లక్నో: దళితులపై నేరాల్లో యూపీదే అగ్రస్థానం అని ఎన్‌సిఆర్‌బి తాజాగా లెక్క తేల్చింది. కాగా, ఈ డేటాను ఉటంకిస్తూ సమాజ్‌వాదీ పార్టీ అధ్యక్షుడు అఖిలేష్ యాదవ్ ఉత్తరప్రదేశ్‌లోని బిజెపి ప్రభుత్వాన్ని ఘాటుగా విమర్శించారు.
దళితులపై నేరాలలో ఉత్తరప్రదేశ్ 15,130 కేసులతో అగ్రస్థానంలో ఉందని, రాజస్థాన్ (8,449), మధ్యప్రదేశ్ (8,232) తరువాతి స్థానాల్లో ఉన్నాయని యాదవ్ ఎక్స్‌లో పోస్ట్‌ చేసారు. ఈ చార్ట్‌కు “దలితోపే అపరాద్ మే యుపి నంబర్ 1 అనే శీర్షిక కూడా పెట్టారు.
ఈమేరకు నేషనల్ క్రైమ్ రికార్డ్స్ బ్యూరో – 2023 డేటాను ఉటంకిస్తూ…ఈ గణాంకాలు రాష్ట్రంలో శాంతిభద్రతల “భయంకరమైన వాస్తవికతను” ప్రతిబింబిస్తున్నాయని అఖిలేష్ అన్నారు.
“బిజెపి ప్రభుత్వ పనిని కేవలం పక్షపాతంగా చూడకూడదు, అది కలిగించిన బాధ, కన్నీళ్లను కూడా గమనించాలి. యుపిలో, దళితుల అణచివేత గరిష్ట స్థాయికి చేరుకుంది” అని యాదవ్ ఎక్స్‌ పోస్ట్‌లో అన్నారు.
“ఈ గణాంకాలపై ఒక టీవీ షో కూడా నిర్వహించాలి; ఈ సత్యాన్ని హైలైట్ చేసే హోర్డింగ్ కూడా ఉంచాలి, దీనిపై వివరణాత్మక నివేదికను కూడా ప్రసారం చేయాలి. వార్తగా ప్రచురించాలి” అని ఆయన అన్నారు.
“దీనిపై దర్యాప్తు చేయడానికి ఒక సిట్‌ను కూడా ఏర్పాటు చేయాలి; పాఠ్యాంశాల్లో ఒక అధ్యాయాన్ని చేర్చాలి. దీనిపై ఒక విచారణ కమిషన్‌ను కూడా ఏర్పాటు చేయాలి. దళిత అణచివేత నిర్మూలన కోసం ఒక ప్రత్యేక విభాగాన్ని కూడా సృష్టించాలి. ఈ నేరంపై ఒక శ్వేతపత్రం కూడా జారీ చేయాలి” అని అఖిలేష్ యోగీ ప్రభుత్వాన్ని డిమాండ్ చేశారు. “ఈ సమస్య గురించి అవగాహన పెంచడానికి” రోడ్‌షో నిర్వహించాలని బిజెపి ప్రభుత్వాన్ని కోరారు.
“ఈ చారిత్రక అణచివేతను ‘పంచ్ సహస్రబ్ది’గా రూపొందించి, చైతన్యాన్ని మేల్కొల్పడానికి ‘ఐదు వేల సంవత్సరాల నాటి’ కార్యక్రమాన్ని కూడా నిర్వహించాలి” అని యాదవ్ జోడించారు.
అయితే NCRB డేటాను ప్రస్తావిస్తూ, జాతీయ సగటుతో పోలిస్తే రాష్ట్రంలో నేరాల నియంత్రణ మెరుగ్గా ఉందని UP పోలీసులు తెలిపారు. దేశంలో అత్యధిక జనాభా కలిగిన ఉత్తరప్రదేశ్ అయినప్పటికీ, 2023లో రాష్ట్రంలో నేరాల రేటు 181.3గా ఉందని, ఇది జాతీయ నేరాల రేటు 270.3 కంటే చాలా తక్కువగా ఉందని ఒక ప్రకటనలో తెలిపింది.
యోగి ఆదిత్యనాథ్ ప్రభుత్వం నేరస్థుల పట్ల జీరో-టాలరెన్స్ విధానాన్ని కఠినంగా అమలు చేయడం వల్ల నేరాలు తగ్గాయని యూపీ డీజీపీ రాజీవ్ కృష్ణ పేర్కొన్నారు.
