న్యూఢిల్లీ: పంజాబ్ నేషనల్ బ్యాంక్ రుణ మోసం కేసులో ప్రధాన నిందితుడు, వజ్రాల వ్యాపారి మెహుల్ చోక్సీని బెల్జియంలో పోలీసులు అరెస్టు చేసినట్లు సెంట్రల్ బ్యూరో ఆఫ్ ఇన్వెస్టిగేషన్ (CBI) వర్గాలు ఈ ఉదయం ధృవీకరించాయి. 65 ఏళ్ల మెహుల్‌ ఛోక్సీని శనివారం అరెస్టు చేసినట్లు,ప్రస్తుతం జైలులో ఉన్నట్లు సమాచారం.

చోక్సీని అరెస్టు చేస్తున్నప్పుడు ముంబై కోర్టు జారీ చేసిన రెండు ఓపెన్-ఎండ్ అరెస్ట్ వారెంట్లను పోలీసులు ప్రస్తావించారని ఎకనామిక్ టైమ్స్ నివేదించింది. ఇవి 2018 మే 23, 2021 జూన్ 15, తేదీలతో ఉన్నాయి. అనారోగ్యం, ఇతర కారణాలను చూపుతూ అతను బెయిల్ కోరే అవకాశం ఉంది.

లండన్ నుండి అప్పగించడానికి ఎదురుచూస్తున్న చోక్సీ,అతని మేనల్లుడు నీరవ్ మోడీ, 2018లో పంజాబ్‌ నేషనల్‌ బ్యాంకును రూ.13,500 కోట్లకు పైగా మోసం చేశారనే ఆరోపణలపై CBI, ఎన్‌ఫోర్స్‌మెంట్ డైరెక్టరేట్ (ED)మోస్ట్‌ వాంటెడ్‌ లిస్టులో ఉన్నారు.

దేశంలో రెండవ అతిపెద్ద బ్యాంకు అయిన PNB…మెహుల్‌ చోక్సీ, అతని మేనల్లుడు నీరవ్‌ మోడీ, అతని సంస్థ గీతాంజలి జెమ్స్ మేనేజింగ్ డైరెక్టర్‌తో సహా అనేక సంస్థలపై క్రిమినల్ ఫిర్యాదు దాఖలు చేసింది.

ముంబైలోని బ్యాంకు బ్రాడీ హౌస్ బ్రాంచ్ అధికారులకు లంచం ఇవ్వడం ద్వారా వారు లెటర్స్ ఆఫ్ అండర్‌టేకింగ్ (LoUలు), ఫారిన్ లెటర్స్ ఆఫ్ క్రెడిట్ (FLCలు) ఉపయోగించారని ఆరోపించారు. PNBలో కుంభకోణం బయటపడటానికి వారాల ముందు, 2018 జనవరిలో చోక్సీ, మోడీ భారతదేశం నుండి పారిపోయారు.

గత నెలలో, బెల్జియం విదేశాంగ మంత్రిత్వ శాఖ మెహుల్ చోక్సీ యూరోపియన్ దేశంలో ఉన్నారని NDTVకి ధృవీకరించింది. ఒక కమ్యూనికేషన్‌లో, వారు అతని ఉనికి గురించి తమకు తెలుసని చెప్పారు.

అయితే, వ్యక్తిగత కేసులపై తాము వ్యాఖ్యానించబోమని మంత్రిత్వ శాఖ తెలిపింది. అయినప్పటికీ, “ఈ ముఖ్యమైన కేసులో పరిణామాలను FPS విదేశాంగ శాఖ నిశితంగా పరిశీలిస్తోంది”. నివేదికల ప్రకారం, ఆ దేశంలో ‘రెసిడెన్సీ కార్డ్’ పొందిన తర్వాత మెహుల్ చోక్సీ తన భార్య ప్రీతి చోక్సీతో కలిసి బెల్జియం పౌరురాలిగా ఆంట్వెర్ప్‌లో నివసిస్తున్నారు.

అయితే ఈ కార్డు ద్వారా కొన్ని షరతుల కింద జీవిత భాగస్వామితో కలిసి బెల్జియంలో చట్టబద్ధంగా ఉండొచ్చు. దీనికోసం ఛోక్సీ తప్పుడు పత్రాలు ఉపయోగించినట్లు ఆరోపణలు వచ్చాయి. ఇక, ఛోక్సీ ఇప్పటికీ భారత పౌరసత్వాన్ని వదులుకోలేదు. ఇదిలాఉండగా ఈ కేసులో మరో నిందితుడు నీరవ్‌ మోదీ ప్రస్తుతం లండన్‌ జైల్లో ఉన్నాడు.

ఆంటిగ్వా, బార్బుడా పౌరుడైన ఆయన క్యాన్సర్ చికిత్స కోసం ఆ ద్వీప దేశాన్ని విడిచిపెట్టి స్విట్జర్లాండ్‌కు వెళ్లాలని యోచిస్తున్నట్లు సమాచారం. 2021లో, ఆయన ఆంటిగ్వా నుండి పారిపోయారు, కానీ తరువాత మరొక కరేబియన్ ద్వీప దేశం – డొమినికాలో కనిపించారు.

డిసెంబర్ 2024లో, చోక్సీ వంటి వాంటెడ్ వ్యక్తుల అప్పులను తిరిగి చెల్లించడానికి రూ.2,565.90 కోట్ల విలువైన ఆస్తులను విక్రయించామని కేంద్ర ఆర్థిక మంత్రి నిర్మలా సీతారామన్ పార్లమెంటుకు తెలిపారు.