న్యూఢిల్లీ: అధికారిక కార్యక్రమాల్లో, పాఠశాలల్లో జాతీయ గీతం జనగణమనకు ముందు వందేమాతరంలోని అన్ని శ్లోకాలను పఠించడం తప్పనిసరి చేస్తూ కేంద్ర ప్రభుత్వం ఇటీవల జారీ చేసిన నోటిఫికేషన్ను ఆల్ ఇండియా ముస్లిం పర్సనల్ లా బోర్డు (AIMPLB) తీవ్రంగా వ్యతిరేకించింది. ఈ నిర్ణయ రాజ్యాంగ విరుద్ధమని బోర్డు పేర్కొంది.
ఈ మేరకు బోర్డు ప్రధాన కార్యదర్శి మౌలానా మొహమ్మద్ ఫజ్లూర్ రహీం ప్రభుత్వ నిర్ణయాన్ని ఒక పత్రికా ప్రకటనలో తీవ్రంగా వ్యతిరేకించారు. ఇది రాజ్యాంగ విరుద్ధమని, మత స్వేచ్ఛ, లౌకిక విలువలకు విరుద్ధమని, సుప్రీంకోర్టు తీర్పుకు విరుద్ధమని, ముస్లింల మత విశ్వాసాలకు ప్రత్యక్షంగా విరుద్ధంగా ఉందని అన్నారు. అందువల్ల ఈ నిర్ణయం ముస్లింలకు పూర్తిగా ఆమోదయోగ్యం కాదని ఆయన పేర్కొన్నారు.
రవీంద్రనాథ్ ఠాగూర్ సలహా, రాజ్యాంగ సభలో చర్చలను అనుసరించి, వందేమాతరం మొదటి రెండు చరణాలను మాత్రమే ఉపయోగించాలని అంగీకరించారని మౌలానా పేర్కొన్నారు. ఒక లౌకిక ప్రభుత్వం ఒక మతం నమ్మకాలను లేదా బోధనలను ఇతర మతాల అనుచరులపై బలవంతంగా రుద్దకూడదని ఆయన అన్నారు. ఈ పాట బెంగాల్ నేపథ్యంలో రాశారని, దుర్గ సహా ఇతర దేవతల ఆరాధన, పూజకు సంబంధించిన సూచనలను కలిగి ఉందని ఆయన అన్నారు.
పశ్చిమ బెంగాల్ ఎన్నికలకు ముందు ఈ నిర్ణయాన్ని అమలు చేయడం వెనుక ఉన్న రాజకీయ పరిగణనలు ఏమైనప్పటికీ, ముస్లింలు దీనిని అంగీకరించలేరు, ఎందుకంటే ఇది వారి విశ్వాసంతో నేరుగా విభేదిస్తుంది. ఒక ముస్లిం ఒకే దేవుడైన అల్లాను మాత్రమే ఆరాధిస్తాడు. ఇస్లాంలో దైవానికి సహవర్తులను కల్పించడు. అలా చేయడానికి ఇస్లాం ఏ విధమైన అనుమతిని ఇవ్వదు.
వందేమాతరంలోని ఇతర శ్లోకాలు లౌకిక విలువలకు విరుద్ధంగా ఉన్నాయని, మొదటి రెండు చరణాలకే పరిమితం చేశారని, ఈ మేరకు భారతీయ కోర్టులు కూడా తీర్పు ఇచ్చాయని బోర్డు నాయకుడు పేర్కొన్నారు. అందువల్ల, కేంద్ర ప్రభుత్వం వెంటనే నోటిఫికేషన్ను ఉపసంహరించుకోవాలని బోర్డు డిమాండ్ చేసింది. లేకుంటే ముస్లిం పర్సనల్ లా బోర్డు దానిని కోర్టులో సవాలు చేస్తుందని ఆయన తెలిపారు.
