రామ్‌ పూనియాని, ప్రముఖ చరిత్రకారులు…🖋️

జవహర్‌లాల్ నెహ్రూ పదవీకాలాన్ని అధిగమించి, స్వతంత్ర భారతదేశంలో అత్యధిక కాలం ప్రధానమంత్రిగా పనిచేసిన వ్యక్తిగా నరేంద్ర మోదీ చరిత్ర సృష్టించారు. మోదీ ప్రధానమంత్రిగా 12 సంవత్సరాలు పూర్తి చేసుకున్నారు. ఆయన ప్రతిష్టను మరింత పెంచడానికి బీజేపీ ప్రచార యంత్రాంగం ఈ సందర్భాన్ని ఉపయోగించుకుంటోంది. ఈ కాలంలో సాధించిన ప్రధాన విజయాలను హైలైట్ చేస్తూ…బీజేపీ పాలిత రాష్ట్రాల ముఖ్యమంత్రులు పూర్తి పేజీ ప్రకటనలను ప్రధాన వార్తాపత్రికలలో ప్రచురించారు.

81 కోట్ల మంది పేదలకు నెలవారీ రేషన్ మద్దతు, 4 కోట్ల పీఎం ఆవాస్ గృహాలు, 10.5 కోట్ల ఉజ్వల ఎల్పీజీ కనెక్షన్లు, 12 కోట్ల మరుగుదొడ్లు వంటి అంశాలను ప్రముఖంగా ప్రదర్శిస్తున్నారు. 32 కోట్ల జన్ ధన్ ఖాతాలు, మెట్రో నెట్‌వర్క్‌లు, యువతకు నైపుణ్య శిక్షణా కార్యక్రమాలు, ఆయుష్మాన్ భారత్, 70 ఏళ్లు పైబడిన వారికి ఉచిత చికిత్స (రూ. 5 లక్షల వరకు), రక్షణ రంగ ఎగుమతులు, రైతులు, మధ్యతరగతి ప్రజల సంక్షేమ చర్యలను కూడా ప్రముఖంగా ప్రస్తావిస్తున్నారు. భవ్యమైన రామ మందిరం, కాశీ విశ్వనాథ ధామ్, కేదార్‌నాథ్ ధామ్, మహాకాల్ లోక్ నిర్మాణాన్ని కూడా నొక్కి చెబుతున్నారు.

ఉత్తరాఖండ్ ముఖ్యమంత్రి పుష్కర్ సింగ్ ధామి ఒక అడుగు ముందుకు వేసి, ప్రతి జిల్లాలో సంస్కృత పాఠశాలల ఏర్పాటు, డూన్ విశ్వవిద్యాలయంలో హిందూ అధ్యయన కేంద్రాల ఏర్పాటు, పాఠశాల పాఠ్యప్రణాళికలో శ్రీమద్ భగవద్గీతను చేర్చడం, హిందూ, సిక్కు పుణ్యక్షేత్రాలకు సంబంధించిన పర్యాటకాన్ని ప్రోత్సహించడం వంటి వాటిని ప్రచారం చేశారు.

అయితే నాణేనికి మరోవైపు మన స్వాతంత్య్ర సమరయోధులు , నెహ్రూ ఎంతో శ్రమకోర్చి నిర్మించిన ప్రజాస్వామ్య పునాదులు రోజురోజుకూ క్షీణిస్తున్నాయి. ప్రపంచ ప్రజాస్వామ్య సూచికలలో భారతదేశం క్రమంగా క్షీణిస్తోంది, పలు అంతర్జాతీయ సంస్థలు ఈ దేశాన్ని ‘ఎన్నికల నిరంకుశత్వం’గా అభివర్ణిస్తున్నాయి. పత్రికా స్వేచ్ఛ, మత స్వేచ్ఛ కూడా సమాంతరంగా క్షీణించాయి.

