న్యూఢిల్లీ: అమెరికాకు చెందిన లైంగిక నేరస్థుడిగా శిక్షపడిన జెఫ్రీ ఎప్స్టీన్‌తో కేంద్ర మంత్రి హర్దీప్ పూరీ ఉన్నట్లుగా చెబుతున్న ఒక ఫోటో విషయంలో… కాంగ్రెస్ పార్టీ నరేంద్ర మోదీ ప్రభుత్వంపై మరోసారి తీవ్ర విమర్శలు చేసింది. ఎప్స్టీన్‌తో మంత్రికి ఉన్న సంబంధాలకు సంబంధించిన ఆరోపణల పట్ల ప్రధానమంత్రి, కేంద్ర హోం మంత్రి అమిత్ షా ‘నేరపూరిత ఉదాసీనత’ ప్రదర్శిస్తున్నారని ఆరోపించింది.
ఎప్స్టీన్‌కు సంబంధించి అమెరికాలో విడుదలైన పత్రాలలో పూరీ పేరు ఉందని పేర్కొంటూ, ఈ ఏడాది ఆరంభం నుంచే ఆయన రాజీనామా చేయాలని ఆ పార్టీ డిమాండ్ చేస్తోంది. ప్రతిపక్షాలు తనపై చేసిన ఆరోపణలను పూరీ ఖండించారు. తాను ఎప్స్టీన్‌ను కొన్నిసార్లు కలిశానని, కానీ ఆ అమెరికన్‌కు శిక్ష పడిన నేరాలలో తనకు ఎలాంటి ప్రమేయం లేదని ఆయన అన్నారు.
అమెరికా న్యాయ శాఖ విడుదల చేసినట్లుగా చెబుతున్న, తేదీ లేని ఒక ఫోటోను పలువురు కాంగ్రెస్ నాయకులు, ఎక్స్ (X) యూజర్లు షేర్‌చేసారు. ఆ ఫోటోలో పూరీ ఒక టేబుల్ వద్ద ఎప్స్టీన్‌కు ఎదురుగా కూర్చుని ఉన్నట్లుగా కనిపిస్తోంది.
పూరీకి ఎప్స్టీన్‌తో ఉన్న సంబంధాల గురించి తెలిసినప్పటికీ, ప్రధానమంత్రి నరేంద్ర మోదీ చర్యలు తీసుకోవడంలో విఫలమయ్యారని ఆరోపిస్తూ కాంగ్రెస్ ప్రధాన కార్యదర్శి కె.సి.వేణుగోపాల్ ఆ చిత్రాన్ని సోషల్‌మీడియాలో షేర్‌ చేసారు.
‘అంతర్జాతీయంగా పేరుపొందిన బాలలైంగిక నేరస్థుడు జెఫ్రీ ఎప్స్టీన్‌తో హర్దీప్ పూరీకి ఉన్న సన్నిహిత సంబంధాల గురించి పూర్తిగా తెలిసినప్పటికీ మోదీ ఏమీ చేయలేదు. ఎప్స్టీన్ తన హేయమైన నేరాలకు పాల్పడిన గదుల్లోనే పూరీ అతడిని కలిశాడని నిరూపిస్తున్న తాజా సాక్ష్యాలను చూసి తీవ్రంగా అసహ్యించుకుంటున్నాను,’ అని వేణుగోపాల్ అన్నారు.
కేంద్ర మంత్రివర్గ సభ్యుడిపై వచ్చిన ఆరోపణల పట్ల మోదీ, షాల మౌనం వారి ‘నేరపూరిత ఉదాసీనత’ను సూచిస్తోందని ఆయన ఆరోపించారు. ‘మానవ నాగరికతకు తెలిసిన అత్యంత నీచమైన లైంగిక నేరస్థుడితో సన్నిహిత సంబంధాలున్న వ్యక్తిని కాపాడి, పోషించే ప్రభుత్వం నుంచి మహిళలు ఇంకేం ఆశించగలరు?’ అని ఆయన అన్నారు.
ప్రతిపాదిత భారత్-అమెరికా వాణిజ్య ఒప్పందానికి కూడా వేణుగోపాల్ ఈ వివాదాన్ని ముడిపెట్టారు. ఇరు దేశాలు ఒప్పందాన్ని ఖరారు చేసేందుకు దగ్గరగా ఉన్నాయని అమెరికా అధ్యక్షుడు డొనాల్డ్ ట్రంప్ చెప్పిన విషయాన్ని ఆయన గుర్తుచేశారు.
ఈ విషయంపై ప్రధాని మోదీ తక్షణమే స్పందించాల్సిన అవసరం ఉంది, ఎందుకంటే భారత్, అమెరికాలు వాణిజ్య ఒప్పందంపై సంతకం చేయడానికి చాలా దగ్గరగా ఉన్నాయని అమెరికా అధ్యక్షుడు డొనాల్డ్ ట్రంప్ కూడా ప్రకటించారు. ‘ఈ విషయాలు ఒప్పందం తుది స్వరూపంపై ఏమైనా ప్రభావం చూపుతాయా?’ అని ఆయన ప్రశ్నించారు.
