హైదరాబాద్: డ్వాక్రా సంఘాలకు ముఖ్యమంత్రి రేవంత్రెడ్డి శుభవార్త వినిపించారు. రాష్ట్ర వ్యాప్తంగా మహిళా సంఘాలు ఉత్పత్తి చేస్తున్న వివిధ వస్తువులను ఈ కామర్స్ ద్వారా మార్కెటింగ్ చేసేందుకు అమెజాన్తో సంప్రదింపులు చేస్తున్నట్లు వెల్లడించారు. స్వయం సహాయక బృందాలు ఉత్పత్తి చేసే ఉత్పత్తులకు అంతర్జాతీయ మార్కెట్ను అందించడమే ప్రభుత్వం లక్ష్యంగా పెట్టుకుందని సీఎం అన్నారు.
ఈమేరకు నిన్న జిల్లా కలెక్టర్లతో జరిగిన వీడియో కాన్ఫరెన్స్లో, స్వయం సహాయక బృందాలకు జాతీయ, అంతర్జాతీయ స్థాయిలో పెద్ద ఆన్లైన్ మార్కెట్ను సృష్టించాలని ప్రభుత్వం కోరుకుంటుందని రేవంత్ రెడ్డి అన్నారు. దీని కోసం శిల్పారామం పక్కన వందల కోట్ల రూపాయల విలువైన 3 ఎకరాల స్థలంలో ప్రభుత్వం ఇందిరా మహిళా శక్తి బజార్ను కూడా ఏర్పాటు చేసిందని ముఖ్యమంత్రి తెలిపారు.
మాజీ ప్రధానమంత్రి ఇందిరా గాంధీ జయంతి సందర్భంగా నిన్న నెక్లెస్ రోడ్డులోని ఇందిరా గాంధీ విగ్రహానికి పూలమాల వేసిన తర్వాత ముఖ్యమంత్రి మహిళా శక్తి చీరల పంపిణీ పథకాన్ని ప్రారంభించారు. ఏర్పాట్లను సమీక్షించిన ఆయన, ఈ పథకం కింద కోటి మంది మహిళలకు చీరలు అందజేయనున్నట్లు చెప్పారు. తెలంగాణలోని మహిళా సంఘాలకు పెట్రోల్ పంప్ స్టేషన్లను కేటాయించడం ద్వారా వారికి సాధికారత కల్పిస్తున్నామని ఆయన అన్నారు.
“మహిళ ఉన్నతి- తెలంగాణ ప్రగతి” పథకం కింద జరుగుతున్న చీరల పంపిణీని పర్యవేక్షించడానికి ప్రతి అసెంబ్లీ నియోజకవర్గానికి ఒక ప్రత్యేక అధికారిని నియమించాలని తెలంగాణ ముఖ్యమంత్రి కలెక్టర్లను ఆదేశించారు. తన కార్యాలయం నుండి వచ్చిన పత్రికా ప్రకటన ప్రకారం…ప్రతి మండల ప్రధాన కార్యాలయంలో ఈ కార్యక్రమాన్ని నిర్వహించాలని రేవంత్ రెడ్డి పేర్కొన్నారు.
ఈ పథకం కింద 65 లక్షల చీరలను నవంబర్ 19 నుండి డిసెంబర్ 9 వరకు పంపిణీ చేస్తారు. ఇతర జిల్లాల నుండి మహిళా సంఘాలను… నారాయణపేట జిల్లాలోని పెట్రోల్ పంపు వరకు పర్యటింపజేసి, అక్కడ మహిళా సంఘాలు ఎలా పని చేస్తున్నాయో అధ్యయనం చేయాలని ముఖ్యమంత్రి రేవంత్రెడ్డి కలెక్టర్లకు సూచించారు.
