షమ్సుల్ ఇస్లాం, ప్రముఖ విద్యావేత్త…🖋️

రాజ్యాంగానికి వెలుపల పనిచేస్తున్న రాష్ట్రీయ స్వయంసేవక్ సంఘ్ (ఆర్‌ఎస్‌ఎస్)ను, ధనవంతులు, పలుకుబడి ఉన్న ‘ముస్లిం మేధావులలో’ ఒక వర్గం ఎందుకు సమర్థించడానికి ప్రయత్నిస్తోంది? ఆశ్చర్యకరంగా, తాము ‘భారతీయ ముస్లింల’ తరపున అలా చేస్తున్నామని వారు చెప్పుకుంటున్నారు. ఇంకా విచిత్రమైన విషయం ఏమిటంటే, బీజేపీ-ఆర్‌ఎస్‌ఎస్ పాలనలోని ‘అమృత్ కాలం’లో, భారతదేశంలోని చాలా ప్రాంతాలు నిరుద్యోగం, ద్రవ్యోల్బణం, అవినీతి, పరీక్ష పత్రాల లీకేజీల వంటి సమస్యలతో పాటు దళితులు, ఆదివాసులు, ముస్లింలు, మహిళలు మరియు కార్మిక వర్గంపై అపూర్వమైన హింసతో సతమతమవుతున్న సమయంలో ఇది జరుగుతోంది.

‘సమకాలీన భారతదేశపు మీర్ తఖీ మీర్’ అనే శీర్షికతో మహమ్మద్ వజీహుద్దీన్ అందించిన ఒక నివేదిక ప్రకారం…జూన్ 3వ తేదీన న్యూఢిల్లీలోని ఇందిరా గాంధీ నేషనల్ సెంటర్ ఫర్ ఆర్ట్స్‌లో కొత్తగా ప్రారంభించిన ‘సిటిజన్స్ ఫర్ ఫ్రాటర్నిటీ (CFF)-భారత్’ అనే కొత్త కార్యక్రమపు ప్రారంభ సమావేశానికి పలువురు మాజీ అధికారులు, పండితులు, కార్యకర్తలు హాజరయ్యారు. ఇది ఒక రాజకీయేతర వేదిక అని, సంభాషణల ద్వారా శాంతి, సామరస్యం, సౌభ్రాతృత్వాన్ని పెంపొందించడమే దీని ఏకైక ఉద్దేశ్యమని ఈ కార్యక్రమ నిర్వాహకుడు జావేద్ ఎం. అన్సారీ వివరించారు.

ఈ కార్యక్రమానికి చోదక శక్తి అయిన, రిటైర్డ్ ఐఏఎస్ అధికారి, జామియా మిలియా ఇస్లామియా మాజీ వీసీ, ఢిల్లీ మాజీ లెఫ్టినెంట్ గవర్నర్ నజీబ్ జంగ్ మాటలను ఆ నివేదిక ఉటంకించింది. “సమాజంలోనే వ్యతిరేకత ఉన్నప్పటికీ, మేము ముందుకు వెళ్తున్నాము. మాలో ఎవ్వరికీ ఏ రాజకీయ పార్టీలో చేరి ఎన్నికలలో పోటీ చేయాలనే ఉద్దేశం లేదు. రెండు వర్గాల వారు ఒకరినొకరు అనుమానంతో చూసుకుంటున్న తీరు మాకు బాధ కలిగిస్తోంది”. అన్ని రాష్ట్ర రాజధానులలో, ఆ తర్వాత దేశవ్యాప్తంగా జిల్లాలలో సీఎఫ్ఎఫ్ (CFF) యూనిట్లను ప్రారంభిస్తామని మాజీ ప్రధాన ఎన్నికల కమిషనర్ ఎస్.వై. ఖురైషీ సభికులకు తెలియజేశారు.

