హైదరాబాద్: ఫీజు బకాయిల కోసం ప్రైవేటు కాలేజీలు ప్రభుత్వంపై ప్రత్యక్షపోరు నడుం బిగించాయి. ఈ మేరకు తెలంగాణ ఉన్నత సంస్థల సంఘాల సమాఖ్య (FATHI) ఆధ్వర్యంలో తెలంగాణలోని ప్రైవేట్ ప్రొఫెషనల్ కళాశాలలు ‘చలో సెక్రటేరియట్’ ర్యాలీని ప్రకటించాయి. పెండింగ్లో ఉన్న ఫీజు రీయింబర్స్మెంట్లకు వ్యతిరేకంగా నిరసనలు కొనసాగుతున్నాయి.
దీపావళికి ముందు పెండింగ్లో ఉన్న రూ.1,200 కోట్లు విడుదల చేస్తామని రాష్ట్ర ప్రభుత్వం హామీ ఇచ్చింది, అయితే ఇప్పటివరకు రూ.300 కోట్లు మాత్రమే చెల్లించింది.
ది న్యూ ఇండియన్ ఎక్స్ప్రెస్ నివేదిక ప్రకారం…ప్రభుత్వం అదనపు డైరెక్టర్ జనరల్ (ఇంటెలిజెన్స్) విజయ్ కుమార్ ద్వారా చర్చలు ప్రారంభించి అదనంగా రూ.300 కోట్లు విడుదల చేయడానికి ముందుకొచ్చింది; అయితే, కళాశాల యాజమాన్యాలు నిరాకరించి రూ.500 కోట్లు వెంటనే విడుదల చేయాలని డిమాండ్ చేశాయి. అంటే పెండింగ్లో ఉన్న రూ.900 కోట్లలో దాదాపు 50 శాతం.
ఇప్పటికే తెలంగాణలోని ప్రైవేట్ కళాశాలలు నవంబర్ 3 నుండి నిరవధిక సమ్మెను ప్రారంభించాయి. నవంబర్ 8న ప్రైవేట్ కళాశాలల నుండి లక్ష మంది ఉపాధ్యాయులతో బహిరంగ సభకు పిలుపునిచ్చాయని నివేదిక పేర్కొంది.
మరోవైపు రాష్ట్ర ప్రభుత్వం అధికారికంగా ప్రైవేట్ కళాశాలల్లో ఫీజు రీయింబర్స్మెంట్ కోసం ఆర్థిక సహాయం కోసం తెలంగాణ ఉన్నత సంస్థల సంఘాల సమాఖ్య (FATHI)తో ఒక కమిటీని ఏర్పాటు చేసింది. ఉప ముఖ్యమంత్రి మల్లు భట్టి విక్రమార్క, FATHI ప్రతినిధులతో ప్రజా భవన్లో వివరణాత్మక చర్చల తర్వాత, ప్రభుత్వం ఈ కమిటీని ఏర్పాటు చేసింది.
కమిటీ ఒక ప్రత్యేక ట్రస్ట్ బ్యాంక్ను ఏర్పాటు చేయడం ద్వారా ఫీజు రీయింబర్స్మెంట్ పథకం ఆర్థికంగా స్వతంత్రంగా, స్థిరంగా మారగలదా అని అధ్యయనం చేస్తుంది. ఉన్నత విద్యా వ్యవస్థను మెరుగుపరచడానికి సూచనలు ఇస్తుంది.
తదుపరి అవసరమైన చర్యలు తీసుకోవడానికి సూచనలు, ప్రతిపాదనలను పరిశీలించి మూడు నెలల వ్యవధిలో నివేదికను సమర్పించాలని కమిటీని కోరారు.
