కోల్‌కత: ఓటర్ల జాబితా ప్రత్యేక విస్తృత సవరణ (SIR) సమయంలో తొలగించిన అర్హులైన ఓటర్లను చేర్చేందుకు పశ్చిమ బెంగాల్ ఎన్నికల అధికారులు ప్రచారాలు ప్రారంభించిన నేపథ్యంలో, ప్రధాన ఎన్నికల కమిషనర్ జ్ఞానేష్ కుమార్‌పై కాంగ్రెస్ మండిపడింది. ఆయన ‘సిగ్గులేదని’ ఆరోపించింది. ఈమేరకు పశ్చిమ బెంగాల్ ప్రధాన ఎన్నికల అధికారి నీలం మీనా కార్యాలయం జారీ చేసిన పత్రికా ప్రకటన స్క్రీన్‌షాట్‌ను కాంగ్రెస్ కమ్యూనికేషన్స్ ఇన్‌చార్జ్ ప్రధాన కార్యదర్శి జైరామ్ రమేష్ సోషల్‌మీడియాలో షేర్‌ చేసారు.
“అత్యంత మోసపూరిత పద్ధతిలో అసెంబ్లీ ఎన్నికలను బీజేపీకి అప్పగించిన తర్వాత, సీఈసీ ఈ పత్రికా ప్రకటనను జారీ చేయించారు. జ్ఞానేష్ కుమార్ సిగ్గులేనితనానికి హద్దులు లేవు,” అని రమేష్ ఒక సోషల్ మీడియా పోస్ట్‌లో పేర్కొన్నారు.
పత్రికా ప్రకటన ప్రకారం, ఎన్నికల సంఘం (EC) ఆదేశాల మేరకు, పశ్చిమ బెంగాల్ వ్యాప్తంగా 24 మంది జిల్లా ఎన్నికల అధికారులు (DEOలు) SIR సమయంలో తొలగించిన అర్హులైన ఓటర్లను గుర్తించి, వారిని ఓటర్ల జాబితాలో చేర్చేందుకు ఒక ప్రచారాన్ని ప్రారంభించారు.
రాష్ట్రవ్యాప్తంగా ప్రత్యేక శిబిరాలు నిర్వహిస్తున్నారు. ఫిర్యాదులు ఉన్నవారు తమ సంబంధిత బూత్-స్థాయి అధికారులను (BLOలు), సహాయ ఎన్నికల నమోదు అధికారులను (AEROలు), ఎన్నికల నమోదు అధికారులను (EROలు) లేదా DEOలను సంప్రదించవచ్చని ఆ ప్రకటన తెలిపింది. “అర్హులైన ఏ ఓటరు కూడా ఓటర్ల జాబితా నుండి మినహాయించకుండా చూసేందుకు మేము కట్టుబడి ఉన్నామని” ఆ ప్రకటనలో పేర్కొన్నారు.
SIR-సంబంధిత నిర్ణయాలపై వివాదం
గత 10 నెలల్లో, ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి, ప్రధానంగా SIR ప్రక్రియకు సంబంధించిన నిర్ణయాలు, ఉత్తర్వులపై కనీసం 14 సార్లు అభ్యంతరాలు నమోదు చేశారని ‘ది ఇండియన్ ఎక్స్‌ప్రెస్’ నివేదిక వెలువరించిన నేపథ్యంలో తలెత్తిన వివాదం మధ్య జైరాంరమేష్ ఈ వ్యాఖ్యలు చేశారు.
ఏ సంస్థలోనైనా చర్చలలో భిన్నమైన అభిప్రాయాలు, పరిశీలనలు సహజమని ఎన్నికల సంఘం పేర్కొంది. తమ ఉత్తర్వులన్నీ పూర్తి చట్టపరమైన ఆమోదాన్ని కలిగి ఉంటాయని మరియు స్థిరపడిన శాసనబద్ధమైన విధానాలను అనుసరిస్తాయని అది స్పష్టం చేసింది.
