భీవండీ ‘రీ-నీట్’ పరీక్షా కేంద్రం వెలుపల గుండెలు పిండేసే ఎండ.. కానీ, ఆ పక్కనే ఉన్న దారుల్ ఉలూమ్ దీనియాత్ మసీదు లోపల మాత్రం చల్లని తల్లి ఒడి! కులమతాల సరిహద్దులను చెరిపేస్తూ, పరీక్ష రాస్తున్న పిల్లల కోసం బయట అల్లాడిపోతున్న వందలాది మంది హిందూ, ముస్లిం తల్లిదండ్రులకు ఆ మసీదు ఆశ్రయమిచ్చింది. దాహార్తిని తీర్చి, ఆకలిని నిమిరి, ‘మేమంతా ఒక్కటే’ అంటూ సాగే ముహమ్మద్ ముజాహిద్ ప్రత్యేక కథనం..ఆందోళనతో అడుగుపెట్టి.. ఆనంద భాష్పాలతో..వైద్య విద్య కలలను గుండెల్లో నింపుకుని దేశవ్యాప్తంగా లక్షలాది మంది విద్యార్థులు జూన్ 21న ‘రీ-నీట్ 2026’ పరీక్షకు హాజరయ్యారు. మహారాష్ట్రలోని భీవండీ నగరంలో తొలిసారిగా ఐదు పరీక్షా కేంద్రాలను ఏర్పాటు చేశారు. మధ్యాహ్నం 2 గంటల నుంచి సాయంత్రం 5 గంటల వరకు పరీక్ష. బయట భానుడు నిప్పులు చెరుగుతున్నాడు. పరీక్షా కేంద్రాల లోపల పిల్లలు టెన్షన్తో రాస్తుంటే, బయట అంతకంటే ఎక్కువ టెన్షన్తో, చెమటలు కక్కుతూ వందలాది మంది తల్లిదండ్రులు నిల్చున్నారు. సరిగ్గా అప్పుడే ఆ ప్రాంతంలో ఒక అద్భుతం జరిగింది!
సలావుద్దీన్ అయూబీ హైస్కూల్ పరీక్షా కేంద్రానికి సమీపంలో ఉన్న మసీదు దారుల్ ఉలూమ్ దీనియాత్ నిర్వాహకులు, అక్కడి ముస్లిం యువకులు రోడ్డుపై ఎండలో నిల్చున్న తల్లిదండ్రుల వద్దకు వచ్చారు. “అమ్మా.. అయ్యా.. ఎండలో ఎందుకు నిల్చుంటారు? రండి, మా మసీదులోకి రండి” అంటూ చేతులు జోడించి సాదరంగా ఆహ్వానించారు.మసీదులో ‘అమ్మ’ల కోసం ప్రత్యేక గదికులాల పట్టింపుల్లేవు.. మతాల సరిహద్దుల్లేవు.. లోపలికి వచ్చిన ప్రతి ఒక్కరికీ చల్లని ఏసీ గదులు, ఫ్యాన్ల కింద కూర్చునేలా ఏర్పాట్లు చేశారు.• ఆప్యాయత వడ్డించారు: సుదూర ప్రాంతాల నుంచి ఉదయమే బయల్దేరి వచ్చిన తల్లిదండ్రుల ఆకలి, దాహాన్ని గమనించిన మసీదు స్వచ్ఛంద సేవకులు వారికి చల్లని మంచినీరు, వేడి వేడి టీ, బిస్కెట్లు, చిరుతిళ్లు, పిల్లల కోసం మ్యాంగో ఫ్రూటీలను పంపిణీ చేశారు.