ప్రస్తుతం పార్టీలో ప్రాధాన్యత కోల్పోయిన సీనియర్ బీజేపీ నాయకుడు ఎల్.కె. అద్వానీ ఓ సందర్భంలో మాట్లాడుతూ… మోదీ శకం ఒక అప్రకటిత అత్యవసర పరిస్థితి లాంటిదని ఆందోళన వ్యక్తం చేశారు. ఎఎన్‌ఫోర్స్‌మెంట్ డైరెక్టరేట్ (ఈడీ), ఆదాయపు పన్ను శాఖ (ఐటీ), సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) వంటి స్వయంప్రతిపత్తి గల సంస్థలు అధికార పక్షానికి ఎక్కువగా లొంగిపోతున్నాయి. న్యాయవ్యవస్థ కూడా తరచుగా ప్రభుత్వ నిర్ణయాల వైపే మొగ్గు చూపుతున్నట్లు కనిపిస్తోంది. న్యాయవ్యవస్థలోని చాలామంది తమ నిర్ణయాలు తీసుకునేటప్పుడు భారత రాజ్యాంగం కంటే మనుస్మృతి విలువలను ఎక్కువగా స్వీకరించినట్లు కనిపిస్తోంది.

ఈ ధోరణి ఇప్పుడు పరాకాష్టకు చేరింది, ఒక భారత మాజీ ప్రధాన న్యాయమూర్తి తన కలలో దేవుడు కనిపించి మార్గదర్శనం చేసిన తర్వాతే బాబ్రీ మసీదు తీర్పు రాశానని చెప్పడం దీనికి ఉదాహరణ. ప్రజాస్వామ్యంలో, క్యాబినెట్‌లో ప్రధానమంత్రి అందరికంటే ప్రథముడిగా ఉండాలి. అయితే, ఇక్కడ చాలా ప్రధాన నిర్ణయాలు నేరుగా ప్రధానమంత్రి కార్యాలయం నుంచే వెలువడుతున్నాయి. మోదీ స్వయంగా తాను “జీవసంబంధం లేనివాడిని” అని ప్రకటించుకోవడం ద్వారా తన ప్రతిష్టను దాదాపు దైవ స్థాయికి పెంచుకున్నారు.

ఇక 2020 ఢిల్లీ హింసాకాండ మినహా, ఆయన పదవీకాలంలో పెద్ద ఎత్తున మత ఘర్షణలు జరగనప్పటికీ, ముస్లిం, క్రైస్తవ మైనారిటీలను అణగదొక్కడానికి, వారి సమాన పౌరసత్వ హక్కును దెబ్బతీయడానికి గణనీయమైన చర్యలు తీసుకున్నారు. ఇప్పుడు ప్రజారంగంలో హిందుత్వ రాజకీయాలే ఆధిపత్యం చెలాయిస్తున్నాయి. పెద్ద ఎత్తున సామూహిక హత్యలకు బదులుగా, మత మైనారిటీలపై చెదురుమదురు దాడులు సర్వసాధారణమైపోయాయి.

పెద్ద నోట్ల రద్దు, జీఎస్టీ అమలు, కోవిడ్-19 లాక్‌డౌన్ వంటి ప్రభుత్వ ప్రధాన విధాన నిర్ణయాలు సామాన్య పౌరులపై అపారమైన కష్టాలను మోపాయి. ఉగ్రవాదం, నల్లధనం, అవినీతికి విరుగుడుగా ప్రచారం చేసిన పెద్ద నోట్ల రద్దు, చిన్న, మధ్య తరహా రంగాలను తీవ్రంగా దెబ్బతీసింది. లక్షలాది మంది కార్మికులను నిరుద్యోగులుగా మార్చగా, 99.3 శాతం కరెన్సీ తిరిగి బ్యాంకింగ్ వ్యవస్థలోకి వెళ్లిపోయింది.

