్ధ ముగింపును అంగీకరిస్తుందని, ఇది యుద్ధం ముగిసినట్లు కాదని కౌన్సిల్ రాసింది. “అమెరికా పక్షంపై పూర్తి అవిశ్వాసంతో” శుక్రవారం ఇస్లామాబాద్లో చర్చలు ప్రారంభమవుతాయని, అయితే పరస్పర అంగీకారంతో ఈ రెండు వారాల కాలాన్ని పొడిగించవచ్చని అది పేర్కొంది.
“మా చేతులు ట్రిగ్గర్పై ఉన్నాయి, శత్రువు చేసే చిన్న పొరపాటుకు కూడా పూర్తి బలంతో ప్రతిస్పందిస్తాము,” అని కౌన్సిల్ జోడించింది.
మొత్తంగా ఇరాన్ స్థిరత్వం ముందు అమెరికా అహంకారం, గర్వం కూలిపోవడం మొదలైంది. నాగరికతను నిర్మూలిస్తామని మాట్లాడిన వ్యక్తి అకస్మాత్తుగా, ఆయనే స్వయంగా వచ్చి, ఇరాన్ ప్రతిపాదించిన పది సూత్రాలు ఆచరణ సాధ్యమైనవని చెప్పారు. ఇప్పుడు పరిస్థితులు మారబోతున్నాయని అరబ్ పాలకులు గ్రహించాలి. తమ భూభాగాల నుండి అమెరికా స్థావరాలను తరిమికొట్టడానికి ఇతరులకు ఇది ఒక మంచి అవకాశం. విలాసాలను వదిలిపెట్టి, తమ సొంత భద్రత కోసం కొన్ని ఏర్పాట్లు చేసుకోవాలి. భద్రత కోసం ఇతరుల ముందు మూటను మోస్తూ ఇంకెంతకాలం ఉంటారు? ఏది ఏమైనప్పటికీ, స్థిరత్వమే విజయానికి కీలకం అని, త్యాగాలు లేకుండా ఏదీ సాధించలేమని ఇరాన్ నిరూపించింది.
