లక్నో: ఉత్తరప్రదేశ్ రాజకీయాల్లో మరోసారి మాటల యుద్ధం తారస్థాయికి చేరింది. రాష్ట్రంలో బీజేపీ మళ్లీ అధికారంలోకి వస్తే ‘యూనిఫామ్ సివిల్ కోడ్’ (యూసీసీ) అమలు చేస్తామన్న కేంద్ర హోంమంత్రి అమిత్ షా ప్రకటనపై సమాజ్‌వాదీ పార్టీ అధినేత అఖిలేష్ యాదవ్ ఎద్దేవా చేశారు. లక్నోలో జరిగిన మీడియా సమావేశంలో ఆయన మాట్లాడుతూ…*”బడీ దేర్ కర్ ది మెహర్బాన్ ఆతే-ఆతే” (యూసీసీ తీసుకురావడం చాలా ఆలస్యం అయ్యింది, ఓ దయగలవాడా) అంటూ సెటైర్లు వేశారు.
రాష్ట్రాన్ని వరుసగా రెండుసార్లు పాలించిన బీజేపీకి, ఈ హామీ ఇవ్వడానికి ఇన్ని రోజులు ఎందుకు పట్టిందని అఖిలేష్ ప్రశ్నించారు. ఈ సందర్భంగా హిందీ సినిమా పాటకు సంబంధించి ఓ విలేకరి చిన్న సవరణ చేయగా, “నన్ను సరిదిద్దినందుకు ధన్యవాదాలు.. కానీ నాతో ‘హుజూర్’ అనిపించకండి, మెహర్బాన్ అయితే ఫర్వాలేదు” అంటూ ఆయన నవ్వులు పూయించారు.
అమిత్ షా విమర్శలపై కౌంటర్
ఇదిలా ఉంటే, అఖిలేష్ యాదవ్‌పై కేంద్ర హోంమంత్రి అమిత్ షా తీవ్ర స్థాయిలో విరుచుకుపడ్డారు. రాబోయే 30 ఏళ్లపాటు ఎస్పీ ఎప్పటికీ అధికారంలోకి రాదని, ఆ పార్టీ మూడో తరాన్ని కూడా ప్రజలు క్షమించరంటూ ఘాటు వ్యాఖ్యలు చేశారు.
ఈ జోస్యానికి దీటుగా బదులిచ్చిన అఖిలేష్.. ఇటీవల జరిగిన యూపీ శాసనమండలి (ఎమ్మెల్సీ) ఎన్నికల ఫలితాలను తెరపైకి తెచ్చారు. డబుల్ ఇంజిన్, మల్టిపుల్ ఇంజిన్లంటూ గొప్పలు చెప్పుకునే బీజేపీకి ఈసారి వారణాసి ఓటర్లు “డబుల్ జీరో”ఇచ్చారని ఎద్దేవా చేశారు.
యోగి ఆదిత్యనాథ్‌పై ఆరోపణలు
ముఖ్యమంత్రి యోగి ఆదిత్యనాథ్ తన రాజకీయ పట్టును కాపాడుకోవడానికే అధిక ప్రాధాన్యత ఇచ్చారని అఖిలేష్ ఆరోపించారు. “ముఖ్యమంత్రి తన చదరంగపు గుర్రాన్ని వివిధ దిశల్లో కదిలిస్తున్నారు. దీనివల్ల ‘కాశీ మునిగిపోనివ్వండి, కానీ మన గోరఖ్‌పూర్ వ్యవహారం ఆగకూడదు’ అన్నట్లుగా ఆయన వ్యవహరించారు”* అని మండిపడ్డారు. గోరఖ్‌పూర్-ఫైజాబాద్ ఉపాధ్యాయ నియోజకవర్గంలో ఎస్పీ అభ్యర్థిని కావాలనే గెలవనివ్వలేదని ఆరోపించారు.
ఎమ్మెల్సీ ఎన్నికల బలాబలాలు
మొత్తం 11 ఎమ్మెల్సీ స్థానాలకు గాను బీజేపీ 6, ఎస్పీ 5 స్థానాలను కైవసం చేసుకున్నాయి. గతంతో పోలిస్తే ఎస్పీ మరో రెండు స్థానాలు అదనంగా గెలుచుకుంది. అలహాబాద్-ఝాన్సీ, లక్నో, వారణాసి పట్టభద్రుల నియోజకవర్గాలతో పాటు వారణాసి, ఆగ్రా ఉపాధ్యాయ నియోజకవర్గాలను ఎస్పీ కైవసం చేసుకుంది.
బీజేపీ తన విజయాలను అక్రమాల ద్వారా సాధించిందని, ఎస్పీ గెలుపు మాత్రం పూర్తిగా ప్రజా మద్దతుతోనే సాధ్యమైందని అఖిలేష్ స్పష్టం చేశారు. బీజేపీ కేవలం 5 సీట్లు కోల్పోలేదని, రాష్ట్రంలోని 50 నగరాలు, 50 జిల్లాల్లో ఓడిపోయిందని ఎత్తిచూపారు.
ప్రజాస్వామ్య పరిరక్షణే మా లక్ష్యం: అఖిలేష్
వెనుకబడిన తరగతులు, దళితులు, మైనారిటీల కూటమి అయిన పీడీఏ (PDA) బలోపేతానికి ఈ ఫలితాలు కేవలం ఆరంభం మాత్రమేనని ఆయన ధీమా వ్యక్తం చేశారు. అబ్రహం లింకన్ గెట్టిస్‌బర్గ్ ప్రసంగాన్ని ఉటంకిస్తూ… “ప్రజల యొక్క, ప్రజల చేత, ప్రజల కొరకు ఏర్పడిన ప్రభుత్వం భూమిపై నుండి నశించదు” అని పేర్కొన్నారు. ప్రజాస్వామ్యాన్ని కాపాడేందుకు, ప్రజల గొంతుకగా నిలిచేందుకు తమ పోరాటం నిరంతరం సాగుతుందని స్పష్టం చేశారు.
అంతేకాదు సీఎం యోగి ఆదిత్యనాథ్‌ను ఉద్దేశించి అఖిలేష్ వ్యంగ్యాస్త్రాలు సంధించారు… ఇకపై ముఖ్యమంత్రి ఎక్స్‌ప్రెస్‌వేలో ప్రయాణించాలా లేక రైలులో సీటు బుక్ చేసుకోవాలా అనేది మీరే నిర్ణయించుకోవాలని ఎద్దేవా చేస్తూ బీజేపీ ప్రదర్శనను ఒక “ఫ్లాప్ షో”గా అభివర్ణించారు.
