భువనేశ్వర్ : ఒరిస్సాలోని కళింగ ఇనిస్టిట్యూట్ ఆఫ్ ఇండస్ట్రియల్ టెక్నాలజీ (KIIT) యూనివర్సిటీలో నేపాల్‌కు చెందిన బీటెక్‌ మూడో సంవత్సరం విద్యార్థిని హాస్టల్ గదిలో శవమై కనిపించడంతో అటు నేపాల్, ఇటు క్యాంపస్‌లో ఉద్రిక్తత నెలకొంది. దీంతో ఒరిస్సా ప్రభుత్వం నిజనిర్థారణ కమిటీని ఏర్పాటు చేసింది. ఈ కమిటీ… విద్యార్థి మరణానికి గల కారణాలను తెలుసుకోనుంది. అంతేకాదు నిరసన చేస్తున్న విద్యార్థులకు సస్పెన్షన్ లేఖలు జారీ చేయాల్సినంతగా పరిస్థితులు దిగజారాయా అని తెలుసుకోనుంది.
కళింగ యూనివర్సిటీలో నేపాల్ విద్యార్థులపై చర్య గురించి సంస్థ అధికారులు రాష్ట్ర ప్రభుత్వానికి ఎందుకు తెలియజేయలేదో కూడా ముగ్గురు సభ్యుల ప్యానెల్ పరిశీలిస్తుంది. ఈ ప్యానెల్‌కు అదనపు ప్రధాన కార్యదర్శి (హోం) నేతృత్వం వహిస్తారు. ఉన్నత విద్య,మహిళా, శిశు అభివృద్ధి విభాగాల కార్యదర్శులు మిగతా సభ్యులుగా ఉంటారు.
నగరానికి చెందిన కళింగ ఇన్స్టిట్యూట్ ఆఫ్ ఇండస్ట్రియల్ టెక్నాలజీ (KIIT)లో మూడవ సంవత్సరం B టెక్ (కంప్యూటర్ సైన్స్) విద్యార్థిని ప్రకృతి లామ్సల్ ఆదివారం మధ్యాహ్నం తన హాస్టల్ గదిలో ఆత్మహత్య చేసుకుని మరణించారని, ఇది క్యాంపస్‌లో అశాంతికి దారితీసిందని పోలీసులు అన్నారు. అంతేకాదు బాలిక మరణం, తరువాత జరిగిన నిరసనలకు సంబంధించి అరెస్టు చేసిన వ్యక్తుల సంఖ్య ఆరుకు పెరిగిందని పోలీసులు తెలిపారు.
ఆదివారం బాలిక ఆత్మహత్యకు ప్రేరేపించాడనే ఆరోపణలపై 21 ఏళ్ల KIIT విద్యార్థిని అరెస్టు చేయగా, నేపాల్ విద్యార్థులపై అనవసరంగా దాడి చేసినందుకు సంస్థ ముగ్గురు డైరెక్టర్లతో సహా మరో ఐదుగురిపై కేసు నమోదు చేశారు.
ఈ సంఘటనపై స్పందిస్తూ, రాష్ట్ర ఉన్నత విద్యా మంత్రి సూర్యబన్షి సూరజ్ సంస్థను నోటీసులో ఉంచామని, నిజనిర్ధారణ బృందం రిపోర్ట్ ఆధారంగా తగిన చట్టపరమైన, పరిపాలనా చర్యలు తీసుకుంటామని చెప్పారు. విద్యార్థి మరణం, తదుపరి నేపాలీ విద్యార్థులపై చర్యల గురించి KIIT అధికారులు రాష్ట్ర ప్రభుత్వానికి సమాచారం ఇవ్వలేదని సూరజ్ విలేకరులతో మాట్లాడుతూ పేర్కొన్నారు.
