పాట్నా: బీహార్‌లో 1,300 కిలోమీటర్లపాటు సాగిన “ఓటర్ అధికార్ యాత్ర” ముగింపు సభలో రాహుల్ గాంధీ ప్రధాని మోదీపై మాటల దాడి చేశారు. బీజేపీ ఓట్‌ చోరీ చేసిందని పునరుద్థాటించారు. త్వరలోనే మోడీ బండారం బయటపెడతానని ప్రతిజ్ఞ చేశారు.
దేశంలో జరుగుతున్న ఓట్ల చోరీపై ఇప్పటికే అణుబాంబు పేల్చానని, త్వరలో హైడ్రోజన్ బాంబు పేలుస్తానని పేర్కొన్నారు. ఓట్ల దొంగతనంపై కాంగ్రెస్ పార్టీ మరిన్ని నిజాలు బయటపెట్టిన తర్వాత ప్రధాని నరేంద్ర మోదీ దేశ ప్రజలకు ముఖం చూపించలేని పరిస్థితి వస్తుందని, ఆయన తలెత్తుకోలేరని చెప్పారు.
మహారాష్ట్ర అసెంబ్లీ ఎన్నికల్లో మరియు కర్ణాటకలోని మహాదేవపుర నియోజకవర్గంలో బిజెపి ఓట్లను దొంగిలించిందని ఆయన ఆరోపించారు. బెంగళూరు సెంట్రల్‌ నియోజకవర్గం 2024 లోక్‌సభ ఎన్నికల్లో “భారీగా ఓట్ల చోరీ” జరిగిందని ఆరోపించారు, అక్కడ 1,00,250 నకిలీ ఓట్లు ఉన్నాయని, బిజెపి 32,707 ఓట్ల తేడాతో విజయం సాధించిందని పేర్కొన్నారు.
ఆగస్టు 17న ససారాం నుండి ప్రారంభించిన ఓటర్ అధికార్ యాత్ర, బీహార్‌లోని 25 జిల్లాల్లోని 110 అసెంబ్లీ నియోజకవర్గాలను కవర్ చేసింది, స్పెషల్ ఇంటెన్సివ్ రివిజన్ (SIR) ప్రజల ఓటు హక్కులను దెబ్బతీస్తున్నాయని కాంగ్రెస్, ఇండియా కూటమి పేర్కొన్నాయి. “ఓటు చోరీ” ప్రజాస్వామ్యం, ఉపాధి, రేషన్ కార్డులు వంటి హక్కులను హరిస్తుందని రాహుల్ గాంధీ హెచ్చరించారు.
ఓట్ల చోరీని ఎట్టిపరిస్థితుల్లోనూ అంగీకరించబోమని విప్లవాత్మక రాష్ట్రమైన బిహార్ యావత్ దేశానికి స్పష్టమైన సందేశం ఇచ్చిందని వెల్లడించారు. మహాత్మాగాందీని హత్య చేసిన దుష్ట శక్తులే నేడు రాజ్యాంగాన్ని హత్య చేయడానికి కుట్రలు సాగిస్తున్నాయని మండిపడ్డారు. రాజ్యాంగం జోలికి వస్తే సహించబోమని బీజేపీని హెచ్చరించారు. రాజ్యాంగాన్ని, ఓటు హక్కును రక్షించడానికే యాత్ర చేపట్టానని, ప్రజల నుంచి అద్భుతమైన స్పందన వచ్చిందని, ఓటు చోర్, గద్దీ చోడ్ అంటూ వారు ముక్తకంఠంతో నినదించారని అన్నారు.
డాక్ బంగ్లా క్రాసింగ్ వద్ద పోలీసులు మధ్యలో నిలిపివేసిన ఈ మార్చ్‌లో గాంధీతో పాటు కాంగ్రెస్ అధ్యక్షుడు మల్లికార్జున్ ఖర్గే, జార్ఖండ్ సీఎం హేమంత్ సోరెన్, ఆర్జేడీకి చెందిన తేజస్వి యాదవ్, సీపీఐ(ఎంఎల్)కి చెందిన దీపాంకర్ భట్టాచార్య, టీఎంసీకి చెందిన యూసుఫ్ పఠాన్ వంటి ఇతర ఇండియా బ్లాక్ నాయకులు పాల్గొన్నారు.
మోడీ, బీహార్ సీఎం నితీష్ కుమార్ ప్రజాస్వామ్య విలువలకు ద్రోహం చేశారని, బీజేపీ-ఆర్‌ఎస్‌ఎస్ కోసం నితీష్ సోషలిజాన్ని విడిచిపెట్టారని ఖర్గే ఆరోపించారు. ఎన్డీఏ “విభజించి పాలించు” వ్యూహాలను, ప్రతిపక్ష నాయకులపై ED, CBI వంటి ఏజెన్సీలను ఉపయోగించడాన్ని సోరెన్ విమర్శించారు. గుజరాత్‌కు అనుకూలంగా ఉంటూనే మోడీ… బీహార్ ప్రజలను మోసం చేస్తున్నారని తేజస్వి యాదవ్ ఆరోపించారు.
రాబోయే బీహార్ ఎన్నికల్లో రాజ్యాంగాన్ని పరిరక్షిస్తామని, ఓట్ల దొంగతనాన్ని నివారిస్తామని నాయకులు ప్రతిజ్ఞ చేశారు, “డబుల్ ఇంజన్‌” బిజెపి నేతృత్వంలోని ప్రభుత్వం పతనమవుతుందని అంచనా వేశారు. యాత్రను చారిత్రాత్మకంగా మార్చినందుకు, ప్రజాస్వామ్యాన్ని కాపాడతామని మరియు ఏ ఓటు దొంగిలించబడకుండా చూసుకోవాలని ప్రతిజ్ఞ చేసినందుకు మిత్రపక్షాలకు, బీహార్ యువతకు రాహుల్ గాంధీ కృతజ్ఞతలు తెలిపారు.
