న్యూఢిల్లీ: కాంగ్రెస్ అగ్రనేత రాహుల్ గాంధీ ఆర్ఎస్ఎస్‌పై విరుచుకుపడ్డారు. మహిళలు పురుషుల ఆస్తి అని నమ్మే ఆర్ఎస్ఎస్, కేవలం పురుషులతో కూడిన ‘రాజ్యాంగ వ్యతిరేక సంస్థ’ అని ఆయన ఆరోపించారు. తాను శివ-శక్తిని నమ్ముతానని, అందుకే ఆర్ఎస్ఎస్‌తో పోరాడటం తనకు ఎంతో ఆనందాన్ని ఇస్తుందని కూడా అన్నారు.
“అందుకే వారితో పోరాడటం నాకు ఎంతో ఆనందాన్ని ఇస్తుంది. అందమైన విషయం ఏమిటంటే, వారి ‘సొంత’ మహిళల్లో చాలామంది నా పక్షాన ఉన్నారు,” అని మాజీ కాంగ్రెస్ అధినేత అన్నారు. రాష్ట్రీయ స్వయంసేవక్ సంఘ్ (ఆర్ఎస్ఎస్) వ్యవస్థాపక దినోత్సవం సందర్భంగా రాహుల్ గాంధీ ఈ వ్యాఖ్యలు చేశారు.
ఆర్ఎస్ఎస్ చీఫ్ మోహన్ భగవత్‌పైనా రాహుల్ గాంధీ తరచుగా వ్యంగ్యాస్త్రాలు సంధిస్తున్నారు. ప్రస్తుత రాజకీయ పరిణామాల్లో మోహన్ భగవత్‌ను విలన్‌గా అభివర్ణిస్తూ నిరసనలు తమ ఉద్యమాన్ని కొనసాగించాలని పిలుపునిచ్చారు. ప్రధాని నరేంద్ర మోదీ, కేంద్ర హోం మంత్రి అమిత్ షా, ఆర్ఎస్ఎస్ చీఫ్ మోహన్ భగవత్, జాతీయ భద్రతా సలహాదారు అజిత్ డోభాల్, ప్రధాన ఎన్నికల కమిషనర్ జ్ఞానేశ్ కుమార్‌లను ఈ కథలో విలన్లుగా పేర్కొంటూ, వారిపై రాజకీయ ఒత్తిడి పెరుగుతోందని రాహుల్ వ్యాఖ్యానించారు. అధికారుల్ని ఉద్దేశించి ‘మమ్మల్ని అందరినీ అరెస్ట్ చేయండి.’ అంటూ సవాల్ విసిరారు. రాజ్యాంగాన్ని రక్షించడానికి తమ పోరాటం కొనసాగుతోందని, నిరసనల నుంచి వెనక్కి తగ్గబోమని అన్నారు.
కాగా, నాగ్‌పూర్‌లో జరిగిన తన ‘విజయదశమి’ ప్రసంగంలో ఆర్ఎస్ఎస్ అధిపతి భగవత్ మాట్లాడుతూ, ప్రభుత్వ మార్పు ఆందోళనలు మౌలిక సమస్యలను పరిష్కరించలేవని, నిరసనలు పరిష్కారాలను అందించడానికి బదులుగా రాజకీయ ప్రయోజనాలకు సాధనాలుగా మారి సమాజంలో విభజనలను మరింత పెంచుతాయని హెచ్చరించారు.