ప్రైవేట్ వ్యక్తులు విద్యార్థులపై బలప్రయోగం చేయడంతో సహా దుష్ప్రవర్తనకు సంబంధించిన నివేదికలను దర్యాప్తు చేస్తున్నామని, బాధ్యులను జవాబుదారీగా ఉంచుతామని మంత్రి చెప్పారు. “ప్రతి విద్యార్థి భద్రత, గౌరవం, శ్రేయస్సును నిర్ధారించడానికి రాష్ట్ర ప్రభుత్వం కట్టుబడి ఉందని, న్యాయం త్వరగా అందేలా రాష్ట్ర ప్రభుత్వం అవసరమైన చర్యలు తీసుకుంటుందని మంత్రి అన్నారు. సంస్థ నుండి బహిష్కరణకు గురైన నేపాలీ విద్యార్థులందరినీ తిరిగి తీసుకురావాలని సంస్థ అధికారులను…. ప్రభుత్వం కోరిందని మంత్రి తెలిపారు.
“కటక్ రైల్వే స్టేషన్‌లో నేపాలీ విద్యార్థులను ఎందుకు దించేశారు? విదేశీ విద్యార్థులు పాల్గొన్నప్పుడు ఇన్స్టిట్యూట్ అధికారులు ఈ సంఘటన గురించి ప్రభుత్వానికి ఎందుకు తెలియజేయలేదు?” అని సూరజ్ ప్రశ్నించారు.
దాదాపు 100 మంది నేపాలీ విద్యార్థులు ఇప్పటికీ క్యాంపస్‌లోనే ఉన్నారని, 800 మంది తమ ఇళ్లకు వెళ్లిపోయారని ఆయన పేర్కొన్నారు. ఇంతలో, పోలీసులు బాలిక మృతదేహాన్ని భువనేశ్వర్‌లోని ఎయిమ్స్‌లో పోస్ట్‌మార్టం తర్వాత ఆమె తండ్రి సునీల్ లామ్సాల్‌కు అప్పగించారు. అయితే, మృతదేహాన్ని బుధవారం నేపాల్‌కు విమానంలో పంపనున్నారు.
ఇన్‌స్టిట్యూట్‌లోని అంతర్జాతీయ విద్యార్థుల భద్రతపై ఆందోళన వ్యక్తం చేస్తూ, బాలిక తండ్రి మాట్లాడుతూ, “వారు (KIIT) విద్యార్థులను ఇన్‌స్టిట్యూట్‌లో చేరమని ఆహ్వానించారు. భద్రతకు హామీ ఇచ్చారు. అయితే, ఇక్కడ పరిస్థితులు భిన్నంగా ఉన్నాయి. నేను నా కుమార్తెను ఉన్నత చదువుల కోసం పంపాను, కానీ ఇక్కడ జరిగినది ఆమోదయోగ్యం కాదు. ప్రభుత్వం నుండి న్యాయం జరుగుతుందని నేను ఆశిస్తున్నానని అన్నారు.”
“పోలీసులు రెండు కేసులు నమోదు చేశారు, ఒకటి ఆమె బంధువు ఫిర్యాదు మేరకు ఉరి వేసుకుని ఆత్మహత్యకు సంబంధించింది కాగా, మరొకటి ప్రైవేట్ విశ్వవిద్యాలయ భద్రతా సిబ్బంది ఈ సంఘటనపై నిరసన తెలిపిన విద్యార్థులను దుర్భాషలాడుతూ కొట్టడం వంటి సోషల్ మీడియా వీడియోలోని విషయాలపై పోలీసులు కేసు నమోదు చేశారు” అని భువనేశ్వర్ డిసిపి పినాక్ మిశ్రా పిటిఐకి తెలిపారు.
