న్యూఢిల్లీ: పశ్చిమ బెంగాల్ ముఖ్యమంత్రి మమతా బెనర్జీ రాష్ట్రంలో కొనసాగుతున్న ఎస్ఐఆర్ ప్రక్రియను వెంటనే నిలిపివేయాలని సీఈసీ జ్ఞానేష్కుమార్కు లేఖ రాశారు. ఈ ప్రక్రియ “ప్రణాళిక రహితంగా, బలవంతంగా, ప్రమాదకరంగా” అమలవుతోందని ఆమె ఆరోపించారు.
బూత్-స్థాయి అధికారులకు (BLOలు) తగిన శిక్షణ, మద్దతు, సమయం అందించలేదని, పశ్చిమ బెంగాల్ ప్రధాన ఎన్నికల అధికారి (CEO) మద్దతు ఇవ్వడానికి బదులుగా “బెదిరింపు” కు పాల్పడ్డారని, BLOలపై క్రమశిక్షణా చర్యలు, షో-కాజ్ నోటీసులు జారీ చేస్తామని బెదిరిస్తున్నారని బెనర్జీ తన లేఖలో ఆరోపించారు.
బీఎల్ఓలకు పనిభారం ఎక్కువైందని, ఇది మొత్తం ప్రక్రియను,దాని విశ్వసనీయతను తీవ్ర ప్రమాదంలో పడేసిందని ఆమె అన్నారు. ఓటరు జాబితా సవరణ ప్రక్రియను ఎటువంటి ప్రాథమిక తయారీ లేదా తగిన ప్రణాళిక లేకుండా ప్రజలపై రుద్దుతున్నారని ముఖ్యమంత్రి ఆరోపించారు. అధికారులు, పౌరులపై రుద్దుతున్న ఈ విధానం గందరగోళంగా ఉండటమే కాకుండా ప్రమాదకరమైనది కూడా” అని ముఖ్యమంత్రి లేఖలో రాశారు.
“గతంలో మూడు సంవత్సరాలు అవసరమమయ్యే సవరణను… ఇప్పుడు బలవంతంగా మూడు నెలలుగా కుదించారు, BLOలు, అధికారులకు పనిభారం పెరిగింది. సాధారణ ప్రజలను భయం, అనిశ్చితి నీడలో బలవంతం చేస్తున్నారు” అని బెనర్జీ తన లేఖలో పేర్కొన్నారు.
ఈ ప్రక్రియను వెంటనే నిలిపివేయాలని,దిద్దుబాటు చర్యలు తీసుకోవాలని బెనర్జీ అన్నారు. ఎటువంటి “ప్రణాళిక లేని ఈ బలవంతపు డ్రైవ్ మరిన్ని ప్రాణాలను ప్రమాదంలో పడేయడమే కాకుండా ఎన్నికల సవరణ చట్టబద్ధతను కూడా ప్రమాదంలో పడేస్తుంది” అని బెనర్జీ అన్నారు.
జల్పాయ్గురిలో అంగన్వాడీ కార్యకర్త మరణం
సరైన నిర్వహణ లేకపోవడం వల్ల SIR లో మానవ నష్టం భరించలేనిదిగా మారిందని మమతా బెనర్జీ అన్నారు. జల్పాయ్గురిలో బూత్-స్థాయి అధికారిగా నియమితమైన ఒక అంగన్వాడీ కార్యకర్త మరణాన్ని ఆమె ఉదహరించారు. ఆమె ఆత్మహత్య చేసుకుంది. SIR ఒత్తిడి కారణంగా ఆమె మానసిక క్షోభకు గురైనట్లు రిపోర్టులు వెల్లడించాయి.
ఈ నెల ప్రారంభంలో, తూర్పు బుర్ద్వాన్లో SIR పని ఒత్తిడి కారణంగా మరొక అంగన్వాడీ కార్యకర్త బ్రెయిన్ స్ట్రోక్తో మరణించాడని న్యూ ఇండియన్ ఎక్స్ప్రెస్ నివేదించింది. అక్టోబర్లో కోల్కతా పక్కనే ఉన్న పానిహటిలో నివసిస్తున్న 57 ఏళ్ల వ్యక్తి ఎన్నికల కమిషన్ ప్రకటించిన 24 గంటల కంటే తక్కువ సమయంలో ఆత్మహత్య చేసుకున్నట్లు ఆరోపణలు ఉన్నాయి.
రాష్ట్రంలోని 81,000 మంది BLOలలో చాలామంది పనిభారం, సాంకేతిక ఇబ్బందులు, రాజకీయ ఒత్తిడితో తాము మునిగిపోయామని చెప్పారు. నవంబర్ 4 నుండి, BLOలు గణన ఫారమ్లను పంపిణీ చేయడం, సేకరించడం, డేటాను అప్లోడ్ చేయడం వలన వారి వ్యక్తిగత నంబర్లకు నిరంతరం కాల్స్ వస్తున్నాయి.
“చాలా మంది అనవసరంగా కాల్ చేసి మమ్మల్ని వేధిస్తున్నారు. పోలీసు ఫిర్యాదులు సహాయం చేయలేదు” అని జల్పైగురిలోని క్రాంతి ప్రాంతానికి చెందిన ఒక మహిళా BLO ది వైర్తో అన్నారు. “పోలీసులకు సమాచారం ఇవ్వడం వల్ల ప్రయోజనం లేదు. మేము కూడా కాల్లను విస్మరించలేము. ప్రభుత్వం మాకు ప్రత్యేక ఫోన్ నంబర్లు ఇచ్చి ఉంటే, మేము మహిళలు సురక్షితంగా ఉండేవాళ్ళం.”
SIR ప్రక్రియను సంస్కరించాలి
ఈ ప్రక్రియ ప్రారంభమైనప్పటి నుండి చాలా మంది కూడా ప్రాణాలు కోల్పోయారు. అటువంటి పరిస్థితులలో, తక్షణ దిద్దుబాటు చర్య తీసుకోవాలని మమత అన్నారు. ఓటరు జాబితాను నవీకరించడానికి ఎన్నికల కమిషన్ సమగ్ర సవరణ ప్రక్రియను నిర్వహిస్తోంది. ఇందులో భాగంగా ఓటరు జాబితాను సవరిస్తున్నారు. ఓటర్లలో విదేశీ అక్రమ వలసదారులు ఉన్నారేమోనని దర్యాప్తు చేస్తున్నారు. కాగా, ముఖ్యమంత్రి లేఖకు లేదా ప్రతిపక్ష పార్టీలు లేవనెత్తిన అభ్యంతరాలకు ఎన్నికల కమిషన్ ఇంకా అధికారిక ప్రతిస్పందనను విడుదల చేయలేదు.
