డెహ్రాడూన్: కోట్ద్వార్లో జరిగిన ఒక దుకాణం పేరు వివాదంలో ‘మహమ్మద్ దీపక్’గా ప్రసిద్ధి చెందిన జిమ్ యజమాని దీపక్ కుమార్ హత్యకు రూ. 2 లక్షల రివార్డును ప్రకటించిన వ్యక్తిని పోలీసులు గుర్తించారు. బీహార్లోని మోతీహరి నివాసి అయిన నిందితుడు ఉత్కర్ష్ కుమార్ సింగ్ తన ఫాలోవర్స్ సంఖ్యను పెంచుకోవడానికి సోషల్ మీడియాలో ఈ సందేశాన్ని పోస్ట్ చేశానని పోలీసులకు చెప్పాడని తెలిపారు.
దుకాణం పేరు మార్చమని దాని యజమానిపై ఒత్తిడి తెచ్చేందుకు ఒక బట్టల దుకాణం వెలుపల గుమిగూడిన బజరంగ్ దళ్ కార్యకర్తలను ఎదుర్కొన్న తర్వాత దీపక్ కుమార్ జాతీయ స్థాయిలో వెలుగులోకి వచ్చాడు. ఈ సంఘటన సమయంలో కుమార్ తనను ‘మహమ్మద్ దీపక్’ అని నిరసనకారుల ఎదుట ధైర్యంగా నిలబడ్డారు. ఆ తర్వాత నిరసనకారులను పోలీసులు చెదరగొట్టారు.
ఈ మేరకు దీపక్ కుమార్ ఆదివారం కోట్ద్వార్ పోలీస్ స్టేషన్లో ఫిర్యాదు చేశాడని, గుర్తు తెలియని వ్యక్తి సోషల్ మీడియాలో రూ. 2 లక్షల రివార్డును అందిస్తున్నాడని ఆరోపించారని పోలీసులు తెలిపారు. ఈ విషయం తీవ్రతను పరిగణనలోకి తీసుకున్న పోలీసులు, గుర్తు తెలియని నిందితులపై భారతీయ న్యాయ సంహిత (BNS) సెక్షన్ 351 (3) కింద కేసు నమోదు చేసి దర్యాప్తు ప్రారంభించారు.
నిందితుడు సింగ్ గుర్తింపును నిర్ధారించడానికి పోలీసులు సాంకేతిక నిఘా, ఇతర మార్గాలను ఉపయోగించారు. బీహార్ పోలీసుల సమన్వయంతో, సింగ్ను ప్రశ్నించడానికి అతని నివాసానికి సమీపంలోని పోలీస్ స్టేషన్కు తీసుకువచ్చారు. విచారణ సమయంలో, కుమార్ నిరంతరం ఆన్లైన్లో ట్రెండ్ అవుతుండగా, తన సోషల్ మీడియా ఫాలోయింగ్ పెరగడం లేదని సింగ్ పోలీసులకు చెప్పినట్లు తెలుస్తోంది.
తన సోషల్ మీడియా ఛానల్ పరిధిని పెంచడానికి మాత్రమే తాను ఈ సందేశాన్ని పోస్ట్ చేశానని, తనకు ఎటువంటి నేరపూరిత ఉద్దేశ్యం లేదని అతను పేర్కొన్నాడు. సింగ్పై అవసరమైన చట్టపరమైన చర్యలు తీసుకుంటున్నట్లు పోలీసులు తెలిపారు.
వివిధ వనరుల నుండి పొందిన వీడియోలు, ఛాయాచిత్రాలను ఉపయోగించి, గత నెలలో దుకాణం వెలుపల జరిగిన నిరసనలలో పాల్గొన్న వారిని ప్రత్యేక దర్యాప్తు బృందం (SIT) గుర్తిస్తోంది. దాదాపు 40 మంది నిరసనకారులలో దాదాపు 15 మందిని గుర్తించామని, వారికి నోటీసులు పంపుతున్నామని పోలీసులు తెలిపారు.
కోట్ద్వార్ అదనపు పోలీసు సూపరింటెండెంట్ చంద్ర మోహన్ సింగ్ మాట్లాడుతూ… నగరంలో పరిస్థితి ప్రశాంతంగా ఉందని, ఆన్లైన్ ప్లాట్ఫామ్లను నిశితంగా పరిశీలిస్తున్నామని చెప్పారు. బజరంగ్ దళ్ నిరసన తర్వాత కుమార్ జిమ్ను సందర్శించే వారి సంఖ్య తగ్గినట్లు కూడా నివేదికలు ఉన్నాయి.
అయితే, కాంగ్రెస్ నాయకుడు విజయ్ రావత్ దీనికి శీతాకాలం, ఆ ప్రాంతంలో పోలీసులు,మీడియా సిబ్బంది కదలికలు పెరగడం కారణమని పేర్కొన్నారు.
జనవరి 26న, కోట్ద్వార్లోని పటేల్ మార్గ్లోని ‘బాబా’ బట్టల దుకాణం వెలుపల బజరంగ్ దళ్ కార్యకర్తలు నిరసన తెలిపారు, దాని 70 ఏళ్ల యజమాని వకీల్ అహ్మద్ను దుకాణం పేరు మార్చమని ఒత్తిడి చేశారు. నిరసన సందర్భంగా, కార్యకర్తలు, దుకాణ యజమాని వకీల్ అహ్మద్, అతని కొడుకు స్నేహితుడు దీపక్ కుమార్ మధ్య ఘర్షణలు చెలరేగాయి, ఆ తర్వాత కుమార్ తనను తాను మొహమ్మద్ దీపక్ అని పరిచయం చేసుకుని… నిరసనకారులను వెళ్ళిపోవాలని కోరాడు.
జనవరి 31న, అహ్మద్ దుకాణం,కుమార్ జిమ్ వెలుపల మళ్ళీ పెద్ద సంఖ్యలో కార్యకర్తలు గుమిగూడి, రోడ్డును దిగ్బంధించి, నినాదాలు చేశారు. అయితే, పోలీసుల జోక్యం ఉద్రిక్తతను నిరోధించింది.