బాలిక మరణం, తరువాత జరిగిన నిరసనలకు సంబంధించి పోలీసులు ఇప్పటివరకు ఆరుగురు వ్యక్తులను అరెస్టు చేశారు. డైరెక్టర్ జనరల్ (హెచ్ఆర్) సిబానంద మిశ్రా, డైరెక్టర్ (అడ్మినిస్ట్రేషన్) ప్రతాప్‌గార్డ్స్ జోగేంద్ర బెహెరా మరియు రామకాంత నాయక్. సోమవారం, బాలిక ఆత్మహత్యకు ప్రేరేపించారనే ఆరోపణలపై 21 ఏళ్ల కెఐఐటి విద్యార్థిని పోలీసులు అరెస్టు చేశారు.
వీడియో ఫుటేజీలో, ఈ సెక్యూరిటీ గార్డులు పికెటింగ్ చేస్తున్నప్పుడు, బాలిక మరణానికి న్యాయం చేయాలని డిమాండ్ చేస్తున్నప్పుడు విద్యార్థులపై దాడి చేస్తున్నట్లు అధికారులు తెలిపారు. మరోవంక మంగళవారం సాయంత్రం ఇన్స్టిట్యూట్ విద్యార్థులు బాధితురాలికి న్యాయం కోరుతూ కొవ్వొత్తుల ర్యాలీ నిర్వహించారు.
కొంతమంది విద్యార్థులు ఇన్స్టిట్యూట్ ప్రధాన ద్వారం వద్ద ఉన్న సెల్ఫీ పాయింట్‌ను కూడా ధ్వంసం చేశారు. బాలికకు న్యాయం చేయాలని కోరుతూ బజరంగ్ దళ్, సీపీఐ-ఎం మద్దతుదారులు నగరంలో నిరసనలు కూడా నిర్వహించారు.
కాగా, రాష్ట్ర అసెంబ్లీలో కూడా ఈ అంశాన్ని లేవనెత్తారు, అక్కడ సభ్యులు పార్టీలకు అతీతంగా బాలిక మరణం, పొరుగు దేశ విద్యార్థులను హాస్టల్ నుండి బహిష్కరించిన సంఘటనలపై ఆందోళన వ్యక్తం చేశారు. KIIT పరిణామాలు రాష్ట్రానికి చెడ్డ పేరు తెచ్చిపెట్టాయని, వాటిని సహించకూడదని సభ్యులందరూ అంగీకరించారు.
బాలిక మరణం, విద్యార్థులపై జరిగిన హింసకు సంబంధించిన విషయంపై న్యాయ విచారణ జరపాలని కాంగ్రెస్ డిమాండ్ చేయగా, బిజెపి సభ్యులు కెఐఐటి వ్యవస్థాపకుడు అచ్యుత సామంతను అరెస్టు చేయాలని డిమాండ్ చేశారు. బిజెపి పాలిత ఒడిశాలో శాంతిభద్రతల పరిస్థితి దిగజారడం వల్ల ఈ సంఘటన జరిగిందని బిజెడి తెలిపింది.
మరోవంక విద్యార్థి మరణం వల్ల తలెత్తే పరిస్థితిని “సమర్థనీయమైన, చట్టపరమైన” మార్గంలో పరిష్కరించకపోతే ఒడిశాలోని విద్యాసంస్థలలో చదువుకోవాలనుకునే విద్యార్థులకు నో అబ్జెక్షన్ సర్టిఫికెట్లు జారీ చేయడాన్ని నేపాల్ ప్రభుత్వం నిలిపివేయవచ్చని తెలిపింది. ఒడిశాలోని ఏదైనా విశ్వవిద్యాలయం లేదా విద్యాసంస్థల్లో చదువుకోవాలనుకునే విద్యార్థులకు భవిష్యత్తులో నో అబ్జెక్షన్ సర్టిఫికెట్ (ఎన్‌ఓసి) జారీ చేయడాన్ని నిలిపివేయవచ్చని ఆ దేశ విద్య, సైన్స్ అండ్ టెక్నాలజీ మంత్రిత్వ శాఖ ఒక ప్రకటనలో తెలిపింది.
