న్యూఢిల్లీ : లోక్‌సభలో వక్ఫ్ సవరణ చట్టం 2025 ఆమోదం పొందడాన్ని జమాతే-ఇ-ఇస్లామి హింద్ (JIH) అధ్యక్షుడు సయ్యద్ సాదతుల్లా హుస్సేనీ తీవ్రంగా ఖండించారు, దీనిని మత స్వేచ్ఛ, రాజ్యాంగ హక్కులపై స్పష్టమైన దాడి అని అభివర్ణించారు.
ఈ చట్టం ఆమోదం వివక్షతతో కూడుకున్నది, ఎందుకంటే ఇది ముస్లింలు తమ మతపరమైన ఆస్తులను నిర్వహించడంలో స్వయంప్రతిపత్తిని హరింపజేస్తుంది, అయితే ఇతర వర్గాల మతపరమైన ట్రస్టులు మాత్రం ప్రభావితం కావు. అంతేకాదు ‘వక్ఫ్ చట్టం 1995’లో భారీ మార్పులను తీసుకొస్తుంది, వక్ఫ్ ఆస్తుల నిర్వహణలో ప్రభుత్వ జోక్యాన్ని తీవ్రంగా పెంచుతుంది. ఇది మతపరమైన మైనారిటీలకు వారి స్వంత మత సంస్థలను నిర్వహించే హక్కును రాజ్యాంగంలోని ఆర్టికల్ 26ను బలహీనపరుస్తుందని జమాతే ఇస్లామీ హింద్ అధ్యక్షుడు పత్రికలకు విడుదల చేసిన ఒక ప్రకటనలో తెలిపారు.”
పార్లమెంటరీ చర్చ సందర్భంగా అధికార పక్ష సభ్యులు చేసిన తప్పుదారి పట్టించే వాదనలపై ఆయన తీవ్ర ఆందోళన వ్యక్తం చేశారు. లోక్‌సభలో చెప్పినట్లుగా వక్ఫ్ బోర్డులు ఛారిటీ కమిషనర్‌తో సమానం కాదని ఆయన పేర్కొన్నారు. అలాగే హిందూ, సిక్కు ఎండోమెంట్‌ల కోసం అనేక రాష్ట్రాలు ప్రత్యేకమైన చట్టాలను కలిగి ఉన్నాయని, నియంత్రణ, పర్యవేక్షక అధికారులు సంబంధిత మత వర్గాలకు మాత్రమే చెందుతాయని సాదతుల్లా గుర్తు చేశారు.
వక్ఫ్ ఆస్తుల దుర్వినియోగాన్ని పరిష్కరించడానికి చట్టంలో ఎటువంటి నిర్దిష్ట చర్యలు లేవు. బదులుగా, ముస్లింయేతర సభ్యులను చేర్చడం, ప్రభుత్వం నామినేట్ చేసిన అధికారులకు నియంత్రణను బదిలీ చేయడం సమస్యను పరిష్కరించదు. వాస్తవానికి, చారిత్రాత్మకంగా వక్ఫ్ వ్యవహారాల్లో అవినీతి, దుర్వినియోగానికి అనవసరమైన రాజకీయ, అధికార జోక్యం ప్రధాన కారణమని జేఐహెచ్‌ చీఫ్‌ అభిప్రాయపడ్డారు.”
అంతేకాదు ‘వినియోగదారుని బట్టి వక్ఫ్’లో మార్పులను అనుమతించడం, కొత్త వక్ఫ్‌లపై నిర్బంధ షరతులు విధించడం వంటి నిబంధనలను కూడా ఆయన విమర్శించారు. వాటిని ముస్లిం సంస్థలను బలహీనపరిచే ఉద్దేశపూర్వక ప్రయత్నంగా అభివర్ణించారు.
లౌకికవాదాన్ని సమర్థిస్తున్నామని చెప్పుకుంటూనే ఈ రాజ్యాంగ విరుద్ధమైన చట్టానికి మద్దతు ఇస్తున్న రాజకీయ పార్టీల పట్ల జమాత్‌ అధ్యక్షుడు తీవ్ర నిరాశను వ్యక్తం చేసారు. “ఈ కపటత్వం చరిత్రలో రాజకీయ అవకాశవాదం, మోసానికి చెత్త ఉదాహరణగా నిలిచిపోతుందని సయ్యద్ సాదతుల్లా హుస్సేనీ అన్నారు. రాజ్యాంగంలోని ఆర్టికల్ 14, 25, 26, 29ని ఉల్లంఘించే ఈ చట్టాన్ని సవాలు చేయాలని ప్రతిపక్ష నాయకులు, లౌకిక శక్తులు,న్యాయ నిపుణులకు ఆయన అభ్యర్థించారు.
అఖిల భారత ముస్లిం పర్సనల్ లా బోర్డు (AIMPLB), ఇతర ముస్లిం సంస్థలు ప్రకటించిన దేశవ్యాప్త నిరసనలకు ఆయన పూర్తి మద్దతు ప్రకటించారు, “ఈ అన్యాయమైన, రాజ్యాంగ విరుద్ధమైన చట్టాన్ని రద్దు చేయడానికి అన్ని చట్టపరమైన, రాజ్యాంగబద్ధమైన, ప్రజాస్వామ్య మార్గాలను అనుసరిస్తామని జమాత్‌ అధ్యక్షుడు సయ్యద్ సాదతుల్లా హుస్సేనీ నొక్కి చెప్పారు.