చాలా తక్కువ ముందస్తు సమాచారంతో అకస్మాత్తుగా ప్రకటించిన కోవిడ్ లాక్‌డౌన్, సమాజంలోని పేద, అణగారిన వర్గాలకు తీవ్రమైన ఇబ్బందులను సృష్టించింది. ఒక పాఠశాల విద్యార్థిని తన తండ్రిని సైకిల్‌పై దాదాపు వెయ్యి కిలోమీటర్లు మోసుకెళ్తున్న దృశ్యం ఆ కాలపు విషాదాన్ని కళ్ళకు కట్టింది. అదే సమయంలో, వ్యాక్సిన్ తయారీదారులు భారీ లాభాలు ఆర్జించారు. ఒక స్వయం ప్రకటిత బాబా ఇద్దరు కేంద్ర మంత్రుల చేతుల మీదుగా మందులను విడుదల చేసి వాణిజ్య అవకాశాన్ని దక్కించుకున్నాడు.

లోపభూయిష్టమైన జీఎస్టీ అమలు, అప్పటికే పెద్ద నోట్ల రద్దు అనంతర పరిణామాలతో సతమతమవుతున్న అసంఘటిత రంగాన్ని, చిన్న పరిశ్రమలను మరింతగా బలహీనపరిచింది. సంక్షేమ పథకాల గురించి ప్రభుత్వం గొప్ప గొప్ప వాగ్దానాలు చేస్తున్నప్పటికీ, నిరుద్యోగం, ఆర్థిక అభద్రతపై భారతదేశ యువతలో పెరుగుతున్న ఆగ్రహాన్ని యువత నడిపే రాజకీయ వ్యంగ్య బృందాలపై ఇటీవల రాయిటర్స్ నివేదిక వెలుగులోకి తెచ్చింది.

ఉద్యోగాలు, భవిష్యత్తుపై విస్తృత ఆందోళనను చూపిస్తున్న సర్వేలను ఆ నివేదిక ఉటంకించింది. రాయిటర్స్ ప్రకారం…15-29 ఏళ్ల మధ్య వయసున్న భారతీయులలో నిరుద్యోగం సుమారు 9.9 శాతంగా ఉండగా, ద్రవ్యోల్బణం,అవకాశాలపై ఆందోళనలు పెరుగుతూనే ఉన్నాయి. ఆరోగ్య సంరక్షణ విషయానికి వస్తే, సౌకర్యాలు మెరుగుపరిచామని ప్రభుత్వం చెబుతున్నప్పటికీ, పేద, మధ్యతరగతి పౌరులు నాణ్యమైన చికిత్స పొందడంలో తీవ్రమైన ఇబ్బందులను ఎదుర్కొంటున్నారు. విద్యా రంగంలో పరిస్థితి కూడా అంతే ఆందోళనకరంగా ఉంది. జాతీయ విద్యా విధానం ప్రైవేట్ రంగం పాత్రను విస్తరించడమే కాకుండా, మైనారిటీలపై ద్వేష బీజాలు నాటి, మనుస్మృతి వంటి గ్రంథాలలో పాతుకుపోయిన విలువలను ప్రోత్సహించడం ద్వారా విద్యను మతపరంగా మార్చాలని చూస్తోంది.

‘హిందూ రాష్ట్రం’ అనే లక్ష్యం వైపు విద్యను ఎంత వేగంగా మళ్లిస్తున్నారో ఉత్తరాఖండ్ ఉదాహరణ స్పష్టం చేస్తుంది. సంస్కృతం వంటి భాషలు నిస్సందేహంగా ముఖ్యమైనవే అయినప్పటికీ, ప్రస్తుత పరిస్థితి ఉపాధి ఆధారిత,నైపుణ్య ఆధారిత విద్యను కోరుతోంది. ఉద్యోగ కల్పన, వ్యవసాయ సంక్షోభం, ఆరోగ్య సంరక్షణ మౌలిక సదుపాయాలు, విద్యా నాణ్యత, ఆదాయ అసమానతలు భారత సమాజం ఎదుర్కొంటున్న ప్రధాన సమస్యలుగా మిగిలి ఉన్నాయి.