• మహిళలకు పెద్దపీట: పరీక్షకు వచ్చే మహిళలు, తల్లుల సౌకర్యం కోసం, వారి ప్రైవసీని గౌరవిస్తూ మసీదు పై అంతస్తులో పూర్తిగా ప్రత్యేక గదులను, పరిశుభ్రమైన వాష్రూమ్లను కేటాయించారు. మసీదులోనే కాకుండా నగరంలోని సమదియా హైస్కూల్ దగ్గర ‘మోమిన్ జమాత్ఖానా’, రైస్ హైస్కూల్ వద్ద ‘మోమిన్ గర్ల్స్ హైస్కూల్’ కూడా తమ తలుపులను తల్లిదండ్రుల విశ్రాంతి కోసం తెరిచి ఉంచాయి.
తల్లిదండ్రుల మనోగతం: భయపడ్డాం.. కానీ ఇక్కడ దేవుడిని చూశాం!”నా కూతురు పరీక్ష రాయడానికి ఇక్కడికి వచ్చాం. అడ్మిట్ కార్డులో ‘భీవండీ’ అని చూడగానే ఏదో తెలియని భయం. ముస్లింలు ఎక్కువగా ఉండే ప్రాంతం, ఎలా ఉంటుందో అని రాత్రంతా నిద్రపోలేదు. కానీ ఇక్కడికి వచ్చాక మాకు జరిగిన సత్కారం చూసి కళ్లల్లో నీళ్లొచ్చాయి. ఇంతటి మానవత్వాన్ని నేనెక్కడా చూడలేదు. మా టెన్షన్ అంతా మాయమైపోయింది.”– కల్పనా శర్మ, ఠాణే
మనుషులు మాట్లాడే మతాల కంటే.. ఇక్కడి మనుషులే Study! “నేనొక టీచర్ని. గతంలో మా పాపను పరీక్షకు తీసుకెళ్తే అక్కడ కనీసం నిల్చోవడానికి కూడా చోటు ఇవ్వలేదు. దుకాణదారులు విసుక్కున్నారు. కానీ ఇక్కడ మసీదు పిల్లలు మమ్మల్ని పిలిచి మరీ కూర్చోబెట్టి, నీళ్లు, స్నాక్స్ ఇచ్చారు. బయట సమాజంలో మనుషులు కులమతాల గురించి ఏవేవో మాట్లాడుకుంటారు.. కానీ నిజమైన మానవత్వం అంటే ఇదో ఇక్కడ ప్రాణంతో కనిపిస్తోంది. వంద శాతం తృప్తిగా ఉంది.”– భూపేంద్ర మహాజన్, అంబర్నాథ్
సేవ చేయడమే అసలైన ధర్మం! ఈ అద్భుతమైన చొరవపై మసీదు మౌలానా స్పందిస్తూ.. “దేవుడు సృష్టించిన మనుషులకు సేవ చేయడమే అన్నింటికంటే పెద్ద ధర్మం. మా ప్రవక్త మహమ్మద్ (సల్లల్లాహు అలైహి వసల్లం) మాకు నేర్పిన పాఠం ఇదే. పరీక్షల కోసం ఎంతో దూరం నుండి వచ్చిన మా సోదర సోదరీమణులకు, తల్లులకు ఈ కష్టసమయంలో చిన్న సేవ చేసే అవకాశం మాకు దక్కడం అల్లాహ్ మాకు ఇచ్చిన అదృష్టంగా భావిస్తున్నాం” అని ఎంతో వినమ్రంగా చెప్పారు. ఎండ తీవ్రత కంటే.. అక్కడ కురిసిన మమకారపు జల్లే అందరి హృదయాలనూ తాకింది. పరీక్ష ముగించుకుని బయటకు వచ్చిన పిల్లలను చూసి తల్లిదండ్రులు ఎంత సంతోషపడ్డారో.. అంతకంటే ఎక్కువ కృతజ్ఞతతో, చేతులు జోడించి ఆ మసీదు వైపు చూస్తూ వీడ్కోలు పలికారు. భీవండీ నగరంలోని ముస్లిం సోదరులు చాటిన ఈ సోదరభావం, దేశమంతటికీ ఒక దిక్సూచిగా నిలుస్తుందనడంలో ఎలాంటి సందేహం లేదు!
-ముహమ్మద్ ముజాహిద్
