న్యూఢిల్లీ: ఇజ్రాయెల్ పరిశోధకుడు, సంప్రదాయవాద మేధావి అయిన యషయా రోసెన్‌మన్, రాష్ట్రీయ స్వయంసేవక్ సంఘ్ (ఆర్‌ఎస్‌ఎస్)తో తనకు సైద్ధాంతికంగా ఉమ్మడి అభిప్రాయాలు ఉన్నాయని అన్నారు. ప్రపంచ వ్యవహారాలకు సంబంధించిన అనేక అంశాలపై తమ అభిప్రాయాలు ఒకేలా ఉన్నాయని పేర్కొంటూ, ఆ సంస్థ యోగ్యతకు ఇచ్చే ప్రాధాన్యతను ఆయన ప్రశంసించారు.
జియోనిజం, హిందుత్వ, ఇవాంజెలికలిజం, రాజకీయ ఇస్లాం వంటి అంశాలలో నిపుణుడైన రోసెన్‌మన్, ‘హండ్రెడ్ ఇయర్స్ యంగ్: రాష్ట్రీయ స్వయంసేవక్ సంఘ్’ అనే పుస్తకానికి తన వంతు సహకారం అందించారు. ఈ పుస్తకం గత శతాబ్దంలో ఆర్‌ఎస్‌ఎస్ పరిణామాన్ని విశ్లేషిస్తుంది.
ఆ సంస్థతో తనకున్న అనుబంధాన్ని వివరిస్తూ, భారతదేశంలోని ఇజ్రాయెల్ దౌత్య బృందం నిర్వహించిన కార్యక్రమాల ద్వారా తాను ఆర్‌ఎస్‌ఎస్ సభ్యులలో స్నేహితులను సంపాదించుకున్నానని రోసెన్‌మన్ చెప్పారు.
“వారు నన్ను ఇతర స్నేహితులకు పరిచయం చేశారు. మా మధ్య ఒక సైద్ధాంతిక పొత్తు ఉందని వారు గ్రహించారు. ప్రపంచ వ్యవహారాలకు సంబంధించిన అనేక విభిన్న విషయాలపై మేము ఏకీభవించాము. నాకు ఇది అసలైన భారతదేశాన్ని, భారతీయ సమాజపు మూలాలను పరిచయం చేసుకునేందుకు ఒక అవకాశం,” అని ఆయన అన్నారు.
ఆయన వ్యాఖ్యలు హిందూ జాతీయవాదం, జియోనిజం మధ్య ఉన్న సైద్ధాంతిక సంబంధాలపైనా, అలాగే ఆర్‌ఎస్‌ఎస్, ఇజ్రాయెల్ సమాజంలోని కొన్ని వర్గాల మధ్య సంబంధాలను బలోపేతం చేసే ప్రయత్నాలపైనా దృష్టిని ఆకర్షించాయి.
మోదీకి ప్రశంస
‘హండ్రెడ్ ఇయర్స్ యంగ్: రాష్ట్రీయ స్వయంసేవక్ సంఘ్’ పుస్తకానికి అందించిన తన వ్యాసంలో, రోసెన్‌మాన్ యోగ్యతావాదాన్ని ఆర్‌ఎస్‌ఎస్ ప్రధాన సద్గుణాలలో ఒకటిగా గుర్తించారు. ఆయన ప్రధానమంత్రి నరేంద్ర మోదీని ఉదాహరణగా పేర్కొంటూ, మోదీ అధికారంలోకి రావడం కుటుంబ సంబంధాలు లేదా సంపద వల్ల కాకుండా, ఆయన కఠోర శ్రమ, రాజకీయ విజయాల వల్ల జరిగిందని తెలిపారు.
“ఆర్సెస్ ప్రధాన సద్గుణాలలో ఒకటి యోగ్యతా ప్రాతిపదిక. ప్రధానమంత్రి మోదీజీ వంటి వారిని తీసుకోండి. ఆయన ఎవరో కొడుకు కావడం వల్లనో, ధనవంతుడు కావడం వల్లనో, లేదా అగ్ర కులానికి చెందినవాడు కావడం వల్లనో అధికారంలోకి రాలేదు. గుజరాత్ ముఖ్యమంత్రిగా ఆయన చేసిన కృషి, సాధించిన విజయాల వల్లే అధికారంలోకి వచ్చారు,” అని రోసెన్‌మన్ అన్నారు.
