హైదరాబాద్: తెలంగాణలోని హైదరాబాద్, ఇతర జిల్లాల్లో ‘ప్రత్యేక సమగ్ర సవరణ’ (SIR) ప్రక్రియకు సంబంధించిన ముందస్తు దశ జూన్ 12న ముగిసింది. ఈమేరకు ‘డెక్కన్ క్రానికల్’లో ప్రచురితమైన నివేదిక ప్రకారం… హైదరాబాద్‌లోని 43.3 శాతం మంది ఓటర్ల వివరాలు 2002 నాటి SIR జాబితాతో అనుసంధానించారు.

హైదరాబాద్‌లో SIR మ్యాపింగ్ లోపాలు
ఆ నివేదిక ప్రకారం, మ్యాపింగ్‌లో ఉన్న లోపాల కారణంగా దాదాపు 40 శాతం మంది ఓటర్లకు నోటీసులు అందే అవకాశం ఉంది.

పరిశీలనలో ఉన్న కొన్ని లోపాలు…:

పేర్లలో వ్యత్యాసం (Name mismatch)
తల్లిదండ్రులతో వయస్సు వ్యత్యాసం 15 ఏళ్ల కంటే తక్కువ లేదా 50 ఏళ్ల కంటే ఎక్కువగా ఉండటం
తాతామామలు (తల్లి లేదా తండ్రి వైపు), ఓటరు మధ్య వయస్సు వ్యత్యాసం 40 ఏళ్ల కంటే తక్కువగా ఉండటం
2002 SIR జాబితాలోని ఒకే ఓటరు వివరాలతో ఆరుగురు లేదా అంతకంటే ఎక్కువ మంది ఓటర్లను అనుసంధానించడం

2002 SIR జాబితాలోని ఓటరుతో మ్యాపింగ్‌ చేసిన తోబుట్టువుల మధ్య వయస్సు వ్యత్యాసం తొమ్మిది నెలల కంటే తక్కువగా ఉండటం

లోపాలు ఉన్నప్పుడు అవసరమైన పత్రాలు
SIR ప్రక్రియ కొనసాగుతున్న ఒడిశా రాష్ట్రం, లోపాలను పరిష్కరించడానికి “పంచనామా” విధానాన్ని అనుసరించింది. ఈ ప్రక్రియలో, వివాదాస్పద వివరాలను ధృవీకరించడానికి స్థానికుల సంతకాలను వినియోగిస్తారు.

ఉత్తరప్రదేశ్, ఇతర రాష్ట్రాలు తమ రెండో దశ SIR సమయంలో పత్రాల ఆధారిత విధానాన్ని (documentation route) అనుసరించాయి. అక్కడ ఓటర్లు, 2002 SIR రికార్డులలో నమోదైన వ్యక్తితో తమకున్న సంబంధాన్ని ఏదైనా పత్రం ద్వారా నిరూపించుకోవాలని కోరారు; ఇందుకోసం భారత ఎన్నికల సంఘం నిర్దేశించిన పత్రాలే ఉండాలనే నిబంధన ఏమీ లేదు.

పత్రాల ఆధారిత విధానంలో, తల్లిదండ్రులతో అనుసంధానించిన ఓటర్లు తమ పేరు, తమ తండ్రి లేదా తల్లి పేరు రెండూ ఉన్న ఏదైనా పత్రాన్ని సమర్పించాల్సి ఉంటుంది. తల్లి వైపు తాతామామలతో మ్యాపింగ్‌ అయిన వారు, తమ పేరు, తల్లి పేరు ఉన్న పత్రాన్ని, అలాగే తమ తల్లికి ఆమె తల్లిదండ్రులతో ఉన్న సంబంధాన్ని తెలిపే పత్రాన్ని సమర్పించాల్సి ఉంటుంది.

అదేవిధంగా, తండ్రి వైపు తాతామామలతో అనుసంధానమైన ఓటర్లు, తమకు తమ తండ్రితో ఉన్న సంబంధాన్ని తెలిపే పత్రాన్ని, అలాగే తమ తండ్రికి వారి తల్లిదండ్రులతో ఉన్న సంబంధాన్ని తెలిపే పత్రాన్ని సమర్పించాల్సి ఉంటుంది. తెలంగాణ విషయంలో, SIR లోపాలను పరిష్కరించడానికి అనుసరించే ఖచ్చితమైన ప్రక్రియను ఇంకా అధికారికంగా ప్రకటించలేదు.

అయితే, ఇటీవల అధికారుల బృందం ఒడిశాలో పర్యటించి, ఏప్రిల్ 20న సీఈఓ అధ్యక్షతన జరిగిన రాష్ట్రవ్యాప్త వీడియో కాన్ఫరెన్స్‌లో వారు పొందిన అనుభవాలను పంచుకున్నందున, పంచనామా మార్గాన్నే అనుసరించే అవకాశం ఉందని భావిస్తున్నారు.

మ్యాపింగ్ శాతం
డీసీ నివేదిక ప్రకారం, మెడ్చల్-మల్కాజ్‌గిరిలో 43.3 శాతం మ్యాపింగ్ నమోదైంది.

తెలంగాణ వ్యాప్తంగా 70 శాతం మ్యాపింగ్ పూర్తయింది. అయినప్పటికీ, దాదాపు 90 లక్షల మంది ఓటర్లు ‘లోపాలున్న ఓటర్లు’ కేటగిరీలో ఉన్నారు.

పత్రాల ధృవీకరణ ద్వారా లోపాలున్న కేసులను పరిష్కరించినప్పటికీ, మ్యాపింగ్ కాని వారు ఈసీఐ జాబితాలో ఉన్న పత్రాలలో ఒకదానిని సమర్పించాల్సి ఉంటుంది.