చిన్న వ్యాపారాలు మనుగడ కోసం పోరాడుతుండగా, ప్రభుత్వం పెద్ద కార్పొరేట్ గ్రూపులకు అనుకూలంగా వ్యవహరిస్తోందని ప్రతిపక్ష నాయకులు, స్వతంత్ర విశ్లేషకులు పదేపదే ఆరోపించారు. పెరుగుతున్న ఆర్థిక ఒత్తిడి, ద్రవ్యోల్బణ భయాలు, ఆర్థిక ఇబ్బందులపై ప్రజలలో పెరుగుతున్న ఆందోళనల గురించి ఫైనాన్షియల్ టైమ్స్ ఇటీవల తెలిపింది. అభివృద్ధిపై గట్టిగా ప్రచారం చేస్తున్నప్పటికీ, మధ్య, దిగువ ఆదాయ వర్గాలపై ఆర్థిక భారం గణనీయంగా పెరిగిందని విమర్శకులు వాదిస్తున్నారు.

యువత ఆందోళనలపై రాయిటర్స్ నివేదిక ఒకటి, భారతదేశంలోని యువతరం ఎదుర్కొంటున్న అతిపెద్ద ఆందోళనలలో ద్రవ్యోల్బణం ఒకటని పేర్కొంది. ప్రస్తుత ఆర్థిక పరిస్థితి ఈ విషయాన్ని మరింత దిగజారుస్తోందని తెలిపింది.

ఈ ప్రభుత్వం ప్రజాస్వామ్యానికి ఉన్న అవకాశాలను గణనీయంగా తగ్గించింది. గతంలో, ఓట్ల అవకతవకలు జరిగాయని, ఈవీఎంలపై అనుమానాలు వంటి అంశాలపై ఆందోళనలు కేంద్రీకృతమయ్యాయి. ఎన్నికల ఫలితాలు అధికార పక్షానికి అనుకూలంగా మారుతున్నాయని విమర్శకులు ఆరోపించారు. స్పెషల్ ఇంటెన్సివ్ రివిజన్ (SIR) ప్రవేశపెట్టడంతో, బీజేపీ సిద్ధాంతాన్ని వ్యతిరేకిస్తున్నారని భావిస్తున్న ఓటర్లను పెద్ద సంఖ్యలో తొలగిస్తున్నారనే ఆరోపణలు ఇప్పుడు వస్తున్నాయి.

పశ్చిమ బెంగాల్‌లో, ఓటర్ల జాబితా నుంచి 91 లక్షల పేర్లను తొలగించినట్లు సమాచారం. కాగా, 27 లక్షల మంది తమ అప్పీళ్ల ఫలితాల కోసం ఎదురుచూస్తున్నారు. ప్రభావిత వ్యక్తులు వచ్చే ఎన్నికల్లో ఓటు వేయవచ్చని సూచించడం ద్వారా న్యాయస్థానాలు సరిగా స్పందించలేదని విమర్శకులు వాదిస్తున్నారు.

ఇదిలా ఉండగా, ప్రతి పౌరుడి బ్యాంకు ఖాతాలో రూ.15 లక్షలు, ఏటా రెండు కోట్ల ఉద్యోగాలు, ద్రవ్యోల్బణంపై సమర్థవంతమైన నియంత్రణ వంటి మోదీ వాగ్దానాలు నెరవేరలేదు. దీనికి విరుద్ధంగా, వనరులు ఎక్కువగా వారి చేతుల్లో కేంద్రీకృతం అవుతుండటంతో కార్పొరేట్ ప్రపంచంలోని ఒక వర్గం మాత్రం అభివృద్ధి చెందుతూనే ఉంది. మొత్తంగా మోదీ హయాంలో ప్రజాస్వామ్య సంస్థల నిరంతర క్షీణిస్తుండగా, మతపరమైన మైనారిటీలను ద్వితీయ శ్రేణి పౌరసత్వం వైపు నెట్టివేసే ప్రమాదం ఉంది.

(నేషనల్ హెరాల్డ్ సౌజన్యంతో)