ఢాకా: బంగ్లాదేశ్ పదవీచ్యుత ప్రధానమంత్రి షేక్ హసీనాను ఓ బహిరంగ సభలో ప్రసంగించడానికి భారత్ అనుమతించడంపై బంగ్లాదేశ్ మండిపడింది. ఆమె వ్యాఖ్యలు దేశ రాజకీయాలను ప్రభావితం చేస్తాయని పేర్కొంది. అంతేకాదు బంగ్లా తాత్కాలిక ప్రభుత్వంపై హసీనా రాజకీయ వ్యాఖ్యలు చేయడం పట్ల తాము “ఆశ్చర్యపోయామని” “దిగ్భ్రాంతికి గురయ్యామని” ఢాకాలోని బీఎస్ఎస్ వార్తా సంస్థ పేర్కొంది. “ఈ ఘటన బంగ్లాదేశ్ ప్రజాస్వామ్య పరివర్తనకు శాంతి భద్రతలకు స్పష్టంగా ప్రమాదం కలిగిస్తుందని” బంగ్లా విదేశాంగ మంత్రిత్వ శాఖ విడుదల చేసిన ఆ ప్రకటన పేర్కొంది.
భారీ విద్యార్థి ఉద్యమం నేపథ్యంలో ఆగస్టు 2024లో తన ప్రభుత్వం కూలిపోయిన తర్వాత ఢాకా నుండి పారిపోయిన 78 ఏళ్ల హసీనా భారతదేశంలో నివసిస్తున్నారు. రెండు దేశాల మధ్య ఉన్న ద్వైపాక్షిక అప్పగింత ఒప్పందం కింద ఆమెను అప్పగించాలంటూ బంగ్లా మంత్రిత్వ శాఖ ప్రస్తావించింది.
పదేపదే అభ్యర్థించినప్పటికీ, హసీనాను అప్పగించే విషయంలో ఎటువంటి పురోగతి లేదని, అదే సమయంలో ఆమెకు భారత గడ్డపై నుండి రాజకీయ ప్రకటనలు చేయడానికి అనుమతించారని బంగ్లాదేశ్ “బాధపడిందని” ఆ ప్రకటన పేర్కొంది.
ఇలాంటి చర్యలు రెండు దేశాల మధ్య జోక్యం చేసుకోకపోవడం,మంచి పొరుగు సంబంధాల నిబంధనలకు విరుద్ధమని అది తెలిపింది. అవామీ లీగ్ నాయకత్వం రెచ్చగొట్టే చర్యలు తాత్కాలిక ప్రభుత్వం ఆ పార్టీ కార్యకలాపాలను ఎందుకు నిషేధించిందో నిరూపిస్తున్నాయని అది నొక్కి చెప్పింది.
కాగా, మొన్న శుక్రవారం నాడు భారత గడ్డపైనుంచి షేక్ హసీనా బంగ్లాదేశ్ తాత్కాలిక ప్రభుత్వంపై విరుచుకుపడ్డారు. ముహమ్మద్ యూనస్ నేతృత్వంలోని ప్రభుత్వం అధికారంలో కొనసాగితే స్వేచ్ఛాయుతమైన, నిష్పక్షపాత ఎన్నికలు సాధ్యం కావని పేర్కొన్నారు. టెంపరరీ ప్రభుత్వాన్ని కూలదోయాలని బంగ్లా ప్రజలకు హసీనా పిలుపునిచ్చారు.
ఢాకా నుండి పారిపోయిన తర్వాత భారతదేశంలో ఒక సభలో తన మొదటి బహిరంగ ప్రసంగంలో, అవామీ లీగ్ నాయకురాలు గత సంవత్సర కాలంలో జరిగిన సంఘటనలపై “నిజంగా నిష్పక్షపాత విచారణ” జరపాలని ఐక్యరాజ్యసమితిని బంగ్లాదేశ్ కోరాలని, రాజ్యాంగాన్ని “పునరుద్ధరించడానికి” మైనారిటీలను రక్షించడానికి ప్రజలు ఐక్యంగా ముందుకు రావాలని పిలుపునిచ్చారు.
ముందుగా రికార్డ్ చేసిన ఆడియో క్లిప్లో హసీనా సందేశం ఈ సంఘటన న్యూఢిల్లీలో జరిగిన ఒక కార్యక్రమంలో చోటుచేసుకుంది. ఇది బంగ్లాదేశ్లో ఫిబ్రవరి 12న జరగనున్న పార్లమెంటరీ ఎన్నికల ప్రచారం ప్రారంభమైన ఒక రోజు తర్వాత జరిగింది. అవామీ లీగ్ పార్టీని ఈ ఎన్నికలలో పోటీ చేయకుండా నిషేధించారు.
ఆగస్టు 2024లో హసీనా ప్రభుత్వం పతనమైన తర్వాత యూనస్ నేతృత్వంలోని తాత్కాలిక ప్రభుత్వం అధికారంలోకి వచ్చిన తర్వాత భారతదేశం,బంగ్లాదేశ్ మధ్య సంబంధాలు ఉద్రిక్తంగా మారాయి. ఆ దేశంలో మైనారిటీలపై, ముఖ్యంగా హిందువులపై జరుగుతున్న దాడుల పట్ల భారతదేశం ఆందోళన వ్యక్తం చేస్తోంది.
