న్యూఢిల్లీ: నేడు ఇండియా కూటమిలోని దాదాపు 300 మంది ఎంపీలు…లోక్‌సభలో ప్రతిపక్ష నాయకుడు రాహుల్ గాంధీ నాయకత్వంలో భారత ఎన్నికల కమిషన్ ప్రధాన కార్యాలయ ముట్టడికి సిద్ధమయ్యారు.
పార్లమెంట్ హౌస్ నుండి ఉదయం 11:30 గంటలకు ఈ నిరసన ప్రదర్శన ప్రారంభమైంది. ఈ మార్చ్ ఎన్నికల కమిషన్ కార్యాలయం వరకు దాదాపు ఒక కిలోమీటరు దూరం వరకు సాగనుంది. ఓట్ల చోరీపై ఈసీ విచారణ కోరుతూ, అలాగే బీహార్‌లో ఓటర్ల జాబితాల స్పెషల్ ఇంటెన్సివ్ రివిజన్ (SIR)ని వ్యతిరేకిస్తూ ఈ ప్రదర్శన జరుగుతోంది. ప్రతిపక్ష కూటమికి చెందిన ఇతర సీనియర్ నాయకులు, ఎంపీలు ఈ మార్చ్‌లో రాహుల్ గాంధీతో పాటు పాల్గొంటున్నారు.
అధికార బిజెపి ప్రభుత్వం ఓటర్ల జాబితాను తనకు అనుకూలంగా మార్చుకోవడానికి ప్రయత్నిస్తోందని, తద్వారా ప్రజాస్వామ్య ప్రక్రియను దెబ్బతీస్తుందని ఇండియా కూటమి ఆరోపించింది. ఓటర్ల జాబితాల సమగ్రతను నిర్ధారించేలా ECIపై ఒత్తిడి తీసుకురావడం ఈ నిరసన లక్ష్యం. ఈ ర్యాలీ జరిగిన తర్వాత ఎంపీలకు కాంగ్రెస్ అధ్యక్షుడు మల్లికార్జున్ ఖర్గే డిన్నర్ ఇవ్వనున్నారు.
ఇదిలా ఉండగా… కాంగ్రెస్ “ఓట్ చోరీ” (ఓటు దొంగతనం)కి వ్యతిరేకంగా ప్రజల మద్దతును సమీకరించడానికి ఆన్‌లైన్ ప్రచారాన్ని ప్రారంభించింది.
రాహుల్ గాంధీ తన X హ్యాండిల్‌లో ఒక పోస్ట్‌ను షేర్ చేశారు, పౌరులు కొత్తగా ప్రారంభించిన వెబ్ పోర్టల్ – votechori.in/ecdemand లో నమోదు చేసుకోవాలని లేదా ఈ లక్ష్యానికి మద్దతు ఇవ్వడానికి 9650003420 కు మిస్డ్ కాల్ ఇవ్వాలని కోరారు.
“ఓట్ చోరీ అనేది ‘ఒక మనిషి, ఒక ఓటు’ అనే ప్రాథమిక ఆలోచనపై దాడి. స్వేచ్ఛాయుతమైన, నిష్పాక్షికమైన ఎన్నికలకు క్లీన్ ఓటరు జాబితా తప్పనిసరి. మా డిమాండ్ స్పష్టంగా ఉంది – పారదర్శకంగా ఉండండి, డిజిటల్ ఓటరు జాబితాలను విడుదల చేయండి, తద్వారా ప్రజలు, పార్టీలు వాటిని ఆడిట్ చేయగలవు” అని రాహుల్ గాంధీ X లో రాశారు. “ఈ పోరాటం మన ప్రజాస్వామ్యాన్ని కాపాడటం కోసమే” అని ఆయన అన్నారు.
ఢిల్లీలో ఇండియా కూటమి ఎంపీల నిరసన ప్రదర్శన వీడియో లింక్
