న్యూఢిల్లీ: కొత్త వక్ఫ్ సవరణ చట్టం రాజ్యాంగ బద్ధతను సవాలు చేస్తూ దాఖలైన పిటీషన్లపై భారత ప్రధాన న్యాయమూర్తి జస్టిస్‌ సంజీవ్‌ఖన్నా నేతృత్వంలోని త్రిసభ్య ధర్మాసనం నిన్న విచారణ చేపట్టింది. ఈ సందర్భంగా హిందూ మత ట్రస్టులలో ముస్లింలను అనుమతిస్తారా అని సుప్రీంకోర్టు కేంద్ర ప్రభుత్వాన్ని ప్రశ్నించింది. అలాంటి విషయం ఏదైనా ఉంటే బహిరంగంగా చెప్పండని కేంద్రం తరపున వాదించిన సొలిసిటర్ జనరల్ తుషార్ మెహతాను కోరింది.
“మీరు గతాన్ని తిరిగి రాయలేరు,” 100 లేదా 200 సంవత్సరాల క్రితం ఒక పబ్లిక్ ట్రస్ట్‌ను వక్ఫ్‌గా ప్రకటించినప్పుడు, దానిని అకస్మాత్తుగా వక్ఫ్ బోర్డు స్వాధీనం చేసుకోలేమని మరియు లేకపోతే ప్రకటించలేమని ధర్మాసనం పేర్కొంది. ప్రస్తుతం వక్ఫ్‌గా ఉన్న ఏదైనా ఆస్తి.. ప్రభుత్వ భూమి అవునో కాదో జిల్లా కలెక్టర్లు విచారణ జరిపి తేల్చేవరకూ దాన్ని వక్ఫ్‌గా పరిగణించబోమంటూ కొత్త చట్టంలో ఉన్న నిబంధననూ తాత్కాలికంగా పక్కనపెట్టాలని ధర్మాసనం ప్రతిపాదించింది. కోర్టులు వక్ఫ్‌గా ప్రకటించిన ఆస్తులను రద్దుచేసే అధికారాన్ని కలెక్టర్లకు కట్టబెట్టడంపై కూడా సుప్రీంకోర్టు అభ్యంతరం వ్యక్తంచేసింది.
అంతేకాదు ‘ఎక్స్‌ అఫీషియో సభ్యులు మినహాయించి వక్ఫ్ బోర్డులు, సెంట్రల్‌ వక్ఫ్ కౌన్సిల్‌కు చెందిన సభ్యులు అందరూ ముస్లింలు మాత్రమే ఉండాలి’ అని ధర్మాసనం స్పష్టం చేసింది. విచారణ ప్రారంభంలో సీజేఐ మాట్లాడుతూ… ఉభయ పక్షాలను తాను రెండు అంశాలను అడగదలచుకున్నానని చెప్పారు. ఈ పిటిషన్లను తాము స్వీకరించాలా లేక హైకోర్టుకు నివేదించాలా అన్నది మొదటి అంశం కాగా … నిజంగా ఈ పిటిషన్లను మేము విచారణకు తీసుకుంటే చిత్తశుద్ధితో వాదించాలని మీరు కోరుకుంటున్నారా అని సీజేఐ ఇరుపక్షాలను ప్రశ్నించారు. పిటిషన్లను విచారణకు స్వీకరించేందుకు తమకు ఎటువంటి అభ్యంతరం లేదని కూడా సీజేఐ స్పష్టం చేశారు.
తొలుత ఈ పిటిషన్లను హైకోర్టుకు నివేదించాలని భావించిన సుప్రీంకోర్టు నిర్ణయాన్ని మార్చుకుని పిటిషనర్ల తరఫున హాజరైన సీనియర్‌ న్యాయవాదులు కపిల్‌ సిబల్‌, అభిషేక్‌ సింఘ్వీ, రాజీవ్‌ ధావన్‌తోసహా పలువురు న్యాయవాదులు, కేంద్రం తరఫున సొలిసిటర్ జనరల్ తుషార్ మెహతా వాదనలను సుదీర్ఘంగా ఆలకించింది. ప్రస్తుతానికి లాంఛనంగా ఎటువంటి నోటీసు జారీచేయనప్పటికీ నేటి మధ్యాహ్నం 2 గంటల ప్రాంతంలో పిటిషన్లపై విచారణను తిరిగి చేపడతామని ధర్మాసనం తెలియచేసింది.
