లండన్: బ్రిటన్ తదుపరి ప్రధానిగా 47 ఏళ్ల లిజ్ ట్రస్ ఎంపికయ్యారు. ఆరు వారాల పాటు సాగిన కన్జర్వేటివ్‌ పార్టీ నాయకత్వ పోటీలో.. ట్రస్, భారత సంతతికి చెందిన రిషి సునాక్‌తొ హోరాహోరీ పోరులో విజయం సాధించి కన్జర్వేటివ్‌ పార్టీ నేతగా ఎన్నికయ్యారు. తద్వారా బోరిస్ జాన్సన్ వారసురాలిగా ప్రధాని పదవి చేపట్టనున్నారు. సోమవారం వెల్లడైన ఫలితాల్లో ట్రస్ 81,326 ఓట్లు సాధించారు. రిషికి 60,399 ఓట్లు పోలయ్యాయి. దీంతో బ్రిటన్ ప్రధానిగా బాధ్యతలు చేపడుతున్న మూడో మహిళగా లిజ్ ట్రస్ నిలిచారు. అంతకు ముందు థెరిసా మే, మార్గరేట్ థాచర్‌లు మాత్రమే బ్రిటన్ మహిళా ప్రధానులుగా పనిచేశారు.
ఫలితాల అనంతరం లిజ్ ట్రస్ మాట్లాడుతూ… పార్టీ నేతగా ఎన్నికవడం గొప్ప గౌరవమన్నారు. తనపై నమ్మకముంచినందుకు పార్టీ సభ్యులకు కృతజ్ఞతలు తెలిపారు. ‘మేం చేసి చూపిస్తాం’ అంటూ ప్రతిజ్ఞ బూనారు. ‘‘పన్నులకు కోత విధించి ప్రజలపై భారం తగ్గించి చూపిస్తాం. ఇంధన సంక్షోభాన్ని అధిగమిస్తాం. ఈ కష్టకాలం నుంచి దేశాన్ని గట్టెక్కించడానికి సాహసోపేతమైన చర్యలు చేపడతా. యునైటెడ్‌ కింగ్‌డమ్‌ సామర్థ్యం ఏమిటో ప్రపంచానికి మరోసారి చూపిద్దాం’’ అంటూ అనంతరం ట్వీట్‌ చేశారు.
I am honoured to be elected Leader of the Conservative Party.
Thank you for putting your trust in me to lead and deliver for our great country.
I will take bold action to get all of us through these tough times, grow our economy, and unleash the United Kingdom’s potential. pic.twitter.com/xCGGTJzjqb
— Liz Truss (@trussliz) September 5, 2022
బ్రిటన్ ప్రధానిగా ఎన్నికైన లిజ్ ట్రస్‌ను.. రిషి సునాక్‌ కూడా అభినందనలు చెబుతూ ట్వీట్‌ చేశారు. ‘‘కొత్త ప్రధానితో కలిసి పనిచేస్తా. కన్జర్వేటివ్‌ పార్టీ ఓ కుటుంబం లాంటిది. దేశం క్లిష్ట పరిస్థితుల్లో ఉన్న ప్రస్తుత తరుణంలో ట్రస్‌కు అండగా నిలుద్దాం’’ అని ఆయన వ్యాఖ్యానించారు.
ఇదిలా ఉండగా బ్రిటన్ నూతన ప్రధానిగా ఎన్నికైన లిజ్ ట్రస్ తన క్యాబినెట్‌లో (Liz Truss Cabinet) ఎవరెవరు ఉండాలనేది ఇప్పటికే నిర్ణయించారు. అయితే.. ట్రస్ మంత్రివర్గంలో రుషి సునాక్‌కు చోటు అనుమానమేనని తెలుస్తోంది. ప్రస్తుతం వాణిజ్య, విద్యుత్ సెక్రెటరీగా ఉన్న కవాసీ క్వర్టెంగ్‌కు ఆర్థిక శాఖ, జాన్సన్ క్యాబినెట్‌లో విద్యాశాఖను నిర్వహించిన జేమ్స్ క్లావెర్లీకి విదేశాంగ శాఖ, ప్రభుత్వ అటార్నీ జనరల్ సుయెల్లా బ్రావెర్‌మన్ అంతర్గత వ్యవహారాలు, ప్రస్తుతం రక్షణ శాఖ మంత్రి బెన్ వాల్లెస్‌‌కు అదే బాధ్యతలు అప్పగిస్తారని విశ్వసనీయ వర్గాలు తెలిపాయి. మాజీ విద్యా మంత్రి నధీమ్ జహ్వీకి క్యాబినెట్ కార్యాలయ మంత్రి, థెరిసే కాఫీని ఆరోగ్య మంత్రిగా, వాణిజ్య మంత్రిగా జాకబ్ రీస్ మోగ్‌లకు అవకాశం దక్కుతుందని పేర్కొన్నాయి.
- లిజ్ ట్రస్ 1975లో ఆక్స్‌ఫర్డ్‌లో జన్మించారు. ఆమె ఆక్స్‌ఫర్డ్ విశ్వవిద్యాలయంలో చదువుకున్నారు. అక్కడ ఆమె తత్వశాస్త్రం, రాజకీయాలు, ఆర్థిక శాస్త్రాలను అభ్యసించారు, విద్యార్థి రాజకీయాల్లో చురుకుగా ఉన్నారు.
- ట్రస్ సౌత్ వెస్ట్ నార్ఫోక్ నుండి 2010 నుంచి ఎంపీగా ఉన్నారు. ఆమె ప్రధానమంత్రులు డేవిడ్ కామెరూన్, థెరిసా మే, బోరిస్ జాన్సన్ ఆధ్వర్యంలో వివిధ క్యాబినెట్ స్థానాల్లో పనిచేశారు.
- థెరిసా మే కేబినెట్‌లో లిజ్ ట్రస్ ట్రెజరీకి ప్రధాన కార్యదర్శి కాకముందు న్యాయ కార్యదర్శిగా పనిచేశారు.
- బోరిస్ జాన్సన్ ఆధ్వర్యంలో, లిజ్ ట్రస్ 2019లో అంతర్జాతీయ వాణిజ్య కార్యదర్శిగా ఉన్నారు. ఆమె 2021లో విదేశాంగ కార్యదర్శిగా బాధ్యతలు చేపట్టారు.
- ప్రధాని బోరిస్ జాన్సన్ స్థానంలో లిజ్ ట్రస్, 2015 ఎన్నికల తర్వాత కన్జర్వేటివ్స్ యొక్క నాల్గవ ప్రధానమంత్రి అయ్యారు.
- లిజ్ ట్రస్ బ్రిటన్ యొక్క జీవన వ్యయ సంక్షోభాన్ని పరిష్కరించడానికి త్వరగా చర్య తీసుకుంటానని వాగ్దానం చేసింది, పెరుగుతున్న ఇంధన బిల్లులను పరిష్కరించడానికి, భవిష్యత్తులో ఇంధన సరఫరాలను భద్రపరచడానికి ఒక వారంలో తాను ఒక ప్రణాళికతో వస్తానని చెప్పింది.