టెన్త్ పరీక్షల షెడ్యూల్పై ఎస్.ఐ.ఓ ఆందోళన
పదో తరగతి.. విద్యార్థి జీవితంలోనే కీలకమైన మలుపు. ఈ పరీక్షలంటేనే భయపడే విద్యార్థులకు, ఇప్పుడు వారిని మరింత టెన్షన్కు గురిచేస్తోంది మార్చి 2026 పరీక్షల షెడ్యూల్. దాదాపు నెల రోజుల పాటు సాగేలా ఉన్న ఈ సుదీర్ఘ కాలపరిమితి విద్యార్థుల మెదడుకు పరీక్ష పెడుతోందని ‘స్టూడెంట్ ఇస్లామిక్ ఆర్గనైజేషన్’ (SIO) గళమెత్తింది. చదువు కంటే విసుగే ఎక్కువ!సాధారణంగా పరీక్షల మధ్య ఒకటి లేదా రెండు రోజులు సెలవు ఉంటే బాగుంటుంది. కానీ, అది మరీ ఎక్కువైతేనే అసలు సమస్య మొదలవుతుంది.
• ఏకాగ్రత దెబ్బతింటుంది: ఒక పరీక్ష ముగిశాక మరో పరీక్షకు చాలా రోజుల విరామం ఉంటే, చదువుపై ఉన్న పట్టు సడలిపోయే ప్రమాదం ఉంది.
• మానసిక ఒత్తిడి: “మళ్ళీ అదే సబ్జెక్ట్.. మళ్ళీ అదే రివిజన్” అంటూ విద్యార్థులు విసుగు చెందుతారు. ఇది వారిలో ఆత్మవిశ్వాసాన్ని తగ్గించి, అనవసరపు ఆందోళనను పెంచుతుంది. దూరంగా ఉండలేక.. భారం మోయలేక..ముఖ్యంగా హాస్టళ్లు, రెసిడెన్షియల్ స్కూల్స్ (గురుకులాలు)లో ఉండి చదువుకునే పిల్లల పరిస్థితి మరింత ఇబ్బందికరంగా మారుతుంది. పరీక్షల పేరుతో నెలల తరబడి కుటుంబానికి దూరంగా ఉండటం వారిని మానసికంగా కృంగదీస్తుంది. మరోవైపు, పరీక్షలు నిర్వహించే టీచర్లు, పాఠశాల సిబ్బంది కూడా ఇంత సుదీర్ఘమైన డ్యూటీలు చేయడం భారంగా మారుతోందని ఎస్.ఐ.ఓ తెలంగాణ అభిప్రాయపడింది. “పరీక్షలు పారదర్శకంగా జరగడం ఎంత ముఖ్యమో.. విద్యార్థుల మానసిక ఆరోగ్యం కూడా అంతే ముఖ్యం.
గతంలో లాగే కేవలం 16 నుంచి 17 రోజుల్లో పరీక్షలు పూర్తి చేసేలా షెడ్యూల్ మార్చాలి.” — ఎస్.ఐ.ఓ ప్రతినిధి బృందం (విద్యాశాఖ అధికారులకు ఇచ్చిన వినతిపత్రంలో) ప్రభుత్వం స్పందిస్తుందా? తొలిసారి బోర్డు పరీక్షలు రాసే చిన్నపిల్లలపై ఇంతటి మానసిక భారం వేయడం సరైనది కాదని విద్యార్థి సంఘాలు, తల్లిదండ్రులు కోరుతున్నారు. విద్యాశాఖ ప్రిన్సిపల్ సెక్రటరీ డాక్టర్ యోగితా రాణాకు అందిన ఈ విన్నపంపై అధికారులు ఎలాంటి నిర్ణయం తీసుకుంటారో వేచి చూడాలి.
ముహమ్మద్ ముజాహిద్, 9640622076
