హైదరాబాద్: ఈ ఏడాది ‘మేడారం జాతర’కు దాదాపు మూడు కోట్ల మంది భక్తులు హాజరవుతారని అంచనా వేస్తున్నట్లు మంత్రి సీతక్క తెలిపారు. ప్రతి రెండేళ్లకు ఒకసారి జరిగే ఈ గిరిజన పండుగ జనవరి 28 నుండి 31 వరకు ములుగు జిల్లా, తాడ్వాయి మండలం, మేడారం అటవీ ప్రాంతంలో జరుగుతుందని ఆమె చెప్పారు. పండుగ ఏర్పాట్లను సమీక్షించడానికి మంత్రి అడ్లూరి లక్ష్మణ్ కుమార్, ప్రభుత్వ ప్రధాన కార్యదర్శి రామకృష్ణ రావు, వివిధ శాఖల సీనియర్ అధికారులు, ములుగు జిల్లా కలెక్టర్తో కలిసి మంత్రి సీతక్క ఉన్నత స్థాయి సమీక్షా సమావేశానికి అధ్యక్షత వహించారు.
“ఈసారి జాతరకు దాదాపు మూడు కోట్ల మంది భక్తులు హాజరవుతారని అంచనా వేస్తున్నందున, దానికి అనుగుణంగా ఏర్పాట్లు చేయాలని అధికారులను ఆదేశించారు. పండుగను సజావుగా, విజయవంతంగా నిర్వహించడానికి ప్రతి అధికారి బాధ్యత తీసుకుని నిబద్ధతతో పనిచేయాలని మంత్రి సూచించారు”.
అంతేకాదు జాతర జరిగే ప్రాంతంలో మరుగుదొడ్ల సంఖ్యను పెంచడం, తగినంత తాగునీటిని అందించడం, రవాణా సౌకర్యాలను బలోపేతం చేయడం, పటిష్టమైన భద్రతా ఏర్పాట్లను నిర్వహించడంపై ప్రత్యేక దృష్టి సారించినట్లు ఆమె చెప్పారు.
రాష్ట్ర ప్రభుత్వం జాతరకు సంబంధించిన సమాచారం కోసం ప్రత్యేక లోగో, వీడియోలతో పాటు ఒక ప్రత్యేక మొబైల్ అప్లికేషన్, క్యూఆర్ కోడ్ను కూడా ప్రారంభించిందని ఆమె తెలిపారు. ఈ పండుగ కోసం 21 విభాగాల నుండి 42,000 మందికి పైగా అధికారులు, సిబ్బందితో పాటు 2,000 మంది గిరిజన యువ వాలంటీర్లను నియమించారు.
మేడారం జాతర (సమ్మక్క-సారలమ్మ జాతర) అనేది తెలంగాణలోని ములుగు జిల్లాలో జరిగే అతిపెద్ద గిరిజన పండుగ, ఇది తల్లి సమ్మక్క, కూతురు సారలమ్మల వీరగాథ…కాకతీయ రాజుల పన్నుల విధానాన్ని వ్యతిరేకిస్తూ పోరాడి ప్రాణాలు విడిచిన సమ్మక్క, సారలమ్మలను స్మరించుకుంటూ ఈ జాతర నిర్వహిస్తారు.
ఇది ప్రపంచంలోనే అతిపెద్ద గిరిజన ఉత్సవాల్లో ఒకటి. భక్తులు ‘బంగారం’ (బెల్లం)ను దేవతలకు కానుకగా సమర్పిస్తారు. కాగా, ‘మేడారం జాతర’ దేశంలోనే అతిపెద్ద మతపరమైన సమావేశాలలో ఒకటిగా పరిగణిస్తారు. కుంభమేళా తర్వాత సమ్మక్క-సారలమ్మ జాతర దేశంలో అత్యధిక సంఖ్యలో భక్తులను ఆకర్షిస్తుంది.
