హైదరాబాద్: నదీ జలాల పంపిణీ వివాదాలపై కేంద్రం రేపు అంటే జూలై 16న ఢిల్లీలో తెలంగాణ, ఆంధ్రప్రదేశ్ రాష్ట్రాల ముఖ్యమంత్రుల సమావేశానికి పిలుపునిచ్చింది. ఈ మేరకు కేంద్ర జలశక్తి మంత్రి సి.ఆర్. పాటిల్ సమక్షంలో సమావేశం కావాలని తెలంగాణ ముఖ్యమంత్రి రేవంత్ రెడ్డి, ఆంధ్రప్రదేశ్ ముఖ్యమంత్రి చంద్రబాబు నాయుడులను కేంద్రం ఆహ్వానించింది. సమావేశానికి వస్తారో లేదో తెలియజేయాలని కేంద్ర మంత్రి ఇద్దరు ముఖ్యమంత్రులను కోరారు.
కాగా, ఏపీ సీఎం జూలై 15, 16 తేదీల్లో ఢిల్లీ పర్యటిస్తున్నారు. ప్రయాణ ప్రణాళిక ప్రకారం, జూలై 16న మధ్యాహ్నం 2.30 గంటలకు ఆయన సి.ఆర్. పాటిల్‌ను కలవనున్నారు.
మరోవంక తెలంగాణ ముఖ్యమంత్రి కార్యాలయం నుండి ఒక ప్రకటన ప్రకారం, ఈ నెల 16న ఢిల్లీలో కేంద్ర జలశక్తి మంత్రితో సమావేశం జరగనుంది, అక్కడ తెలంగాణ తన నీటి వాటాకు సంబంధించి కేంద్రాన్ని గట్టిగా ప్రశ్నించనుంది. అలాగే ఇప్పటికే నిర్మాణంలో ఉన్న ప్రాజెక్టులకు అనుమతులు కోరుతుంది, కేటాయింపుల కోసం ఒత్తిడి తెస్తుంది. కొత్త ప్రాజెక్టులకు అనుమతులు కోరుతుంది.
ఆ ప్రకటన ప్రకారం, కృష్ణ – గోదావరి నదుల నుండి రాష్ట్రానికి రావాల్సిన ప్రతి నీటి చుక్కను గరిష్టంగా ఉపయోగించుకోవాలని, చట్టపరమైన మార్గాల ద్వారా తెలంగాణకు హక్కుగా ఉన్న నదీ జలాలను పొందేందుకు కేంద్ర ప్రభుత్వంపై ఒత్తిడి పెంచాలని రేవంత్ రెడ్డి నిర్ణయించారు.
కృష్ణా నదిపై తెలంగాణలో నిర్మిస్తున్న ప్రాజెక్టులకు వెంటనే అనుమతులు మంజూరు చేయాలని, తెలంగాణకు న్యాయమైన నీటి వాటాను కేటాయించాలని, ఈ ప్రాజెక్టుల నిర్మాణానికి ఆర్థిక సహాయం అందించాలని కేంద్ర ప్రభుత్వాన్ని కోరాలని ఆయన సంకల్పించారు. కృష్ణ, గోదావరి జలాల్లో తెలంగాణ ప్రయోజనాలను కాపాడటంతో పాటు, దీర్ఘకాలిక అన్యాయాలను శాశ్వత పరిష్కారాల ద్వారా పరిష్కరించాలని ముఖ్యమంత్రి ఆదేశించారు.
ముఖ్యమంత్రి సూచనల మేరకు, నీటిపారుదల మంత్రి ఉత్తమ్ కుమార్ రెడ్డి కేంద్ర జలశక్తి మంత్రి సిఆర్ పాటిల్‌కు లేఖ రాశారు…కృష్ణా నదీ జలాల వినియోగంలో తెలంగాణకు దీర్ఘకాలిక అన్యాయం జరిగింది. గత ప్రభుత్వం తెలంగాణకు కేవలం 299 టిఎంసిలను మాత్రమే అంగీకరించింది, ఆంధ్రప్రదేశ్‌కు 512 టిఎంసిలను ఇచ్చింది. శ్రీశైలం ఎగువన ఆంధ్రప్రదేశ్ అక్రమంగా ప్రాజెక్టులు నిర్మిస్తుంటే, ఇష్టానుసారంగా కృష్ణా జలాలను మళ్లించుకుంటూ, తెలంగాణకు దక్కాల్సిన వాటాను ఆక్రమించుకుంటూ ఉండగా అది మౌనంగా ఉండిపోయిందని ఆ ప్రకటనలో పేర్కొంది.
అవిభక్త రాష్ట్రంలో కృష్ణా నదిపై నిర్మించిన నీటిపారుదల ప్రాజెక్టులు సరైన నీటి కేటాయింపులు లేకుండా అసంపూర్తిగా మిగిలిపోయాయి. గోదావరి వైపు, తుమ్మిడిహట్టి సమీపంలో చేపట్టిన ప్రాణహిత-చేవెళ్ల ప్రాజెక్టును రూ. 11,000 కోట్లు ఖర్చు చేసిన తర్వాత పక్కన పెట్టారు. బదులుగా, కాళేశ్వరం ప్రాజెక్టును నిర్మించారు, దీని వలన రూ. లక్ష కోట్లకు పైగా ప్రజా నిధులు దుర్వినియోగం అయ్యాయని ఆ లేఖలో పేర్కొంది.