వక్ఫ్‌గా న్యాయస్థానాలు ప్రకటించిన ఆస్తులను డీనోటిఫై చేయరాదని, అవి వక్ఫ్‌బై యూజర్‌గా ఉన్నా… వక్ఫ్ బై డీడ్‌ (ఒప్పంద పత్రాలు)గా ఉన్న వాటిని డీనోటిఫై చేయరాదని సుప్రీంకోర్టు పేర్కొంది.
వక్ఫ్‌గా ప్రకటించిన చాలా ఆస్తులకు అవసరమైన ధ్రువీకరణ పత్రాలు ఉండకపోవచ్చని, అలాంటి పరిస్థితిలో వక్ఫ్ బై యూజర్‌ని ఎందుకు అనుమతించరని తుషార్ మెహతాను ధర్మాసనం ప్రశ్నించింది. కాగా, ‘అటువంటి వక్ఫ్ బై యూజర్‌ను ఎలా రిజిస్టర్‌ చేస్తారు? వారి వద్ద ఏం డాక్యుమెంట్లు ఉంటాయి? ఇది మరొకందుకు దారితీయవచ్చు. కొంత దుర్వినియోగం జరగవచ్చు. కాని నిజమైనవి కూడా ఉంటాయి. వక్ఫ్ బై యూజర్‌ను గుర్తించినట్టు బ్రిటిష్‌ కాలం నాటి తీర్పులను నేను చదివాను. వక్ఫ్ బై యూజర్‌ను తొలగిస్తే అది సమస్యగా మారుతుంది. చట్టసభ ఏ తీర్పును, ఉత్తర్వును లేదా డిక్రీని గాలిలోకి ప్రకటించలేదు’ అని ధర్మాసనం వ్యాఖ్యానించింది.
అయితే, సుప్రీంకోర్టుతో కేంద్ర ప్రభుత్వం విభేదించింది. అటువంటి నిర్ణయం తీసుకునే ముందు సరైన విచారణ జరపాలని కోరింది. ప్రస్తుతానికి అధికారిక నోటీసు జారీ చేయని ధర్మాసనం, నేడు ఈ పిటిషన్లపై విచారణను తిరిగి ప్రారంభిస్తామని తెలిపింది. చట్టం అమలు తర్వాత జరిగిన హింసపై సుప్రీంకోర్టు ఆందోళన వ్యక్తం చేసింది. ఈ విషయం తమకు బాధ కలిగించిందని పేర్కొంది.
వక్ఫ్ చట్టం చెల్లుబాటును సవాలు చేస్తూ AIMIM నాయకుడు అసదుద్దీన్ ఒవైసీ, ఆల్ ఇండియా ముస్లిం పర్సనల్ లా బోర్డు (AIMPLB), జమియత్ ఉలామా-ఇ-హింద్, ద్రవిడ మున్నేట్ర కజగం (DMK), కాంగ్రెస్ ఎంపీలు ఇమ్రాన్ ప్రతాప్‌గఢి, మహ్మద్ జావేద్ వంటి వారు దాఖలు చేసిన 72 పిటిషన్లు ఈ చట్టం చెల్లుబాటును సవాలు చేస్తూ దాఖలయ్యాయి.
వక్ఫ్ చట్టం
కేంద్రం ఇటీవల వక్ఫ్ (సవరణ) చట్టం, 2025ను నోటిఫై చేసింది, ఉభయ సభలలో వాడీ వేడి చర్చల తర్వాత పార్లమెంటు ఆమోదించింది. ఆ తర్వాత ఏప్రిల్ 5న రాష్ట్రపతి ద్రౌపది ముర్ము ఆమోదం పొందింది.
లోక్‌సభలో ఈ బిల్లుకు 288 మంది సభ్యులు మద్దతుగా, 232 మంది వ్యతిరేకంగా ఓటు వేయడంతో ఆమోదం లభించింది. రాజ్యసభలో, 128 మంది సభ్యులు అనుకూలంగా, 95 మంది వ్యతిరేకంగా ఓటు వేసారు. మరోవంక కేంద్రం ఏప్రిల్ 8న సుప్రీంకోర్టులో కేవియట్ దాఖలు చేసి, ఈ విషయంలో ఏదైనా ఆర్డర్ జారీ చేయడానికి ముందు విచారణ జరపాలని కోరింది. హైకోర్టులు, సుప్రీంకోర్టులో ఒక పార్టీ దానిని విచారించకుండా ఎటువంటి ఆర్డర్లు జారీ చేయకుండా చూసుకోవడానికి ఒక కేవియట్ దాఖలు చేస్తుంది.
