న్యూఢిల్లీ: దేశవ్యాప్తంగా అన్ని రాష్ట్రాల్లో ప్రతిపక్ష పార్టీలు పెద్ద ఎత్తున ‘మెగా ర్యాలీలు’ నిర్వహించాలని భారతీయ కిసాన్ యూనియన్ (BKU) నాయకుడు రాకేశ్ టికాయత్‌ పిలుపునిచ్చారు. న్యూఢిల్లీలోని రాంలీలా మైదానంలో నవంబర్ 1న ప్రతిపక్ష ‘ఇండియా’ (INDIA) కూటమి విజయవంతంగా నిర్వహించిన భారీ ర్యాలీ తరహాలోనే, దేశాన్ని రక్షించుకోవడానికి ప్రతి రాష్ట్రంలోనూ ఇలాంటి ప్రచారాలు జరగాలని ఆయన అభిప్రాయపడ్డారు. ఈ దేశవ్యాప్త ఉద్యమానికి లోక్‌సభ ప్రతిపక్ష నాయకుడు రాహుల్ గాంధీ నాయకత్వం వహించాలని ఆయన కోరారు.
ఈమేరకు ఘజియాబాద్‌లో మీడియాతో మాట్లాడుతూ, ప్రతిపక్షం తమ ప్రచారాన్ని జాతీయ రాజధాని దాటి విస్తరించి, దేశవ్యాప్తంగా ప్రజలను సమీకరించాలని టికాయత్‌ అన్నారు. దేశాన్ని కాపాడటానికి ఒక సైద్ధాంతిక విప్లవం అవసరం,” అని ఆయన అన్నారు. యువత నేతృత్వంలోని కాక్రోచ్‌ జనతా పార్టీకి మద్దతు ఇస్తూ, దేశ రాజకీయాలను, ప్రభుత్వాన్ని మార్చడంలో జెనరేషన్ జెడ్ (Generation Z) కీలక పాత్ర పోషిస్తుందని టికాయత్‌ అన్నారు.
చెరకు రైతుల డిమాండ్లను పరిష్కరించడంలో లేదా వారి ప్రతినిధులతో చర్చలు జరపడంలో కేంద్రం, ఉత్తరప్రదేశ్ ప్రభుత్వాలు విఫలమయ్యాయని కూడా ఆయన ఆరోపించారు. 2021 జనవరి 22 నుంచి ఎలాంటి చర్చలు జరగలేదని ఆయన అన్నారు. రాష్ట్రంతో సంబంధం లేకుండా రైతులకు ఒకే ధర అందాలని వాదిస్తూ, దేశవ్యాప్తంగా క్వింటాల్‌కు రూ. 550 చొప్పున చెరకు కొనుగోలు ధరను ఏకరీతిగా నిర్ణయించాలని బీకేయూ డిమాండ్ చేస్తోంది.
కాగా, తనతో సహా 36 మంది నిందితులు ఉన్న 2014 నాటి క్రిమినల్ కేసు విచారణకు హాజరయ్యేందుకు టికాయత్‌ ఘజియాబాద్‌కు వచ్చారు. న్యాయమూర్తి సెలవులో ఉండటంతో విచారణ వాయిదా పడింది. తదుపరి విచారణ నవంబర్ 12న జరగనుందని ఆయన న్యాయవాది అజయ్‌వీర్ చౌదరి తెలిపారు.
