న్యూఢిల్లీ: దేశవ్యాప్తంగా ఈ20 పెట్రోల్‌ను విడుదల చేయడంపై రాజకీయ పోరు తీవ్రమైంది. ఈ ఇంధన మిశ్రమం వాహనాలపై చూపే ప్రభావం గురించి వినియోగదారులలో పెరుగుతున్న ఆందోళనలను పరిష్కరించడంలో మోదీ ప్రభుత్వం విఫలమైందని కాంగ్రెస్ ఆరోపించింది.

ఈ20 పెట్రోల్‌కు మారడంపై ప్రజాగ్రహం పెరుగుతోందని, దాని దీర్ఘకాలిక ప్రభావాలపై జవాబుదారీతనం, పారదర్శకత, కచ్చితమైన సమాచారం కావాలని ప్రజలు కోరుతున్నారని కాంగ్రెస్ ప్రధాన కార్యదర్శి జైరామ్ రమేష్ అన్నారు. ఆందోళనలను కొట్టిపారేయడానికి సమగ్రమైన ఆధారాలు లేనందున, ప్రభుత్వ హామీలు వినియోగదారులను ఒప్పించడంలో విఫలమయ్యాయని ఆయన ఆరోపించారు.

సంవత్సరాల శాస్త్రీయ మూల్యాంకనం తర్వాత ఈ20 పెట్రోల్‌ను సమర్థిస్తూ జూలై 29న పార్లమెంటులో కేంద్ర రోడ్డు రవాణా శాఖ మంత్రి నితిన్ గడ్కరీ చేసిన వ్యాఖ్యలు, సమాధానాల కంటే ఎక్కువ ప్రశ్నలను లేవనెత్తాయని రమేష్ అన్నారు. 20 శాతం ఇథనాల్, 80 శాతం పెట్రోల్ మిశ్రమంతో కూడిన ఈ20 పెట్రోల్‌ను విస్తృతమైన పరీక్షల తర్వాతే ప్రవేశపెట్టామని, దీనివల్ల వాహనాలకు పెద్ద ఎత్తున నష్టం వాటిల్లినట్లు ఎటువంటి ఆధారాలు లేవని గడ్కరీ వాదించారు. అయితే, దేశవ్యాప్తంగా వాహనదారులు, మెకానిక్‌లు పంచుకున్న అనుభవాలు భిన్నమైన చిత్రాన్ని చూపిస్తున్నాయని జైరామ్‌ రమేష్ గుర్తు చేశారు.

“గత కొన్ని నెలలుగా, దేశవ్యాప్తంగా వినియోగదారులు, మెకానిక్‌లు తగ్గిన మైలేజ్, ఇంజిన్ పనితీరు సమస్యలు, వాహనాలపై E20 ఇంధనం దీర్ఘకాలిక ప్రభావంపై ఆందోళనలను చేస్తున్నారు,” అని జైరాం రమేష్ X లో పేర్కొన్నారు.

వాహన యజమానులు, ముఖ్యంగా 2023కి ముందు మోడళ్లు ఉన్నవారు, ఇంధన అనుకూలతకు సంబంధించిన సమస్యలను నివేదిస్తున్నారని ఆయన పేర్కొన్నారు. వాటిలో కోల్డ్-స్టార్ట్ ఇబ్బందులు, వేగవంతమైన అరుగుదల, మూసుకుపోయిన ఇంజెక్టర్లు, తుప్పు పట్టిన ఫ్యూయల్ లైన్లు, రబ్బరు భాగాలకు నష్టం వాటిలుతున్నాయి. అన్ని ఫ్యూయల్ స్టేషన్లలో మిశ్రమ పెట్రోల్ ప్రామాణికంగా మారడంతో, వినియోగదారులకు E20 ఇంధనానికి మారడం తప్ప వేరే మార్గం లేదని కాంగ్రెస్‌ నేత ఆరోపించారు.

