న్యూఢిల్లీ: ఢిల్లీ-ఎన్‌సిఆర్‌లో వీధి కుక్కల “సమస్య”కు స్థానిక అధికారుల అసమర్థతే కారణమని సుప్రీంకోర్టు పేర్కొంది. వారు కుక్కల స్టెరిలైజేషన్, రోగనిరోధకత నియమాలను అమలు చేయడంలో విఫలమయ్యారని తెలిపింది. ప్రభుత్వ అధికారులు సరైన రీతిలో పనిచేయకపోవడం వల్లే సమస్య తీవ్రం అవుతోందని సుప్రీంకోర్టు అభిప్రాయం వ్యక్తం చేసింది.

ఢిల్లీలోని వీధి కుక్కల అంశంపై ప్రభుత్వం, జంతు ప్రేమికుల మధ్య తాజాగా సుప్రీంకోర్టులో వాడీవేడిగా వాదనలు సాగాయి. ఇప్పటికే ఇద్దరు సభ్యుల బెంచ్ ఇచ్చిన తీర్పును త్రిసభ్య ధర్మాసనం విచారణ జరపగా.. తాజాగా తీర్పును రిజర్వ్ చేసింది.

ఇతర ఆదేశాలతో పాటు, వీధి కుక్కలను వీధుల నుండి కుక్కల ఆశ్రయాలకు శాశ్వతంగా మార్చాలని ఆగస్టు 11న ఇద్దరు న్యాయమూర్తుల ధర్మాసనం ఢిల్లీ-ఎన్‌సిఆర్ అధికారులను ఆదేశించింది. దేశ రాజధానిలో ముఖ్యంగా పిల్లలలో రేబిస్‌కు దారితీసే వీధి కుక్కల కాటుపై మీడియా నివేదికపై జూలై 28న ప్రారంభించిన సుమోటో కేసులో ధర్మాసనం చర్య తీసుకుంది.

ఎందుకు చర్య తీసుకోలేదు?
“స్థానిక అధికారుల నిష్క్రియాత్మకత వల్లే ఈ సమస్య అంతా. మీరు పార్లమెంటులో నియమాలను రూపొందిస్తారు. ప్రభుత్వం చర్యలు తీసుకుంటుంది, నియమాలు రూపొందిస్తుంది, కానీ అమలు చేయడం లేదు. దీంతో వీధికుక్కల సమస్య తీవ్రమైందని ధర్మాసనం పేర్కొంది.

“ఒకవైపు ప్రజలు బాధపడుతున్నారు. మరోవైపు జంతు ప్రేమికులు జంతువులను కూడా గౌరవంగా చూడాలని కోరుకుంటున్నారు” అని సుప్రీంకోర్టు తెలిపింది. .

ఢిల్లీ ప్రభుత్వం తరపున హాజరైన సొలిసిటర్ జనరల్ తుషార్ మెహతా డేటాను ప్రస్తావిస్తూ, 2024లో భారతదేశం దాదాపు 37.15 లక్షల కుక్క కాటు కేసులు నమోదయ్యాయని, అంటే రోజుకు దాదాపు 10వేల మంది కుక్కకాటుకు గురవుతున్నారని అన్నారు.

సొలిసిటర్ జనరల్ తుషార్ మెహతా మీడియా నివేదికను కూడా ప్రస్తావించారు. ప్రపంచ ఆరోగ్య సంస్థ, ప్రభుత్వం, ఇతర ప్రామాణిక వనరులను ఉపయోగించి, గత సంవత్సరం 305 కుక్క కాటు సంబంధిత మరణాలు చోటుచేసుకున్నాయని అన్నారు. వీధికుక్కల నియంత్రణకు భారత జంతు సంక్షేమ బోర్డు, స్థానిక అధికారులు, ప్రభుత్వం ఏమీ చేయలేదని ధర్మాసనం గుర్తించింది.

“వాస్తవానికి జంతువులను ఎవరూ ద్వేషించరు. కానీ ఎంతోమంది చిన్నారులు వీధి కుక్కల దాడుల్లో ప్రాణాలు కోల్పోతున్నారు. మాంసాహారం తినేవారు కూడా ఈ రోజుల్లో జంతు ప్రేమికులమని ప్రకటించుకుంటున్నారు” అని ఆయన వ్యాఖ్యానించారు.

మరోవైపు, వీధి కుక్కల తరలింపును వ్యతిరేకిస్తూ సీనియర్ న్యాయవాది కపిల్ సిబల్ తన వాదనలు వినిపించారు. “దేశంలో సరిపడా కుక్కల షెల్టర్లు లేవు. వాటిని ఎక్కడికి తరలిస్తారు? మున్సిపల్ కార్పొరేషన్లు వాటిని నిర్మించగలవా?” అని ఆయన ప్రశ్నించారు. దిల్లీలో కుక్కలను తరలించాలన్న ద్విసభ్య ధర్మాసనం తీర్పుపై స్టే విధించాలని విజ్ఞప్తి చేశారు.

ఇరుపక్షాల వాదనలు విన్న త్రిసభ్య ధర్మాసనం, ఈ అంశంపై తన తీర్పును రిజర్వులో ఉంచింది. అధికారుల వైఫల్యం వల్లే సమస్య జఠిలమైందని స్పష్టం చేసిన నేపథ్యంలో, తుది తీర్పు ఎలా ఉండబోతోందన్న దానిపై సర్వత్రా ఆసక్తి నెలకొంది.