యోగ్యత ఆధారిత వ్యవస్థ యువతను వారి సామర్థ్యాలు, పనితీరు ద్వారా అవకాశాలను అందిపుచ్చుకునేలా ప్రోత్సహించగలదని ఆయన పేర్కొన్నారు. “ఆర్‌ఎస్‌ఎస్, బీజేపీ, ఈ భావజాలంతో సంబంధం ఉన్న ఇతరులు అధికారంలో ఉన్నంత కాలం, బంధుప్రీతి, అవినీతి ద్వారా కాకుండా ప్రతిభ ఆధారంగానే ప్రజలు పురోగమిస్తారని యువతకు తెలిస్తే, వారు ఆశయాలు పెట్టుకోవడానికి ఒక లక్ష్యం ఉంటుందని ఆయన అన్నారు.
ప్రతిభావంతులైన వ్యక్తులు రాణించి, ఆర్థిక వృద్ధికి దోహదపడే పరిస్థితులను కల్పించడంపైనే భారతదేశ దీర్ఘకాలిక శ్రేయస్సు ఆధారపడి ఉంటుందని రోసెన్‌మాన్ జోడించారు. ఆయన అంచనా ప్రకారం… ఆర్‌ఎస్‌ఎస్, దాని భావజాల ప్రవాహంతో సంబంధం ఉన్న రాజకీయ సంస్థలు పురోగతికి అవకాశాలు కల్పించగల సంస్థలుగా కనిపిస్తున్నాయి. అయితే, ఆయన వ్యాఖ్యలు ఈ సంస్థలపై ఆయన సొంత అంచనాను మాత్రమే సూచిస్తాయి.
ఇజ్రాయెల్‌తో సన్నిహిత సంబంధాలను కోరుకుంటున్న ఆర్‌ఎస్‌ఎస్
భారతదేశం వెలుపల ఉన్న ప్రజలతో, ముఖ్యంగా ఇజ్రాయెల్, విస్తృత యూదు సమాజంతో ఆర్‌ఎస్‌ఎస్ సంబంధాలను ప్రోత్సహించడం కూడా ఈ పుస్తకంలో ఓ వ్యాసం రాయడం తన ఉద్దేశ్యమని రోసెన్‌మాన్ అన్నారు.
“తులనాత్మక దృక్పథంతో ఇజ్రాయెల్, భారతీయ సమాజాలు, సంస్కృతులను పరిశీలించే నా వ్యాసం, ఇజ్రాయెల్, యూదు ప్రపంచానికి చేరువయ్యేందుకు ఆర్‌ఎస్‌ఎస్‌కు చాచిన చేయిలా ఉపయోగపడుతుందని నేను ఆశిస్తున్నానని ఆయన అన్నారు.
రచయిత్రి రష్మీ సమంత్ సంపాదకత్వంలో వెలువడిన ఈ పుస్తకం, ఆర్‌ఎస్‌ఎస్‌పై తమ దృక్కోణాలను అందించడానికి, హిందూ, ముస్లిం, యూదు, క్రైస్తవ నేపథ్యాలకు చెందిన వ్యక్తులతో సహా, భారతదేశం, విదేశాల నుండి వచ్చిన రచయితలను ఒకచోట చేర్చింది.
మారుతున్న పరిస్థితులకు అనుగుణంగా పునరుద్ధరణ, అనుసరణ సామర్థ్యం ఉన్న సంస్థగా దీనిని ప్రదర్శించడమే ఈ ప్రచురణ లక్ష్యమని రోసెన్‌మాన్ అన్నారు. జెరూసలేంలోని హీబ్రూ విశ్వవిద్యాలయం పూర్వ విద్యార్థి అయిన రోసెన్‌మాన్, ఆఫ్ఘనిస్తాన్, పాకిస్తాన్, భారతదేశం, బంగ్లాదేశ్, వాటి ప్రవాస సమాజాలతో సహా విస్తృత ఉపఖండంపై నిపుణుడు. ఆయన 2023లో ‘ది హిందూ’ పత్రికకు ఇజ్రాయెల్ కరస్పాండెంట్‌గా పనిచేశారు. ప్రస్తుతం జెరూసలేం ఇంటర్‌ఫెయిత్ సెంటర్‌లో సీనియర్ పరిశోధకుడిగా ఉన్నారు.
ఆర్‌ఎస్‌ఎస్ సభ్యులతో తనకున్న అనుబంధం గురించిన ఆయన కథనం, హిందుత్వ, జియోనిజం మధ్య ఉన్న సంబంధంపై చర్చను పునరుద్ధరించింది. ఈ రెండూ జాతీయ గుర్తింపు, మతం మరియు రాజకీయ సమీకరణపై చర్చలతో ముడిపడి ఉన్నప్పటికీ, వాటి సైద్ధాంతిక సారూప్యతల స్వభావం… చర్చలకు అంశాలుగా మిగిలిపోయాయి.
