న్యూఢిల్లీ: ఢిల్లీలో చేపట్టిన SIR ప్రక్రియలో భాగంగా దాఖలైన పిటిషన్లపై సుప్రీంకోర్టు నిన్న కీలక విచారణ జరిపింది. ఈ సందర్భంగా ఓటర్ల నమోదు ప్రక్రియపై కేంద్ర ఎన్నికల సంఘం (ECI) తీరును న్యాయస్థానం ప్రశ్నించింది. ఎన్నికల సంఘం ఫారం 6, 7, 8ల నిబంధనలను మార్చకూడదని స్పష్టం చేస్తూ, ఇప్పటికే ఓటర్ల జాబితాలో ఉన్న వ్యక్తులను తిరిగి నమోదు కోసం ‘ఫారమ్-6’ నింపాలని కోరడంపై ఆశ్చర్యం వ్యక్తం చేసింది.

ఈ మేరకు భారత ప్రధాన న్యాయమూర్తి (CJI) జస్టిస్ సూర్యకాంత్, జస్టిస్ జయమాల్య బాగ్చీ, జస్టిస్ వి. మోహనలతో కూడిన ధర్మాసనం ఈ విచారణ చేపట్టింది.

ధర్మాసనం వ్యక్తం చేసిన ముఖ్యాంశాలు: ఫారమ్ 6, 7, 8లు అనేవి ఒక నిర్దేశిత ఫార్మాట్ ప్రకారం ఉంటాయని, వాటిని మార్చడం సాధ్యం కాదని కోర్టు తెలిపింది. కొత్త ఓటర్ల నమోదు కోసం ఉద్దేశించిన ఫారమ్-6ను పాత ఓటర్లపై రుద్దడం సరికాదని పేర్కొంది.

గడువు తేదీలపై నిలదీత: సమీప భవిష్యత్తులో ఢిల్లీలో ఎలాంటి ఎన్నికలు లేనప్పుడు, అక్టోబర్ 30ని గడువుగా పెట్టాలని ఎన్నికల సంఘం ఎందుకు పట్టుబడుతోందని ప్రశ్నించింది. పేర్ల పునర్నమోదు ప్రక్రియకు ఎలాంటి కఠినమైన గడువులను నిర్ణయించవద్దని ఆదేశించింది.

సరళమైన పరిష్కారం చూపండి: గతంలో ఓటర్ల జాబితాలో ఉండి, ప్రస్తుతం సాంకేతిక కారణాల వల్ల పేరు కనిపించని వారిని ‘కొత్త ఓటరు’గా పరిగణించవద్దని స్పష్టం చేసింది. వారి నిర్దిష్ట పరిస్థితికి అనుగుణంగా అత్యంత సరళమైన పరిష్కారాన్ని అన్వేషించాలని సూచించింది.

ఓటర్లను నేరుగా సంప్రదించండి: ఓటర్లు దరఖాస్తులు సమర్పించే వరకు కమిషన్ కేవలం వేచి చూడకూడదని, క్షేత్రస్థాయిలో వారిని నేరుగా సంప్రదించేందుకు ప్రయత్నాలు చేయాలని సీజేఐ వ్యాఖ్యానించారు. ఫారమ్-6, ఫారమ్-8ల ద్వారా దరఖాస్తుల స్వీకరణ ప్రక్రియను కొనసాగిస్తూనే, సామాన్యులకు ఇబ్బంది లేని విధానాన్ని అవలంబించాలని కోరారు.

న్యాయస్థానం ఆదేశాల నేపథ్యంలో, దరఖాస్తుల సమర్పణ గడువును పొడిగించేందుకు ఎన్నికల సంఘం సుముఖత వ్యక్తం చేసింది. ఈ మేరకు పిటిషనర్ల తరఫున సీనియర్ న్యాయవాది ప్రశాంత్ భూషణ్ కోర్టులో వాదనలు వినిపించారు. ఢిల్లీలో ఒక ప్రాంతం నుండి మరో ప్రాంతానికి మారిన చాలా మంది ఓటర్లకు నమోదు ఫారాలు అందలేదని లేదా వాటిని సమర్పించలేకపోయారని ఆయన తెలిపారు.

గతంలో ఏ ఓటర్ల జాబితాలోనూ తమ పేరు లేదని ఫారమ్-6 ద్వారా డిక్లరేషన్ ఇవ్వాలని ఇప్పటికే ఉన్న ఓటర్లను బలవంతం చేయడం సమంజసం కాదన్నారు.

ఆందోళన కలిగిస్తున్న గణాంకాలు: ఢిల్లీలో ప్రత్యేక విస్తృత పునర్విభజన (SIR) ప్రక్రియ ప్రారంభమైనప్పుడు మొత్తం ఓటర్ల సంఖ్య సుమారు 1.45 కోట్లుగా ఉundedi. దాదాపు 97 లక్షల మంది తమ గణన పత్రాలను సమర్పించారు. సుమారు 47 లక్షల మంది నుండి పత్రాలు అందలేదు. ఎన్నికల సంఘం లెక్కల ప్రకారం.. ఇందులో 43 లక్షల మంది ఓటర్లను ‘శాశ్వతంగా తరలివెళ్లినవారు’ లేదా ‘గైర్హాజరు’ అయినవారిగా వర్గీకరించారు. 31.59 లక్షల మందిని ‘శాశ్వతంగా తరలివెళ్లినవారు’గా, 11 లక్షల మందిని ‘ఆచూకీ తెలియనివారు’గా, 2 లక్షల మందిని మరణించినవారిగా గుర్తించారు.

అయితే, ఈ జాబితాలో ఉన్న వారిలో చాలా మందికి అసలు గణన పత్రాలు అందలేదని లేదా వివిధ కారణాల వల్ల వాటిని తిరిగి సమర్పించ లేకపోయారని పిటిషనర్ల తరఫున సీనియర్ న్యాయవాది ప్రశాంత్ భూషణ్ ధర్మాసనానికి వివరించారు.