హైదరాబాద్: ‘యుద్ధ నేరాలలో భాగస్వాములైన’ ఇజ్రాయెల్ రక్షణ రంగ సంస్థలతో స్టార్టప్ ఇంక్యుబేటర్ టి-హబ్ భాగస్వామ్యం కావడాన్ని స్టూడెంట్స్ ఇస్లామిక్ ఆర్గనైజేషన్ (SIO) ఖండించింది. ఈ కార్యక్రమాన్ని రద్దు చేయాలని ప్రభుత్వాన్ని కోరింది.
రక్షణ సాంకేతికత, రోబోటిక్స్, సైబర్‌ సెక్యూరిటీ, ఆర్టిఫిషియల్ ఇంటెలిజెన్స్ (AI) రంగాలకు చెందిన 20 ఇజ్రాయెల్ కంపెనీలకు నవంబర్ 16న టి-హబ్ ఆతిథ్యం ఇవ్వాలని యోచిస్తోంది. పాల్గొంటున్న వారిలో కనీసం 11 సంస్థలకు ఇజ్రాయెల్ సైన్యంతో సంబంధాలు ఉన్నాయని, గాజాలో కొనసాగుతున్న మారణహోమంలో వారు పరోక్షంగా పాత్ర పోషిస్తున్నారని మీడియా గతంలోనే నివేదించింది.
వీటిలో ఐదు సంస్థలు, గాజాపై యుద్ధంలో లేదా పాలస్తీనా భూభాగాల ఆక్రమణలో ఇజ్రాయెల్ సాయుధ దళాలు ఉపయోగించిన హార్డ్‌వేర్, సాఫ్ట్‌వేర్ లేదా సేవలను సరఫరా చేస్తున్నాయి.
ఒక సంస్థ దాడి చేసే డ్రోన్‌లను తయారు చేస్తుంది. మరొకటి, వెస్ట్ బ్యాంక్ విభజన గోడ, గాజా పరిసరాల కోసం నిఘా వ్యవస్థలను నిర్మించిన కంపెనీకి చెందినది. ఇంకొకటి ఇజ్రాయెల్ మెర్కావా ట్యాంక్ కోసం సెన్సార్లను తయారు చేస్తుండగా, మరొకటి ఆ ట్యాంకులను నిర్వహించే రోబోట్లను నిర్మిస్తుంది. ఐదవది ఇజ్రాయెల్ రక్షణ, నిఘా సంస్థల కోసం పనిచేసే ఒక AI సంస్థ.
గాజా మారణహోమానికి ఆజ్యం పోస్తున్న ఇజ్రాయెల్ సంస్థలకు టీ-హబ్ రెడ్ కార్పెట్... ఇజ్రాయెల్ రక్షణ పరిశ్రమతో తెలంగాణ సంబంధాలు పెట్టుకోవడం భారత ప్రభుత్వపు దీర్ఘకాలిక సూత్రబద్ధమైన వలస వ్యతిరేక వైఖరికి విరుద్ధంగా ఉండటమే కాకుండా, పాలస్తీనా దేశ ప్రతిపత్తిపై కాంగ్రెస్ వైఖరిలోనూ, ఆ వలస రాజ్యంతో దాని సహకారంలోనూ ఉన్న ద్వంద్వ వైఖరిని కూడా బయటపెడుతుంది” అని ఎస్ఐఓ ఒక ప్రకటనలో పేర్కొంది.
“గాజాలోని పౌరులపై భారతదేశంలో తయారైన బాంబులు వేసినట్లు మేము నివేదికలను చూశాము, ఇజ్రాయెల్ రక్షణ కంపెనీలతో ఈ సహకారాలు కొనసాగడం నైతిక పతనానికి ఒక సంకేతం తప్ప మరొకటి కాదు; ఇవి అదే ప్రభుత్వం చేతిలో లక్షలాది మంది పాలస్తీనియన్ల ప్రాణాల మూల్యం చెల్లించి జరుగుతున్నాయి” అని ఎస్ఐఓ పేర్కొంది.
ఈ మేరకు ఎస్ఐఓ తెలంగాణ రాష్ట్ర అధ్యక్షుడు మహ్మద్ ఫరాజ్ అహ్మద్ మాట్లాడుతూ, “ఆర్థిక, సాంకేతిక ప్రయోజనాలు ఎన్నడూ మానవ ప్రాణాల కంటే ముందు రాకూడదు. పాలస్తీనా ప్రజలు అపారమైన నష్టాన్ని, విధ్వంసాన్ని ఎదుర్కొంటున్న సమయంలో, ఇజ్రాయెల్ సైన్యంతో సంబంధం ఉన్న కంపెనీలను టీ-హబ్ స్వాగతించడం తీవ్ర ఆందోళన కలిగించే సందేశాన్ని పంపుతుంది. న్యాయం పట్ల మన నైతిక, చారిత్రక బాధ్యతకు విరుద్ధంగా నిలుస్తుంది” అని ఎస్ ఐ ఓ రాష్ట్ర అధ్యక్షుడు అన్నారు.
