వాషింగ్టన్: ప్రఖ్యాత విదేశాంగ విధాన నిపుణుడు, భారత సంతతికి చెందిన రక్షణ వ్యూహకర్త ఆష్లే జె టెల్లిస్ను అమెరికా అధికారులు అరెస్టు చేసారు. జాతీయ భద్రతకు సంబంధించిన అత్యంత రహస్య పత్రాలను చట్టవిరుద్ధంగా తన వద్ద ఉంచుకున్నారనే తీవ్రమైన ఆరోపణలపై ఆయనను అదుపులోకి తీసుకున్నట్లు వర్జీనియా ఈస్టర్న్ డిస్ట్రిక్ట్ యూఎస్ అటార్నీ కార్యాలయం వెల్లడించింది.
కాగా, 64 ఏళ్ల టెల్లిస్ కార్నెగీ ఎండోమెంట్ ఫర్ ఇంటర్నేషనల్ పీస్లో సీనియర్ ఫెలోగా పనిచేస్తున్నారు. అంతేకాదు టాటా చైర్ ఫర్ స్ట్రాటజిక్ అఫైర్స్గా కూడా వ్యవహరిస్తున్నారు. ప్రభుత్వ రహస్య పత్రాల నిర్వహణపై ఫెడరల్ దర్యాప్తు జరిపిన అనంతరం, గత వారాంతంలో టెల్లిస్ను అరెస్ట్ చేసినట్లు అధికారులు తెలిపారు. రక్షణ సంబంధిత పత్రాలను అనధికారికంగా కలిగి ఉండటాన్ని నిషేధించే 18 యూఎస్సీ 793(e) చట్టాన్ని ఆయన ఉల్లంఘించారని ప్రాసిక్యూటర్లు అభియోగాలు మోపారు.
దేశ రక్షణకు సంబంధించిన రహస్య సమాచారాన్ని చట్ట విరుద్ధంగా కలిగి ఉండటంతో పాటు, చైనా అధికారులతో ఆయన రహస్య సమావేశాలు జరిపారని ఆరోపణలు ఉన్నాయి. ఈ వ్యవహారం అమెరికా భద్రతకు పెను ముప్పు తెచ్చిందని US న్యాయవాది లిండ్సే హాలిగన్ ఒక పత్రికా ప్రకటనలో అభియోగాలను ప్రకటించారు.
ఈకేసులో టెల్లీస్ దోషిగా తేలితే, టెల్లిస్ 10 సంవత్సరాల వరకు జైలు శిక్ష, $250,000 జరిమానా, సంబంధిత సామాగ్రిని స్వాధీనం చేసుకునే అవకాశం ఉంది. ఈ ఫిర్యాదు ఒక ఆరోపణ అని, దోషి అని నిరూపించే వరకు టెల్లిస్ను నిర్దోషిగా భావిస్తామని ప్రభుత్వం నొక్కి చెప్పింది.
యాష్లే జె టెల్లిస్ ఎవరు?
ప్రముఖ విద్యావేత్త, విదేశాంగ విధాన సాధకుడు, టెల్లిస్ చాలా కాలంగా దక్షిణాసియా భద్రత, యుఎస్-ఇండియా సంబంధాలపై వాషింగ్టన్కు చెందిన అగ్రశ్రేణి నిపుణులలో ఒకరిగా పరిగణించబడుతున్నారు. అతను యుఎస్ ప్రభుత్వంలో అనేక ప్రభావవంతమైన పాత్రలలో పనిచేశాడు, రాజకీయ వ్యవహారాల అండర్ సెక్రటరీ ఆఫ్ స్టేట్కు సీనియర్ సలహాదారుగా కూడా పనిచేశాడు. అక్కడ అతను యుఎస్-ఇండియా పౌర అణు ఒప్పందంపై చర్చలు జరపడంలో కీలక పాత్ర పోషించాడు.
అతను జాతీయ భద్రతా మండలిలో అధ్యక్షుడు జార్జ్ డబ్ల్యూ. బుష్కు ప్రత్యేక సహాయకుడిగా, వ్యూహాత్మక ప్రణాళిక, నైరుతి ఆసియాకు సీనియర్ డైరెక్టర్గా కూడా పనిచేశాడు.
టెల్లీస్ ప్రభుత్వ ఉద్యోగిగా చేరక ముందు, RAND కార్పొరేషన్లో సీనియర్ విధాన విశ్లేషకుడు, ప్రొఫెసర్గా పనిచేశాడు. న్యూక్లియర్ ట్రాన్సిషన్స్ ఇన్ సదరన్ ఆసియా, రివైజింగ్ యుఎస్ గ్రాండ్ స్ట్రాటజీ టువార్డ్ చైనా వంటి పుస్తకాలను రాసాడు. ఆయన కౌన్సిల్ ఆన్ ఫారిన్ రిలేషన్స్, ఇంటర్నేషనల్ ఇన్స్టిట్యూట్ ఫర్ స్ట్రాటజిక్ స్టడీస్, ఇతర ప్రొఫెషనల్ సంస్థలలో సభ్యుడు.
US మీడియాలో వచ్చిన నివేదికల ప్రకారం… ప్రొఫెషనల్, అకడమిక్ ఎక్స్ఛేంజ్ల సమయంలో టెల్లిస్ చైనా అధికారులతో జరిపిన సంభాషణలను కూడా పరిశోధకులు పరిశీలిస్తున్నారు. ఈ దశలో గూఢచర్యం జరిగిందనే సూచన లేనప్పటికీ, అతను రహస్య పత్రాలను తన వద్ద ఉంచుకోవడం ఫెడరల్ భద్రతా ప్రోటోకాల్లను ఉల్లంఘించిందని ప్రాసిక్యూటర్లు వాదిస్తున్నారు. కేసు కొనసాగుతున్నందున ఈ వారం చివరిలో ఫెడరల్ న్యాయమూర్తి బాండ్ షరతులను నిర్ణయిస్తారు.
