న్యూయార్క్: అమెరికా, ఇరాన్‌ల మధ్య ఘర్షణలు తిరిగి ప్రారంభం కావడంతో మధ్యప్రాచ్యం నుండి సరఫరాకు అంతరాయం కలుగుతుందనే భయాలు మళ్లీ తలెత్తడంతో, చమురు ధరలు సుమారు 4% పెరిగి వారం రోజుల గరిష్ఠ స్థాయికి చేరుకున్నాయి. బ్రెంట్ ఫ్యూచర్స్ ధర బ్యారెల్‌కు $3.44, అంటే 3.8% పెరిగి $93.93కు చేరగా, యూ.ఎస్. వెస్ట్ టెక్సాస్ ఇంటర్మీడియట్ క్రూడ్ ధర $3.72, అంటే 4.3% పెరిగి $89.48కు చేరుకుంది.

దీంతో బ్రెంట్ ఆగస్టు 20 తర్వాత తన గరిష్ఠ ముగింపు స్థాయికి, డబ్ల్యూటీఐ జూలై 23 తర్వాత తన గరిష్ఠ ముగింపు స్థాయికి చేరుకునే మార్గంలో ఉన్నాయి. గత వారాంతంలో జరిగిన కాల్పుల మార్పిడి, విస్తృత శత్రుత్వాల పునరుద్ధరణకు సంకేతం కాదన్న ఆశలను తుంచివేస్తూ, మంగళవారం అమెరికా ఇరాన్ లక్ష్యాలపై కొత్త వైమానిక దాడులను ప్రారంభించింది.

జులై తర్వాత జరిగిన మొదటి ప్రత్యక్ష దాడుల మార్పిడి అనంతరం, ప్రపంచ చమురు సరఫరా జలమార్గమైన జలసంధి నుండి బయలుదేరుతున్న రెండు ట్యాంకర్లపై దాడులు జరిగాయనే నివేదికల తర్వాత చమురు ధరలు అప్పటికే పెరిగాయి.

ఇరాన్ దాడులకు ప్రతిస్పందనగా ఆ దేశాన్ని “తీవ్రంగా” దెబ్బతీస్తామని అమెరికా అధ్యక్షుడు డొనాల్డ్ ట్రంప్ హెచ్చరించినప్పటికీ, వాషింగ్టన్ కొత్త ఆంక్షలు విధించబోతోందని అమెరికా ట్రెజరీ సెక్రటరీ స్కాట్ బెస్సెంట్ హెచ్చరించినప్పటికీ, టెహ్రాన్ తన వైఖరిని మార్చుకోలేదు, గల్ఫ్ నుండి చమురు ఎగుమతిని అడ్డుకుంటామని హెచ్చరించింది.

ఈమేరకు “నిన్న మధ్యాహ్నం అమెరికా దళాలు ఇరాన్‌లోని లక్ష్యాలపై దాడులు ప్రారంభించాయి,” అని యూ.ఎస్. సెంట్రల్ కమాండ్ Xలో పోస్ట్ చేసింది. “హర్ముజ్ జలసంధిలో వాణిజ్య నౌకలపై, ఆ ప్రాంతంలో మోహరించిన అమెరికన్ సైనికులపై ఐఆర్‌జీసీ ఇటీవల జరిపిన దాడుల ప్రయత్నాల తర్వాత ఈ దాడులు జరిగాయి.” ఈ తాజా ఘర్షణలు “హర్ముజ్ జలసంధి ద్వారా ఇంధన ప్రవాహాలకు దీర్ఘకాలిక అంతరాయాల గురించి ఆందోళనలను పెంచాయి,” అని సాక్సో బ్యాంక్ విశ్లేషకుడు ఓలే హాన్సెన్ అన్నారు.

డీజిల్ ధరల పెరుగుదల
ప్రపంచవ్యాప్తంగా, ముఖ్యంగా మధ్యప్రాచ్యంలో అమెరికా-ఇరాన్ యుద్ధం కారణంగా, ఉక్రెయిన్ దాడుల కారణంగా రష్యాలోని రిఫైనరీలలో ఏర్పడిన అంతరాయాలు డీజిల్ ధరలు విపరీతంగా పెరగడానికి కారణమయ్యాయి.

