న్యూఢిల్లీ: ‘ఛాత్రోన్ కీ గూంజ్’ కార్యక్రమంలో భాగంగా… విద్యార్థులతో తన రెండవ సమావేశానికి ముందు, లోక్‌సభ ప్రతిపక్ష నాయకుడు రాహుల్ గాంధీ భారతదేశ విద్యా వ్యవస్థను ‘అవినీతిపూరిత దోపిడీ యంత్రాంగం’గా అభివర్ణించారు. ఈ వ్యవస్థ అవినీతికి ఆజ్యం పోస్తూ, విద్యార్థులను అప్పులు, ఒత్తిడి, నిరాశలతో భారంగా మారుస్తోందని ఆయన ఆరోపించారు.

విద్యా, ఎన్నికల వ్యవస్థలలో జరుగుతున్న అవినీతి ఆరోపణలపై మోదీ ప్రభుత్వం, కేంద్ర విద్యాశాఖ మంత్రి ధర్మేంద్ర ప్రధాన్ మౌనం వహిస్తున్నారని, వారు ‘జవాబుదారీతనం నుంచి ముఖం తిప్పుకున్నారని’ రాహుల్‌ ఆరోపించారు.

‘అవినీతి, అన్యాయం, పక్షపాతం, నిజాయితీ లేకపోవడం — ఈ నాలుగు పదాలు నావి కావు, భారతదేశ విద్యా వ్యవస్థకు ఈ రోజు దేశ విద్యార్థులు వాడుతున్న పదాలు ఇవి. నిజం ఏమిటంటే — భారతదేశ విద్యా వ్యవస్థ ఇప్పుడు ఒక అవినీతిపూరిత దోపిడీ యంత్రాంగంగా మారిందని రాహుల్‌ గాంధీ ఎక్స్‌లో పేర్కొన్నారు.’

యువతను భవిష్యత్తుకు సిద్ధం చేయడానికి ఉద్దేశించిన వ్యవస్థ, దానికి బదులుగా విద్యార్థులను, వారి కుటుంబాలను అప్పులు, ఆందోళన, నిరాశలోకి నెడుతోందని ఆయన ఆరోపించారు.

‘ఈ అవినీతే పేపర్ లీక్ మాఫియాకు జన్మనిచ్చింది. ఇది లక్షలాది మంది విద్యార్థులు సంవత్సరాల తరబడి పడిన కష్టాన్ని ఒక్క దెబ్బతో దోచుకుంటుంది. ఇక్కడ, దోషులైన విక్రేతలు, అధికారులు టెండర్లు, పదోన్నతులు పొందుతారు. భగ్నమైన కలలతో ఒంటరిగా మిగిలిపోయిన విద్యార్థులకు మాత్రం శిక్ష పడుతుందని ‘రాహుల్‌ గాంధీ అన్నారు.

పదేపదే అవినీతి జరుగుతున్నప్పటికీ, కేంద్రం చర్యలు తీసుకోవడంలో విఫలమైందని కూడా ఆయన ఆరోపించారు. ‘మోదీ ప్రభుత్వం, విద్యాశాఖ మంత్రి ఇదంతా చూస్తూనే ఉన్నారు. కానీ వారు జవాబుదారీతనం నుండి ముఖం తిప్పుకుంటూ మౌనాన్ని ఎంచుకున్నారు. మరి మీడియా? కేవలం సుదీర్ఘ నిశ్శబ్దం. ఇక చాలు – విద్యారంగంలో విప్లవానికి ఇదే సమయం,’ అని ఆయన అన్నారు.

‘ఛాత్రోన్ కీ గూంజ్’ ప్రచార కార్యక్రమం తదుపరి విడత కోసం జూలై 17న డెహ్రాడూన్‌లో తనతో చేరవలసిందిగా గాంధీ విద్యార్థులను ఆహ్వానించారు. కాగా,
కాంగ్రెస్ నాయకుడు జూన్ 17న రాజస్థాన్‌లోని కోటాలో ఒక ర్యాలీతో ఈ కార్యక్రమాన్ని ప్రారంభించారు. ఇతర నగరాల్లో కూడా విద్యార్థులతో ఇలాంటి సమావేశాలు నిర్వహించనున్నారు.

కోటాలో జరిగిన ఓ కార్యక్రమంలో రాహుల్‌ గాంధీ మాట్లాడుతూ…భారతదేశ విద్యా వ్యవస్థ ప్రతిభ ఆధారితమైనది కాదని, అది ఒక ‘తిరస్కరణ వ్యవస్థ’ అని అభివర్ణించారు. ఇది విద్యార్థులు, మధ్యతరగతి కుటుంబాలపై అధిక ఆర్థిక భారాన్ని, తీవ్రమైన ఒత్తిడిని మోపుతుందని ఆయన ఆరోపించారు.

ప్రస్తుత విద్యా వ్యవస్థ “అత్యంత ఒత్తిడితో కూడుకున్నది, అన్యాయమైనది” అని పేర్కొంటూ, ఆయన ఇలా అన్నారు, “భారతదేశ విద్యా వ్యవస్థ ఒక దోపిడీ యంత్రం. మీరు పెద్ద కలలు కనడానికి వీలు కల్పించే వ్యవస్థ మాకు కావాలి.”

కోటాలో విద్యార్థులతో జరిపిన సంభాషణలో… పేపర్ లీక్‌లు, నిరుద్యోగం గురించి కూడా రాహుల్‌గాంధీ మాట్లాడారు. విద్యా వ్యవస్థ యువతపై తీవ్రమైన ఒత్తిడిని పెంచి, వారి ఆశయాలను అణచివేస్తుందని ఆయన ఆరోపించారు.