హైదరాబాద్ : ‘ఆపరేషన్ సిందూర్’ నేపథ్యంలో రాష్ట్ర ప్రభుత్వం అప్రమత్తమైంది. ముఖ్యంగా హైదరాబాద్‌లోని అన్ని రక్షణ సంస్థల వద్ద నిఘాను కట్టుదిట్టం చేసింది. భద్రతను మరింత పెంచింది. హైదరాబాద్‌లోని ఇంటిగ్రేటెడ్ కమాండ్ కంట్రోల్ సెంటర్ అన్ని ముఖ్యమైన రక్షణ సంస్థలతో అనుసంధానించారు.
హైదరాబాద్ సహా రాష్ట్రంలోని ఇతర సున్నితమైన ప్రదేశాలలో భద్రతను మరింత బలోపేతం చేసే పనిని ఇప్పటికే ఉన్నత పోలీసు అధికారుల బృందానికి అప్పగించారు. రాష్ట్ర పోలీసులు DRDL, DRDO, BDL, DMRL, హైదరాబాద్ డిఫెన్స్ అకాడమీ, మెదక్ జిల్లాలోని ఆర్డినెన్స్ ఫ్యాక్టరీ, హకీంపేటలోని ఇండియన్ ఎయిర్ ఫోర్స్ స్టేషన్‌లో మోహరించిన కేంద్ర పారామిలిటరీ దళాలతో కలిసి పనిచేసేందుకు సిద్ధమయ్యారు. అన్ని రక్షణ సంస్థలు నిశిత పరిశీలనలో ఉన్నాయని పోలీసు అధికారులు తెలిపారు. పాకిస్తాన్‌పై భారతదేశం సైనిక దాడి చేస్తున్నప్పుడు ఎటువంటి అవాంఛనీయ సంఘటనలు జరగకుండా చూసుకోవడానికి ఎప్పటికప్పుడు CCTV ఫుటేజ్‌లను పరిశీలిస్తున్నారు.
ఈమేరకు నిన్న జరిగిన ఉన్నత స్థాయి సమావేశంలో ముఖ్యమంత్రి రేవంత్ రెడ్డి భారత సైన్యానికి యావద్దేశం మద్దతు ఇవ్వాలనే బలమైన సందేశాన్ని పంపారు. క్లిష్ట సమయాల్లో రాజకీయ వ్యాఖ్యలు చేయడం మానేసి, సంయమనం పాటించాలని ముఖ్యమంత్రి రాజకీయ పార్టీలకు పిలుపునిచ్చారు. అక్రమంగా నివసిస్తున్న పాకిస్తాన్, బంగ్లాదేశ్ జాతీయులను అదుపులోకి తీసుకోవాలని పోలీసులను ఆదేశించారు. ఇందులో భాగంగా కమాండ్ కంట్రోల్ సెంటర్‌లో కమ్యూనికేషన్ వ్యవస్థను అభివృద్ధి చేయాలని రేవంత్ రెడ్డి పోలీసు అధికారులకు సూచించారు. శాంతి భద్రతలకు విఘాతం కలిగించే వారిపై కఠిన చర్యలు తీసుకుంటామని ఆయన హెచ్చరించారు.
సైబర్ భద్రత గురించి పోలీసు విభాగాలు అప్రమత్తంగా ఉండాలని, నకిలీ వార్తలను వ్యాప్తి చేసే వారిపై కఠిన చర్యలు తీసుకుంటామని ముఖ్యమంత్రి హెచ్చరించారు. ప్రజలలో ఆందోళన, భయాందోళనలకు గురిచేసే నకిలీ వార్తలను అరికట్టడానికి ఒక ప్రత్యేక సెల్ ఏర్పాటు చేయనున్నారు. గ్రేటర్ హైదరాబాద్ నగరంలోని మూడు పోలీసు కమిషనరేట్‌లలోని కమాండ్ కంట్రోల్ రూమ్‌కు అన్ని సిసి కెమెరాలను అనుసంధానించాలని పోలీసు అధికారులను ఆదేశించారు. అన్ని జిల్లా ప్రధాన కార్యాలయాలు, సున్నితమైన ప్రాంతాలలో భద్రతా వ్యవస్థను కూడా బలోపేతం చేయనున్నారు.
సాధారణ పరిస్థితులు నెలకొనే వరకు హైదరాబాద్‌లోని అన్ని విదేశీ కాన్సులేట్‌లు, ఐటీ కంపెనీలు కూడా నిశితంగా పరిశీలించనున్నారు. హైదరాబాద్ పోలీసులు అప్రమత్తంగా ఉండాలని, అవసరమైతే శాంతి కమిటీలతో చర్చలు జరపాలని కూడా ముఖ్యమంత్రి కోరారు. ఈ సమయాల్లో సామాజిక వ్యతిరేక కార్యకలాపాలను అరికట్టడానికి పాత నేరస్థుల కదలికలను పర్యవేక్షిస్తారు.
