Recent News

Copyright © 2024 Blaze themes. All Right Reserved.

2035 నాటికి ప్రపంచంలోనే అతిపెద్ద మతంగా ఇస్లాం!

Share It:

ముహమ్మద్ ముజాహిద్…✍️

క్రైస్తవ మతాన్ని అధిగమించనున్న ముస్లిం జనాభా..

ప్యూ రీసెర్చ్ తాజా అధ్యయనంలో ఆసక్తికర అంశాలు

జనాభా పెరుగుదలలో ముస్లింలదే వేగం..

అధిక జననాల రేటు ప్రధాన కారణం

ప్రపంచ చరిత్రలో మతాల ప్రస్థానం ఎన్నో మలుపులు తిరిగింది. కాలానుగుణంగా మతాల ప్రభావం, వాటిని అనుసరించే ప్రజల సంఖ్యలో మార్పులు చోటుచేసుకుంటూనే ఉన్నాయి. ఒకప్పుడు ఒక ప్రాంతానికే పరిమితమైన మతం.. నేడు ప్రపంచంలోని అనేక దేశాల్లో కోట్లాది ప్రజల జీవన విధానంలో భాగమైంది. ఈ క్రమంలో ఇస్లాం మతానికి సంబంధించి వెలువడిన తాజా అధ్యయనం ప్రపంచవ్యాప్తంగా ఆసక్తిని రేకెత్తిస్తోంది.

2035 నాటికి క్రైస్తవ మతాన్ని అధిగమించి ఇస్లాం ప్రపంచంలోనే అత్యధిక జనాభా కలిగిన మతంగా అవతరించనుందని ప్యూ రీసెర్చ్ సెంటర్ అంచనా వేసింది. నవంబర్ 18న అల్ జజీరా ప్రచురించిన కథనం ప్రకారం, 2020 నుంచి 2070 వరకు ప్రపంచ మతాల జనాభా ధోరణులను విశ్లేషించిన ప్యూ రీసెర్చ్ ఈ అంచనాలను వెల్లడించింది.

201 దేశాలపై అధ్యయనం…ప్రపంచవ్యాప్తంగా మతపరమైన జనాభాలో వస్తున్న మార్పులను అర్థం చేసుకునేందుకు ప్యూ రీసెర్చ్ సంస్థ విస్తృత పరిశోధన చేపట్టింది. ఇందులో 201 దేశాలు, ప్రాంతాలను పరిశీలించింది. ప్రపంచ జనాభాలో 99.98 శాతానికి ప్రాతినిధ్యం వహించే ఈ అధ్యయనంలో ముస్లింలు, క్రైస్తవులు, హిందువులు, బౌద్ధులు, యూదులు, ఇతర మతాలను అనుసరించేవారితో పాటు ఏ మతానికీ సంబంధం లేదని భావించేవారి జనాభా ధోరణులను విశ్లేషించారు. 2020 నుంచి 2070 మధ్యకాలంలో ప్రపంచ మతాల జనాభాలో ఎలాంటి మార్పులు చోటుచేసుకోవచ్చన్నది ఈ పరిశోధన ప్రధాన ఉద్దేశం.

ఈ అధ్యయనం ప్రకారం ఇస్లాం, క్రైస్తవ మతాల జనాభా రెండూ పెరుగుతాయి. అయితే క్రైస్తవ జనాభాతో పోలిస్తే ముస్లింల జనాభా వృద్ధి వేగం ఎక్కువగా ఉండనుంది. ఈ ధోరణి కొనసాగితే 2035 నాటికి ఇస్లాం ప్రపంచంలోనే అతిపెద్ద మతంగా నిలిచే అవకాశం ఉందని పరిశోధకులు అంచనా వేస్తున్నారు.

జనాభా పెరుగుదలకు కారణమేంటి?.. ముస్లింల జనాభా వేగంగా పెరగడానికి ప్రధాన కారణాల్లో ఒకటి అధిక జననాల రేటు. ప్యూ రీసెర్చ్ అధ్యయనం ప్రకారం ముస్లిం మహిళలకు సగటున 3.1 మంది పిల్లలు జన్మిస్తుండగా, క్రైస్తవ మహిళల్లో ఈ సంఖ్య 2.5గా ఉంది.ఒక తరం తన జనాభాను తదుపరి తరంతో భర్తీ చేసుకోవడానికి ప్రతి మహిళకు సగటున 2.1 మంది పిల్లలు అవసరమవుతారని జనాభా అధ్యయనాలు సూచిస్తున్నాయి. ఈ ప్రమాణంతో పోలిస్తే ముస్లిం జనాభాలో సహజ వృద్ధికి ఎక్కువ అవకాశం కనిపిస్తోంది.

ప్రపంచవ్యాప్తంగా జనాభా పెరుగుదలలోనూ ముస్లింల వాటా గణనీయంగా ఉండనుంది. 2020 నుంచి 2070 మధ్య సహజ జనాభా మార్పుల కారణంగా ముస్లింల సంఖ్య సుమారు 160 కోట్ల మేర పెరగవచ్చని, క్రైస్తవుల సంఖ్య 79.2 కోట్ల మేర పెరగవచ్చని నివేదిక అంచనా వేసింది.మత మార్పిడుల ప్రభావం ఎంత?మతాల జనాభా మార్పుల్లో జననాలు, మరణాలతో పాటు మత మార్పిడులు కూడా కీలక పాత్ర పోషిస్తాయి. ఈ అంశాన్ని కూడా ప్యూ రీసెర్చ్ పరిశీలించింది.

