టెహ్రాన్: హర్ముజ్ జలసంధి గుండా ప్రయాణించే రూట్పై ఇరాన్, ఒమన్ అంగీకారానికి వచ్చాయని, ఈ మార్గాన్ని సంయుక్తంగా నిర్వహించే ఏర్పాట్లకు తుది మెరుగులు దిద్దుతున్నాయని టెహ్రాన్ విదేశాంగ మంత్రిత్వ శాఖ తెలిపింది.
“ఇరు పక్షాలు ఊహించిన మార్గం భౌగోళిక అక్షాంశాలపై ఒక అంగీకారం కుదిరింది. కొన్ని మూడవ పక్షాలు ఈ ప్రక్రియకు ఆటంకం కలిగించకపోతే…ఇరు దేశాలు ఉమ్మడి ప్రకటన విడుదల చేసే అవకాశముందని అధికార ప్రతినిధి ఇస్మాయిల్ బఖాయీ తెలిపినట్లు ప్రభుత్వ వార్తా సంస్థ ఐఆర్ఎన్ఏ పేర్కొంది. నివేదిక ప్రకారం..ఒమన్తో చర్చలు ముందుకు సాగుతున్నాయని, అయితే ఒక అవగాహనకు వచ్చినా కూడా, జలసంధి గుండా వెళ్లే అన్ని నౌకలకు సురక్షితంగా మారినట్లు కాదని బఖాయీ విలేకరులతో అన్నారు.
“హర్ముజ్ జలసంధిని అభద్రంగా మార్చే కారకాలు అమెరికా వైపు నుండి ఇప్పటికీ ఉన్నాయి, ముఖ్యంగా నౌకాదళ దిగ్బంధనం, ఇరాన్, దాని ప్రయోజనాలకు వ్యతిరేకంగా ఇతర దూకుడు, బెదిరింపు చర్యలని ఆయన అన్నారు. “మా దేశంలోని సంబంధిత అధికారులు ఈ ప్రతిపాదనను సాంకేతిక, చట్టపరమైన, భద్రతా, పర్యావరణ కోణాల నుండి సమీక్షించారని బఖాయీ అన్నారు. ఈ చర్చలు “వృత్తిపరమైనవి”, “ఫలవంతమైనవి” అని ఆయన అభివర్ణించారు. ప్రతిపాదిత మార్గం భౌగోళిక అక్షాంశాలపై ఇరుపక్షాలు అంగీకరించాయని కూడా ఆయన తెలిపారు.
ఫిబ్రవరిలో అమెరికా, ఇజ్రాయెల్ కలిసి టెహ్రాన్పై సంయుక్త దాడి చేసినప్పటి నుండి ఇరాన్, అమెరికాతో యుద్ధంలో నిమగ్నమై ఉంది. అమెరికా ఆస్తులు ఉన్న గల్ఫ్ దేశాలపై డ్రోన్, క్షిపణి దాడులతో ఇరాన్ ప్రతీకారం తీర్చుకుంది. అమెరికా, ఇరాన్లు ఏప్రిల్లో కాల్పుల విరమణకు అంగీకరించాయి. ఆ తర్వాత, తమ సైనిక ఘర్షణను ముగించి, శాశ్వత శాంతి ఒప్పందానికి రావడమే లక్ష్యంగా జూన్లో పాకిస్తాన్ మధ్యవర్తిత్వంతో ఒక అవగాహన ఒప్పందంపై సంతకాలు చేశాయి.
అయితే, ఈ ఒప్పందం గత నెలలో విఫలమైంది. వివాదాన్ని పరిష్కరించడానికి చర్చలు జరుగుతున్నాయనే వార్తల నేపథ్యంలో ట్రంప్ ఆకస్మికంగా బాంబు దాడులను నిలిపివేసే ముందు, దాదాపు రెండు వారాల పాటు ఇరుపక్షాలు పరస్పరం దాడులు చేసుకున్నాయి. యుద్ధానికి ముందు, ప్రపంచ చమురు, ఎల్ఎన్జి ఎగుమతులలో దాదాపు ఐదవ వంతు హర్ముజ్ ద్వారా జరిగేవి. ఈ జలమార్గంపై వివాదం చెలరేగినప్పటి నుండి ధరలు పదేపదే పెరిగాయి, దీంతో దీనిని ముగించాలని వాషింగ్టన్పై ఆర్థిక, రాజకీయ ఒత్తిడి పెరిగింది.
