న్యూఢిల్లీ: దేశ రాజధానిలో అంతర్జాతీయ సైబర్ మోసాల సిండికేట్ను పోలీసులు ఛేదించారు. ఈమేరకు రూ. 300 కోట్లకు పైగా విలువైన మోసాలతో సంబంధం ఉన్న ఒక ప్రధాన అంతర్జాతీయ సైబర్ మోసాల సూత్రధారి పాటు మరో 10 మందిని అరెస్టు చేసారు.
దర్యాప్తులో భాగంగా, పోలీసులు పలు రాష్ట్రాల్లో విస్తరించి ఉన్న ఒక నెట్వర్క్ను కనుగొన్నారు. దీనికి అంతర్జాతీయ సైబర్ మోసాల సిండికేట్లతో, ముఖ్యంగా కంబోడియాలోని వాటితో సంబంధాలు ఉన్నాయి.
“నేరాల ద్వారా వచ్చిన సొమ్మును మళ్లించడానికి ఉపయోగించిన 100కు పైగా బూటకపు కంపెనీలకు అనుసంధానించిన 260కి పైగా బ్యాంకు ఖాతాలను మేము ఇప్పటివరకు గుర్తించాము. ఈ సిండికేట్కు సంబంధించి మొత్తం 2,567 ఫిర్యాదులు అందాయని” పోలీసులు తెలిపారు.
ప్రధాన నిందితుడు కరణ్ కజారియాపై లుక్ అవుట్ సర్క్యులర్ జారీ అయిన తర్వాత, ఏప్రిల్ 3న కోల్కతా విమానాశ్రయంలో అతడిని అదుపులోకి తీసుకున్నారు. తదుపరి విచారణ కోసం మరుసటి రోజే అతడిని ఢిల్లీకి తీసుకువచ్చినట్లు డిప్యూటీ కమిషనర్ ఆఫ్ పోలీస్ (క్రైమ్ బ్రాంచ్) ఆదిత్య గౌతమ్ తెలిపారు.
ఒక పెట్టుబడి పథకంలోకి ఆకర్షించి తనను రూ. 31.45 లక్షలు మోసం చేశారని ఆరోపిస్తూ నగరవాసి సుల్తాన్ చేసిన ఫిర్యాదుతో ఈ కేసు వెలుగులోకి వచ్చింది.
అధిక రాబడులు ఇస్తామని హామీలు ఇచ్చి, బాధితుడిని ఒక నకిలీ ట్రేడింగ్ అప్లికేషన్ను డౌన్లోడ్ చేసుకొని డబ్బు పెట్టుబడి పెట్టేలా ఒప్పించారని పోలీసులు తెలిపారు. అయితే, అతను లాభాలను ఉపసంహరించుకోవడానికి ప్రయత్నించినప్పుడు, ఆ అప్లికేషన్ పనిచేయడం ఆగిపోయింది. ఆ గ్రూపు అందుబాటులోకి రాకుండా పోయింది.
ఈమేరకు “ఈశాన్య ప్రాంతంలోని సైబర్ పోలీస్ స్టేషన్లో ఒక ఎఫ్ఐఆర్ నమోదు చేసి, సమగ్ర దర్యాప్తు కోసం తరువాత క్రైమ్ బ్రాంచ్కు బదిలీ చేసారని అధికారి తెలిపారు.
ఈ సైబర్ సిండికేట్ బాధితులను ఆకర్షించడానికి నకిలీ పెట్టుబడి వేదికలను, మెసేజింగ్ గ్రూపులను సృష్టించింది. వారు మధ్యవర్తుల ద్వారా ఏర్పాటు చేసిన నకిలీ బ్యాంకు ఖాతాలను ఉపయోగించారు. ఓటీపీలతో సహా సున్నితమైన బ్యాంకింగ్ వివరాలను సంగ్రహించడానికి హానికరమైన అప్లికేషన్లను ప్రయోగించారు. బాధితుల నుండి సేకరించిన నిధులను, ఆనవాళ్లను దాచిపెట్టడానికి బ్యాంకు ఖాతాలు,షెల్ కంపెనీల సంక్లిష్టమైన వెబ్ ద్వారా మళ్లించారని పోలీసులు తెలిపారు.
“ప్రధాన సమన్వయకర్తగా భావిస్తున్న కజారియా, విదేశాలకు చెందిన ఆపరేటర్లతో ప్రత్యక్ష సంబంధాలు కొనసాగిస్తూ, క్రిప్టోకరెన్సీ మార్గాల ద్వారా నిధుల తరలింపును సులభతరం చేశాడని” డీసీపీ తెలిపారు.
అతను భారతీయ ఆపరేటివ్లకు, అంతర్జాతీయ సైబర్ నేరగాళ్లకు మధ్య వారధిగా వ్యవహరించాడు. అతను మ్యూల్ బ్యాంక్ ఖాతాలను సంపాదించడంలోనూ, ఎన్క్రిప్టెడ్ సోషల్ మీడియా ప్లాట్ఫారమ్ల ద్వారా సున్నితమైన బ్యాంకింగ్ వివరాలను పంచుకోవడంలోనూ పాలుపంచుకున్నాడని డీసీపీ తెలిపారు.
విదేశీ మోసాల నెట్వర్క్లతో సంబంధాలను ఏర్పరచుకోవడానికి, బలోపేతం చేసుకోవడానికి కజారియా తరచుగా విదేశాలకు వెళ్లేవాడని, భారతదేశానికి వెలుపల ఉంటూ అరెస్టు నుంచి తప్పించుకోవడానికి ప్రయత్నించాడని పోలీసులు తెలిపారు.
సాంకేతిక నిఘా సహాయంతో దర్యాప్తు అధికారులు ఈ నెట్వర్క్ను కోల్కతా వరకు గుర్తించారు. అక్కడ అనేక బ్యాంక్ ఖాతాలు, షెల్ ఎంటిటీలు పనిచేస్తున్నట్లు కనుగొన్నారు. భారతదేశానికి వచ్చిన వెంటనే, కజారియాను విమానాశ్రయంలో అడ్డగించి అదుపులోకి తీసుకున్నారు.
విచారణలో, అతను ఈ సిండికేట్లో తన ప్రమేయాన్ని అంగీకరించినట్లు పోలీసులు తెలిపారు. అతని నెట్వర్క్కు సంబంధించిన ఖాతాలపై నేషనల్ సైబర్క్రైమ్ రిపోర్టింగ్ పోర్టల్లో 2,500కు పైగా ఫిర్యాదులు నమోదయ్యాయని, రూ. 300 కోట్ల మోసం జరిగిందని డీసీపీ తెలిపారు.
ఈ సిండికేట్ గత నాలుగైదేళ్లుగా చురుకుగా ఉంటూ, పలు రాష్ట్రాల్లో భారీ స్థాయిలో కార్యకలాపాలు నిర్వహిస్తోందని దర్యాప్తులో వెల్లడైంది.
ఈ దాడుల్లో పోలీసులు 48 మొబైల్ ఫోన్లు, 258 సిమ్ కార్డులు, పలు ఏటీఎం కార్డులు, చెక్ బుక్కులు, నాలుగు ల్యాప్టాప్లు, పలు బ్యాంకింగ్, కేవైసీ పత్రాలను స్వాధీనం చేసుకున్నారు. రూ. 19 లక్షల నిధులను కూడా స్తంభింపజేశారు.
