భోపాల్: భారత్-పాకిస్తాన్ సైనిక ఘర్షణ సమయంలో అమెరికా అధ్యక్షుడు డొనాల్డ్ ట్రంప్ పిలుపు తర్వాత ప్రధాని నరేంద్ర మోడీ అమెరికాకు లొంగిపోయారని ప్రతిపక్ష నాయకుడు రాహుల్ గాంధీ ఆరోపించారు. భోపాల్ లో జరిగిన పార్టీ సమావేశంలో ప్రసంగిస్తూ, అమెరికా తన నౌకాదళాన్ని పంపినప్పటికీ అప్పటి ప్రధానమంత్రి ఇందిరా గాంధీ 1971 యుద్ధంలో చలించలేదని రాహుల్ అన్నారు.
“భారత్, పాక్ ఉద్రిక్తతల సందర్భంగా కాల్పుల విరమణ ఆపాలని ట్రంప్ ఆదేశించారు మోడీ పాటించారని రాహుల్ ఎద్దేవా చేశారు. చరిత్ర సాక్షి, ఇది బిజెపి-ఆర్ఎస్ఎస్ లక్షణం. వారు ఎప్పుడూ తలవంచుతూనే ఉంటారని రాహుల్ పేర్కొన్నారు. అమెరికా బెదిరింపు ఉన్నప్పటికీ 1971లో భారతదేశం పాకిస్తాన్‌ను విభజించిందని రాహుల్ అన్నారు.
1971 యుద్ధంలో ఎటువంటి ఫోన్ కాల్ రాలేదని ఆయన అన్నారు. అమెరికా ఏడవ నౌకాదళం, ఆయుధాలు, విమాన వాహక నౌక వచ్చినప్పటికీ, ఇందిరా గాంధీ లొంగిపోలేదు, ఆమె తనకు కావలసినది చేస్తానని చెప్పిందని రాహుల్ గుర్తు చేశారు.
ఈ సందర్భంగా ఆర్ఎస్ఎస్ గురించి ప్రస్తావిస్తూ, వారికి సరెండర్ అవడం అలవాటేనని రాహుల్ సెటైర్లు వేశారు. ఇది వారి లక్షణం. వారందరూ ఇలాగే ఉన్నారు. స్వాతంత్ర్యం వచ్చినప్పటి నుండి వారికి లొంగిపోయే లేఖలు రాసే అలవాటు ఉంది. కాంగ్రెస్ ఎప్పుడూ లొంగిపోదు. మహాత్మా గాంధీ, జవహర్‌లాల్ నెహ్రూ మరియు (వల్లభాయ్) పటేల్ ఎప్పుడూ లొంగిపోలేదు, వారు అగ్రరాజ్యాలకు వ్యతిరేకంగా పోరాడారు,” అని ఆయన అన్నారు.
దేశం భావజాల సంఘర్షణను చూస్తోంది.
దేశంలో “సిద్ధాంత యుద్ధం జరుగుతోంది. ఒక వైపు కాంగ్రెస్ భారత రాజ్యాంగాన్ని కాపాడుకోవాలని అనుకుంటుంటే, మరోవైపు బిజెపి, ఆర్ఎస్ఎస్ భారత రాజ్యాంగాన్ని నాశనం చేయాలనుకుంటున్నాయని రాహుల్ ఆరోపించారు. వారు భారతదేశంలోని అన్ని సంస్థలను స్వాధీనం చేసుకుని తమ మనుషులను ఈ సంస్థలలో ఉంచారని ఆయన ఆరోపించారు. “మా మొదటి పోరాటం రాజ్యాంగం కోసం. రెండవ పోరాటం సామాజిక న్యాయం కోసం అని కాంగ్రెస్ నాయకుడు పేర్కొన్నారు.
“మధ్యప్రదేశ్ కాంగ్రెస్ అధ్యక్షుడు జితు పట్వారీ కుల గణన గురించి మాట్లాడానని అన్నారు. లోక్‌సభలో, ఏమి జరిగినా, కుల జనాభా గణనను పార్లమెంటు ఆమోదిస్తుందని నేను దేశానికి హామీ ఇచ్చాను. నాకు BJP, RSS వ్యక్తులు బాగా తెలుసు, వారిపై కొంచెం ఒత్తిడి తెస్తే, భయంతో పారిపోతారు” అని రాహుల్ ఆరోపించారు. కాంగ్రెస్ ఎటువంటి ఒత్తిడికి లొంగకుండా సామాజిక న్యాయం కోసం పోరాడుతుందని, లోక్‌సభలో కుల గణనను ఆమోదించేలా చూస్తుందని ఆయన అన్నారు.
“గతంలో మోడీ జీ నాలుగు కులాలు మాత్రమే ఉన్నాయని చెప్పేవారు, కానీ ఎన్నికల సమయంలో వారు (కులాలు) OBCలుగా మారతారు” అని ఆయన వ్యంగ్యంగా అన్నారు. “బాబులు రూపొందించిన” బీహార్ మోడల్ కాకుండా, కుల జనాభా గణనను నిర్వహించడం కోసం తెలంగాణ మోడల్ అమలు చేస్తామని రాహుల్ అన్నారు.
దేశంలోని యువతను పణంగా పెట్టి అదానీ, అంబానీలకు అధికారం ఇస్తున్నారని రాహుల్ ఆరోపించారు. కాగా, 2028 మధ్యప్రదేశ్ ఎన్నికల కోసం కార్మికుల్లో కొత్త ఉత్సాహాన్ని నింపే లక్ష్యంతో కాంగ్రెస్‌ను అట్టడుగు స్థాయిలో బలోపేతం చేయడానికి ‘సంఘ్థాన్ సృజన్ అభియాన్’ను ప్రారంభించేందుకు రాహుల్ భోపాల్‌కు వచ్చారు. .
అంతకుముందు, కాంగ్రెస్ రాజకీయ వ్యవహారాల కమిటీ సమావేశంలో రాహుల్ ప్రసంగించారు. పార్టీ సీనియర్ నాయకులతో కీలక అంశాలపై చర్చించారు. భోపాల్‌లోని రాష్ట్ర కాంగ్రెస్ కార్యాలయంలో జరిగిన సమావేశానికి ఆయన అధ్యక్షత వహించారు, దీనికి ఇన్‌ఛార్జ్ జనరల్ సెక్రటరీ ఇన్‌ఛార్జ్ హరీష్ చౌదరి, AICC ఆర్గనైజేషన్ ఇన్‌ఛార్జ్ కె సి వేణుగోపాల్, పట్వారీ, కమల్ నాథ్, మాజీ ముఖ్యమంత్రి దిగ్విజయ సింగ్, ఎంపి అసెంబ్లీలో ప్రతిపక్ష నాయకుడు ఉమాంగ్ సింఘర్, ఇతర పార్టీ నాయకులు హాజరయ్యారు.