2020 నుంచి 2070 మధ్య ఇస్లాంను విడిచిపెట్టేవారి సంఖ్య, ఆ మతంలోకి కొత్తగా వచ్చేవారి సంఖ్య కంటే స్వల్పంగా ఎక్కువగా ఉండవచ్చని అంచనా వేసింది. దీనివల్ల ముస్లిం జనాభాలో నికరంగా 80 లక్షల మేర తగ్గుదల ఉండవచ్చని పేర్కొంది.

క్రైస్తవ మతం విషయంలో ఈ ప్రభావం మరింత ఎక్కువగా ఉండనుంది. క్రైస్తవ మతాన్ని విడిచిపెట్టేవారి సంఖ్య, కొత్తగా స్వీకరించేవారి సంఖ్య కంటే అధికంగా ఉండటంతో నికరంగా 10.5 కోట్ల మేర తగ్గుదల ఉండవచ్చని అధ్యయనం తెలిపింది.అయితే, ఇస్లాం జనాభా పెరుగుదలకు క్రైస్తవుల మత మార్పిడులే ప్రధాన కారణం కాదని నివేదిక స్పష్టం చేసింది. మత మార్పిడుల కంటే సహజ జనాభా పెరుగుదలే ముస్లింల సంఖ్య పెరగడంలో కీలక పాత్ర పోషించనుంది.

పాకిస్థాన్‌లో రెట్టింపు కానున్న ముస్లిం జనాభా!దేశాలవారీగా పరిశీలించినప్పుడు ఆసక్తికరమైన అంశాలు వెల్లడయ్యాయి. ఇప్పటికే ముస్లింలు అధిక సంఖ్యలో ఉన్న దేశాల్లోనే భవిష్యత్తులో వారి జనాభా వృద్ధి ఎక్కువగా ఉండనుంది.2020లో 53 దేశాల్లో ముస్లింలు మెజారిటీ మత సమూహంగా ఉన్నారు. 2070 నాటికి ఈ దేశాల్లో అదనంగా 120 కోట్ల మంది ముస్లింలు నివసించే అవకాశం ఉందని ప్యూ రీసెర్చ్ అంచనా వేసింది. ప్రపంచ ముస్లిం జనాభా వృద్ధిలో ఇది 74 శాతానికి సమానం. మరోవైపు మధ్యప్రాచ్యం, ఉత్తర ఆఫ్రికా ప్రాంతంలో 2070 నాటికి ముస్లింల జనాభా 95 శాతానికి చేరుకోవచ్చని అంచనా వేసింది. ఆసియా-పసిఫిక్ ప్రాంతంలోనూ మతపరమైన గుర్తింపు లేనివారి జనాభాను ముస్లింలు అధిగమించే అవకాశం ఉందని వెల్లడించింది.

క్రైస్తవ జనాభా కూడా పెరుగుతుంది…ఇస్లాం జనాభా వృద్ధి వేగంగా ఉన్నప్పటికీ క్రైస్తవ జనాభా కూడా పెరుగుతుందని ప్యూ రీసెర్చ్ స్పష్టం చేసింది. ఇప్పటికే క్రైస్తవులు మెజారిటీగా ఉన్న 120 దేశాల్లోనే ఈ పెరుగుదల ప్రధానంగా కేంద్రీకృతమవుతుంది. ఆయా దేశాల్లో క్రైస్తవ జనాభా అదనంగా 63 కోట్ల మేర పెరిగే అవకాశం ఉందని అధ్యయనం అంచనా వేసింది. సంఖ్యలకే పరిమితం కాని అధ్యయనంమతాల జనాభా గణాంకాలు కేవలం సంఖ్యల మార్పును మాత్రమే సూచించవు. అవి ప్రపంచ సామాజిక, సాంస్కృతిక పరిణామాలపై కూడా ప్రభావం చూపుతాయి. భవిష్యత్తులో మతాల మధ్య సంబంధాలు, సామాజిక సమన్వయం, పరస్పర అవగాహన వంటి అంశాలకు మరింత ప్రాధాన్యం ఏర్పడనుంది.అయితే ఈ అంచనాలను భవిష్యత్తుకు సంబంధించిన ఖచ్చితమైన ఫలితాలుగా భావించరాదని ప్యూ రీసెర్చ్ స్పష్టం చేసింది. ఆర్థిక, సామాజిక పరిస్థితులు, ప్రకృతి వైపరీత్యాలు, యుద్ధాలు, ఇతర ప్రపంచ పరిణామాలు మతపరమైన జనాభా ధోరణులను మార్చగలవని పేర్కొంది.మొత్తంగా చూస్తే.. ప్రపంచంలో ఇస్లాం జనాభా వేగంగా పెరుగుతున్న వాస్తవాన్ని ఈ అధ్యయనం మరోసారి వెలుగులోకి తెచ్చింది. అయితే ఏ మతం జనాభా పరంగా ముందున్నదన్న దానికంటే.. భిన్న మతాల ప్రజలు పరస్పర గౌరవం, సహనం, సోదరభావంతో కలిసి జీవించడం నేటి ప్రపంచానికి మరింత అవసరమైన సందేశం.

Tags :

Grid News

Latest Post

వర్తమానం ఒక ప్రముఖ తెలుగు వెబ్ పత్రిక. డిజిటల్ రంగంలో నిజాయితీ, పారదర్శకత, విశ్వసనీయతతో కూడిన వార్తలను ప్రజలకు అందించడమే లక్ష్యంగా ఏర్పాటైంది.

Latest News

Most Popular

Copyright © 2024 Vartamanam. All Right Reserved.