2023కి ముందు తయారైన 44,000 మందికి పైగా పెట్రోల్ వాహనాల యజమానులతో జూన్ 2026లో నిర్వహించిన ఒక స్వతంత్ర సర్వేను ఉటంకిస్తూ, E20 ప్రవేశపెట్టిన తర్వాత గణనీయమైన సంఖ్యలో ప్రతివాదులు ప్రతికూల ప్రభావాలను నివేదించారని జైరాం రమేష్‌ పేర్కొన్నారు.

బయోఫ్యూయల్స్ వల్ల వాహనాలకు లేదా ఇంజిన్‌కు నష్టం వాటిల్లుతుందనే వాదనలను సెప్టెంబర్ 2025లో పెట్రోలియం మంత్రి హర్దీప్ పూరి కొట్టిపారేసిన వ్యాఖ్యలను ప్రస్తావిస్తూ, వినియోగదారుల ఫిర్యాదులపై గత ప్రభుత్వాల స్పందనలను కూడా ఆయన విమర్శించారు.

వినియోగదారులు లేవనెత్తిన ఆందోళనలు కొత్తవి కాదని , అందుకుగాను నీతి ఆయోగ్ 2021 ఇథనాల్ పాలసీ రోడ్‌మ్యాప్‌తో సహా ప్రభుత్వ పత్రాలను ఆయన ఉదహరించారు. తక్కువ ఇథనాల్ మిశ్రమాల కోసం రూపొందించిన వాహనాలలో, అధిక ఇథనాల్ మిశ్రమాలు హోస్‌లు, సీల్స్, గాస్కెట్‌లు మరియు ఓ-రింగ్‌ల వంటి కొన్ని రబ్బరు భాగాల క్షీణతను వేగవంతం చేయగలవని ఆ పత్రాలు అంగీకరించాయని జైరాం రమేష్‌ అన్నారు.

పాలసీ పత్రాలలో పేర్కొన్న మన్నిక పరీక్షలను కూడా ఆయన ఉటంకించారు. కొన్ని వాహనాలలో ఇంజిన్‌కు సంబంధించిన సమస్యలు నమోదయ్యాయని, అలాగే E20 ఇంధన ట్యాంకులు, అంతర్గత లోహ భాగాలలో తుప్పు పట్టే ప్రమాదాన్ని పెంచుతుందని హెచ్చరించారు. అంతేకాదు అధిక ఇథనాల్ మిశ్రమం ఇంధన సామర్థ్యాన్ని కూడా ప్రభావితం చేయగలదు. దీనివల్ల పాత నాలుగు చక్రాల వాహనాలలో మైలేజీ 6-7 శాతం, పాత ద్విచక్ర వాహనాలలో 3-4 శాతం, E20కి అనుకూలంగా రూపొందించిన వాహనాలలో కూడా 1-2 శాతం తగ్గుతుంది.

దీంతో ఈ20 పెట్రోల్‌ వాడకంపై “ప్రజల ఆగ్రహం పెరుగుతోంది. ప్రజలు జవాబుదారీతనం, పారదర్శకతను డిమాండ్ చేస్తున్నారు. మరోవైపు, సరైన డేటా లేదా నివేదికలు లేకపోవడంతో, E20 వల్ల ఎలాంటి హాని లేదని మోదీ ప్రభుత్వ మంత్రులు ఎవరినీ ఒప్పించలేకపోతున్నారని జైరాం రమేష్ అన్నారు.

దిగుమతి చేసుకున్న ముడి చమురుపై ఆధారపడటాన్ని తగ్గించడం, ఉద్గారాలను తగ్గించడం, వ్యవసాయ పంటల నుండి ఉత్పత్తి అయ్యే ఇథనాల్‌కు డిమాండ్‌ను సృష్టించడం ద్వారా రైతులకు మద్దతు ఇవ్వడం వంటి భారతదేశ వ్యూహంలో ఇథనాల్ మిశ్రమం ఒక కీలక భాగమని ప్రభుత్వం చెబుతూ వస్తోంది. వాహన అనుకూలత, వినియోగదారుల అవగాహనపై ఆందోళనలు చర్చను రేకెత్తిస్తున్నప్పటికీ, భారతదేశ స్వచ్ఛ ఇంధన పరివర్తనలో E20 విస్తరణ ఒక ప్రధాన భాగంగానే మిగిలిపోయింది.