లక్నో: ఉత్తరప్రదేశ్‌లోని ఉన్నావ్ జిల్లాలో హోలీ పండుగ సందర్భంగా తనపై రంగుజల్లడాన్ని నిరాకరించిన ముస్లిం వ్యక్తిపై అక్కడి గుంపు దారుణంగా దాడి చేశారు. కొత్వాలి సదర్ పోలీస్ స్టేషన్ ప్రాంతంలో ఉదయం 11 గంటల ప్రాంతంలో 55 ఏళ్ల మహ్మద్ షరీఫ్ అనే వ్యక్తిని హోలీ వేడుకలు జరుపుతున్న వ్యక్తులు అడ్డగించారు. అతనిపై బలవంతంగా రంగులు వేయడానికి ప్రయత్నించారు. అతను ప్రతిఘటించగా ఆ బృందం అతనిపై దాడులకు పాల్పడింది. చేసింది.
షరీఫ్ అక్కడి నుండి తప్పించుకోగలిగినప్పటికీ, అతనికి గుండెపోటు వచ్చింది. షరీఫ్ కుమార్తె బుష్రా ప్రకారం, దాడి చేసిన వారు అతనితో దురుసుగా ప్రవర్తించడమే కాకుండా అతని పర్సు నుండి ₹5000 దోచుకున్నారు. ఆమె మీడియాతో మాట్లాడుతూ, “కొంతమంది మా నాన్నపై దాడి చేసి రంగులు విసిరారు. అతను వారిని ప్రతిఘటించగా వారు మా నాన్నని కొట్టారు. పర్సు నుండి నగదును కూడా దోచుకున్నారని ఆమె వాపోయింది.”
తన తండ్రికి ఎవరితోనూ శత్రుత్వం లేదని బుష్రా ధృవీకరించింది. ఎందుకంటే ఆయన సౌదీ అరేబియాలో చాలా సంవత్సరాలుగా డ్రైవర్‌గా పనిచేస్తున్నారు. ఆయన రెండు నెలల క్రితమే ఇండియాకు తిరిగి వచ్చారని బుష్రా తెలిపింది.
షరీఫ్ మేనల్లుడు, దాడికి ప్రత్యక్ష సాక్షి అయిన మహమ్మద్ షమీమ్ మాట్లాడుతూ, తన మామపై దాడి జరిగినప్పుడు తాను అటువైపే వెళ్తున్నాని చెప్పాడు. దాడి చేసిన వారు మా మామపై రంగులు వేయాలని నిశ్చయించుకున్నారని, మా మామ వద్దని వేడుకున్నాడని అతను చెప్పాడు. వారు అతన్ని పట్టుకుని, నా కళ్ళ ముందు మా మామ కుప్పకూలిపోయే వరకు అతనిపై దాడి చేశారని షమీమ్ అన్నారు.
కాగా, షరీఫ్ మరణం ఆ ప్రాంతంలో ఉద్రిక్తతలకు కారణమైంది, అతని కుటుంబం వీలైనంత త్వరగా నిందితులను అరెస్టు చేయాలని డిమాండ్ చేసింది. ఈ సంఘటనతో ఆగ్రహించిన స్థానికులు, కాన్పూర్-లక్నో ప్రధాన రహదారి వద్ద షరీఫ్ మృతదేహాన్ని ఉంచి రోడ్డును దిగ్బంధించారు. కొన్ని వాహనాలు కూడా దెబ్బతిన్నట్లు సమాచారం.
షరీఫ్ కుటుంబ సభ్యులను ఆయన అంతిమ సంస్కారం చేయాలని పోలీసులు కోరారు, అయితే కుటుంబం పోలీసుల అభ్యర్థనలను తిరస్కరించింది, నిందితులను అరెస్టు చేయాలని డిమాండ్ చేసింది. పోస్ట్‌మార్టం నివేదికలో గుండెపోటు వచ్చిందని, ఎవరికీ గాయాలు కాలేదని పోలీసులు చెబుతున్నారు, అయితే స్థానికులు ఇది హత్య అని ఆరోపించారు.
షరీఫ్ బయటకు వచ్చినప్పుడు హోలీ ఆడుతున్న పిల్లలు తక్కువగా ఉన్నారని నిందితుడి కుటుంబం ఆరోపించింది. పిల్లలకు రంగులు వేయవద్దని చెప్పి తన ఆటో దగ్గరకు వెళ్లాడు. అయితే, ఆ తర్వాత ఏమి జరిగిందో కుటుంబ సభ్యులు నిర్ధారించలేకపోయారు. పోలీసులు దర్యాప్తు చేస్తున్నారు.
