న్యూఢిల్లీ: న్యాయం, సమానత్వమే లక్ష్యంగా బీహార్‌లోని బెగుసరాయ్ జిల్లాలో వైట్ టీ-షర్ట్ ఉద్యమాన్ని కాంగ్రెస్ అగ్రనేత రాహుల్‌గాంధీ ప్రారంభించారు. ఈ మేరకు ఆయన మాట్లాడుతూ…యువత ఈ కార్యక్రమంలో భారీ సంఖ్యలో పాల్గొనాలని కాంగ్రెస్ ఎంపీ రాహుల్ గాంధీ బీహార్ యువతకు విజ్ఞప్తి చేశారు, రాష్ట్ర ప్రజలు ఇకపై మోసపోరని, వారు తమ విధిని తామే రాసుకోవడానికి సిద్ధంగా ఉన్నారని బలమైన సందేశాన్ని ప్రజల్లోకి పంపారు.
ఈ పర్యటనకు ముందు, బీహార్‌లో వైట్ టీ-షర్ట్ ఉద్యమం విజయవంతం కావాలని కోరుతూ ప్రతిపక్ష నాయకుడు తన సోషల్ మీడియా ఖాతాలో విజ్ఞప్తిని పోస్ట్‌ చేశారు. అంతేకాదు “వలసలను ఆపండి, ఉద్యోగాలు ఇవ్వండి యాత్ర… మీ పోరాటం, బాధలు, బీహార్ యువత మనోభావాలను ప్రపంచానికి చూపుతుంది” అని ఆయన వీడియో సందేశంలో పేర్కొన్నారు.
“ఈ సందేశం బీహార్‌లోని ప్రతి నివాసికి. నేను ఏప్రిల్ 7న బెగుసరాయ్‌ను సందర్శిస్తాను. ద్రవ్యోల్బణం, నిరుద్యోగం, ప్రైవేటీకరణ, పేపర్ లీకేజీలు, మిమ్మల్ని, మీ కుటుంబాలను ప్రతికూలంగా ప్రభావితం చేసే అన్ని ఇతర సమస్యలపై నేను మీతో భుజం భుజం కలిపి నడుస్తాను” అని ఆయన వీడియోలో చెప్పారు. ‘పలాయన్ యాత్ర’ ఉద్దేశ్యం యువత శక్తిని సమీకరించి కొత్త బీహార్‌ను నిర్మించి, దానిని కొత్త అవకాశాల భూమిగా మార్చడమేనని రాహుల్ అన్నారు.
“బీహార్ యువత ఇప్పుడు తప్పుదారి పట్టరు,ఎవరి ముందు తలవంచరు. వారు కలిసి కదిలి తమ కోసం కొత్త భవిష్యత్తును నిర్మిస్తారు” అని ఆయన యువతను ఉద్దేశించి అన్నారు. అంతేకాదు ఈ వీడియోను మీ గ్రూపుల్లో షేర్‌ చేసుకోవాలని రాహుల్ గాంధీ విజ్ఞప్తి చేసారు.
ఈ ఏడాది చివర్లో అసెంబ్లీ ఎన్నికలు జరగనున్న బీహార్‌కు రాహుల్ పర్యటన, కాంగ్రెస్ పార్టీ రాష్ట్రంలో కొత్త జిల్లా అధ్యక్షులను ప్రకటించిన కొన్ని రోజుల తర్వాత వచ్చింది. గత వారం బీహార్‌లోని 40 జిల్లాల్లోనూ కొత్త అధ్యక్షులు, వర్కింగ్ ప్రెసిడెంట్‌లను AICC నియమించింది. తన పర్యటన సందర్భంగా, రాహుల్ గాంధీ అన్ని కొత్త జిల్లా అధిపతులతో పార్టీ ఎన్నికల వ్యూహాన్ని సమీక్షించి, రాబోయే ఎన్నికలకు రోడ్‌మ్యాప్‌ను రూపొందించాలని కూడా భావిస్తున్నారు.
కాగా, కాంగ్రెస్ ఎంపీ బీహార్ పర్యటనపై బిజెపి తీవ్రంగా అభ్యంతరం వ్యక్తం చేసింది. ఇది పార్టీకి మరో వైఫల్యంతో ముగుస్తుందని పేర్కొంది. “రాహుల్ గాంధీ మొత్తం కాంగ్రెస్ ఓడను ముంచేశారు. బీహార్‌లో కూడా ఆయన అలాగే చేస్తారు. ఆయన ఎక్కడికి వెళ్ళినా కాంగ్రెస్ మునిగిపోతుంది. ఛత్తీస్‌గఢ్, హర్యానా, రాజస్థాన్, మధ్యప్రదేశ్, మహారాష్ట్ర, ఢిల్లీ కొన్ని ఉదాహరణలు. కాంగ్రెస్ ఓడను ముంచేసి, తన యవ్వనాన్ని వృధా చేసుకున్నందుకు రాహుల్ గాంధీకి నేను కృతజ్ఞతలు తెలుపుతున్నాను. ఆయన ఇప్పుడు 55 ఏళ్ల యువకుడిగా మారిపోయారు. బీహార్‌లో కూడా ఆయన కాంగ్రెస్‌ను ముంచేస్తారు” అని బిజెపి రాష్ట్ర అధ్యక్షుడు దిలీప్ జైస్వాల్ IANSతో మాట్లాడుతూ ఎద్దేవా చేశారు.
Xలో రాహుల్ గాంధీ వీడియో సందేశం లింక్