ఎప్స్టీన్‌తో సంభాషణలపై పూరీ వివరణను ప్రశ్నించిన కాంగ్రెస్
ఎప్స్టీన్‌తో తన సమావేశాలు ఒక ప్రతినిధి బృందంలో భాగంగా జరిగాయని పూరీ గతంలో చేసిన వాదనపై, ఆరోపిత ఫోటో కొత్త ప్రశ్నలను లేవనెత్తిందని కాంగ్రెస్ మీడియా, ప్రచార విభాగం అధిపతి పవన్ ఖేరా పేర్కొన్నారు.
తాను ఎప్స్టీన్‌ను కొన్ని సందర్భాల్లో కలిశానని, చాలా సంవత్సరాలుగా అతనితో ఈమెయిళ్లు మార్పిడి చేసుకున్నానని పూరీ చెబుతూనే, ఆ సంభాషణలకు ఎప్స్టీన్ నేర కార్యకలాపాలతో సంబంధం లేదని వాదించారు.
యూఎస్ డిపార్ట్‌మెంట్ ఆఫ్ జస్టిస్ వెబ్‌సైట్‌లో ప్రచురించిన ఉత్తర ప్రత్యుత్తరాలను ఉటంకిస్తూ, పూరీ అంగీకరించిన దానికంటే ఆ సంభాషణల పరిధి చాలా పెద్దదని ఖేరా ఆరోపించారు.
‘ఎనిమిదేళ్లలో 1-2 సమావేశాలు, 3-4 ఈమెయిళ్లు జరిగాయని పూరీ వాదిస్తున్నారు. విషయాన్ని చాలా తెలివిగా చిత్రీకరించారు.’ కానీ, ఆ ఫైళ్లు మొదట వెలుగులోకి వచ్చినప్పుడు వాటిని శ్రద్ధగా పరిశీలించిన మాకు, అతను మనల్ని నమ్మించాలనుకుంటున్న దానికంటే ఈ కథ చాలా విస్తృతమైనదని మొదటి నుంచీ తెలుసు. యూఎస్ న్యాయ శాఖ వెబ్‌సైట్‌లోని ఎప్స్టీన్ ఫైల్స్ ప్రకారం, కేవలం 3 సంవత్సరాల (2014-17) కాల వ్యవధిలోనే ఎప్స్టీన్, హర్దీప్‌ల మధ్య కనీసం 62 ఈమెయిళ్లు పరస్పరం పంపుకున్నారని ‘ఖేరా అన్నారు.
వారిద్దరూ 14 సమావేశాలు నిర్వహించారని, పలు ఏకాంత సమావేశాలతో సహా విస్తృతమైన సంభాషణలు జరిపారని ఆయన ఆరోపించారు. ‘ఇటీవలి ఫోటోలు మా వాదనలను మరింత బలపరిచాయి. అయితే, కొన్ని ప్రశ్నలు మిగిలే ఉన్నాయి: మరి, కేంద్ర పెట్రోలియం శాఖ మంత్రి ప్రజలను తప్పుదోవ పట్టించడం ఆపి, ఎప్స్టీన్‌తో తన సంభాషణల నిజ స్వరూపాన్ని వెల్లడిస్తారా? ఎప్స్టీన్‌తో ఆయన జరిపిన అనేక సమావేశాలలో, తాజాగా వెలుగులోకి వచ్చిన ఆయన ఏకాంత ఫోటోలో ఏవి ఉన్నాయి?’ అని ఖేరా ప్రశ్నించారు.
ఫోటోలో చిత్రీకరించిన సమావేశం ఉద్దేశ్యాన్ని కూడా ఆయన ప్రశ్నించారు. ఎప్స్టీన్‌తో మంత్రి జరిపిన సంభాషణలపై ప్రభుత్వం విచారణ జరుపుతుందా లేదా అని తెలుసుకోవాలని ఆయన డిమాండ్ చేశారు. ‘శిక్ష పడిన బాలల లైంగిక అక్రమ రవాణాదారుడితో తమ కేంద్ర మంత్రికి ఉన్న ఈ సిగ్గుమాలిన ప్రమేయంపై విచారణ జరిపే నైతిక ధైర్యాన్ని భారత ప్రభుత్వం ప్రదర్శిస్తుందా?’ అని ఖేరా అన్నారు.
కాగా, ఈ వివాదం మహిళల పట్ల బీజేపీ, ఆర్‌ఎస్‌ఎస్‌ల వైఖరిని ప్రతిబింబిస్తోందని కాంగ్రెస్ సోషల్ మీడియా, డిజిటల్ ప్లాట్‌ఫామ్స్ ఛైర్‌పర్సన్ సుప్రియా శ్రీనాతే ఆరోపించారు. ‘ఆర్‌ఎస్‌ఎస్, మితవాద పార్టీలు మహిళలను ఎప్పటికీ సమానంగా గౌరవించలేవని చెప్పడానికి మీకు ఇంకా ఏమైనా రుజువు కావాలా?’ అని శ్రీనాతే ‘X’ లో అన్నారు.