LSEG డేటా ప్రకారం, అమెరికాలో గత 10 వారాల్లో సుమారు 51% పెరిగిన డీజిల్ ఫ్యూచర్స్, మంగళవారం నాడు 52 నెలల గరిష్ఠ స్థాయికి చేరుకున్నాయి. దీంతో రిఫైనింగ్ లాభాల మార్జిన్‌లను కొలిచే డీజిల్ క్రాక్ స్ప్రెడ్, బ్యారెల్‌కు దాదాపు $106 వద్ద రికార్డు స్థాయికి చేరింది.

ఉక్రెయిన్ రాజధాని కీవ్‌పై వరుసగా ఆరో రోజు తీవ్రమైన దాడులు జరగడంతో, మంగళవారం తెల్లవారుజామున జరిగిన రష్యా వైమానిక దాడుల్లో కీవ్ మరియు దాని పరిసర ప్రాంతాల్లో 12 మంది మరణించగా, మరెందరో గాయపడ్డారని అధికారులు తెలిపారు.

అమెరికా ఇంధన డేటా ప్రకారం, 2025 నాటికి అమెరికా, సౌదీ అరేబియా తర్వాత ప్రపంచంలో మూడవ అతిపెద్ద ముడి చమురు ఉత్పత్తిదారుగా రష్యా నిలవనుంది. ఇది ఒపెక్, దాని మిత్రదేశాలు కలిగిన ఒపెక్+ దేశాల కూటమిలో సభ్యదేశం.

యు.ఎస్. చమురు నిల్వలు
చమురు మార్కెట్, మంగళవారం తరువాత అమెరికన్ పెట్రోలియం ఇన్‌స్టిట్యూట్ వాణిజ్య బృందం నుండి,బుధవారం యు.ఎస్. ఎనర్జీ ఇన్ఫర్మేషన్ అడ్మినిస్ట్రేషన్ నుండి వెలువడే వారపు నిల్వల నివేదికల కోసంపడే ఆసక్తిగా ఎదురుచూస్తోంది.

ఆగస్టు 28తో ముగిసిన వారంలో ఇంధన సంస్థలు నిల్వల నుండి 0.8 మిలియన్ బ్యారెళ్ల ముడి చమురును తీసుకున్నాయని విశ్లేషకులు అంచనా వేశారు. ఈ అంచనా సరైనదైతే, గత ఐదు వారాలలో ఇదే మొదటి తగ్గుదల అవుతుంది. గత సంవత్సరం ఇదే వారంలో 2.4 మిలియన్ బ్యారెళ్ల పెరుగుదలతో, గత ఐదేళ్లలో (2021 నుండి 2025 వరకు) సగటున 5.1 మిలియన్ బ్యారెళ్ల తగ్గుదలతో దీనిని పోల్చవచ్చు.

ప్రపంచ చమురు, LNG సరఫరాలో హార్ముజ్ జలమార్గం ముఖ్యపాత్ర పోషిస్తుంది కాబట్టి.. ధరల పెరుగుదల అంతర్జాతీయ ఆర్థిక వ్యవస్థపై ఒత్తిడి తెస్తోంది. భారత్‌కు ఇది సంకటంలో పడేయటం ఖాయం. మన దేశం తన క్రూడ్ ఆయిల్ అవసరాల్లో 85 శాతానికి పైగా దిగుమతులపై ఆధారపడి ఉంది. పశ్చిమాసియా నుంచి వచ్చే సరఫరాలు, హార్ముజ్ మార్గం ద్వారా వచ్చే చమురు, LPG, LNGలపై ఆధారపడటం ఎక్కువ. మార్చి నుంచి ఆగస్టు 2026 వరకు హార్ముజ్ సంక్షోభం కారణంగా చమురు ధరల పెరుగుదల.. దిగుమతి బిల్లును పెంచి, ద్రవ్యోల్బణంపై ప్రభావం చూపుతోంది. రూపాయి విలువపైనా ఒత్తిడి పడుతోంది. ఈ పెరుగుద పెట్రోల్, డీజిల్ ధరలను పెంచి, సాధారణ ప్రజల జేబుకు చిల్లు పెట్టడం ఖాయంగా కనిపిస్తుంది. మొత్తంగా చూస్తే, పశ్చిమాసియాలోని ఈ తాజా పరిణామాలు భారత ఇంధన భద్రతకు, ద్రవ్యోల్బణ నియంత్రణకు ప్రధాన సవాలుగా మారింది.