ఈ సందర్భంగా నజీబ్‌జంగ్, ఖురైషీ ఇద్దరూ 2022లో ఆర్‌ఎస్‌ఎస్ అధిపతి మోహన్ భగవత్‌తో తాము జరిపిన సమావేశాన్ని ప్రస్తావించారు. “భగవత్ జీని కలిసినందుకు మా సమాజ సభ్యుల నుంచి మాపై దాడి జరిగింది. కానీ చర్చల ద్వారా మాత్రమే పరిష్కారం దొరుకుతుందని మేము నమ్ముతాము… హిందూ రాష్ట్రంలో ముస్లింలను ఎలా చూస్తారని మేము భగవత్ జీని అడిగాము. ముస్లింలు లేకుండా భారతదేశాన్ని ఊహించలేమని ఆయన అన్నారు,” అని ఖురైషీ గుర్తుచేసుకున్నారు.

ఆతిథ్యమిచ్చిన వారికి, అతిథులకు మాత్రమే తెలిసిన కారణాల వల్ల ఈ సమావేశాన్ని రహస్యంగా ఉంచారు. 30 నిమిషాలకు షెడ్యూల్ చేయబడిన ఈ సమావేశం వాస్తవానికి 75 నిమిషాల పాటు స్నేహపూర్వక వాతావరణంలో జరిగిందని ఆ తర్వాత వెల్లడైంది. “పదేపదే అమాయకులపై జరుగుతున్న మూకదాడులు, హిందుత్వ ఛాందసులు జాతి నిర్మూలనకు పిలుపునివ్వడం, దాదాపు ప్రతి రంగంలోనూ ముస్లిం సమాజాన్ని అణచివేయడం వంటి సంఘటనల నేపథ్యంలో ఆ సమాజంలో నెలకొన్న అభద్రతాభావమే” తమను ఆర్‌ఎస్‌ఎస్ అధిపతిని కలిసేలా ప్రేరేపించిందని ఖురైషీ తర్వాత వివరించారు.

నిజంగా ఇవే వారి ఆందోళనలైతే, ఆ ప్రతినిధి బృందం ప్రధానమంత్రిని లేదా హోంమంత్రిని కలిసి దిద్దుబాటు చర్యలు చేపట్టాలని డిమాండ్ చేయాల్సింది కాదా? వచ్చిన స్పందన వారికి సంతృప్తికరంగా లేకపోతే, వారు భారత రాష్ట్రపతిని, న్యాయవ్యవస్థను ఆశ్రయించి ఉండవచ్చు.

అయితే, వారు ఎలాంటి రాజ్యాంగ పదవి గానీ, బాధ్యత గానీ లేని ఆర్‌ఎస్‌ఎస్ అగ్ర నాయకత్వాన్ని కలవాలని ఎంచుకున్నారు. బీజేపీ తమ రాజకీయ విభాగమనే వాస్తవాన్ని ఆర్‌ఎస్‌ఎస్ దాచడం లేదని వారు వాదించవచ్చు; అలాగే ప్రధానమంత్రి నుండి కేంద్ర కేబినెట్ మంత్రుల వరకు, గవర్నర్లు, ముఖ్యమంత్రులు తాము ఆర్‌ఎస్‌ఎస్ సభ్యులమనే విషయాన్ని దాచడం లేదని కూడా ఆ ప్రతినిధి బృందం ఎత్తి చూపవచ్చు.

ఆ సమావేశం ముస్లింలకు ఒక నిరాశాజనకమైన సందేశాన్ని పంపడంలో సఫలమైంది. హింసకు గురవుతున్నప్పుడు, ప్రజాస్వామ్య-లౌకిక భారత రాజకీయ వ్యవస్థపై ఆధారపడకుండా, హింసించేవారి వద్దకే వెళ్లి వారి ప్రాణాల కోసం, స్వేచ్ఛ కోసం భిక్షమెత్తమని వేడుకోమని ఆ సందేశం. బహుశా వారు, పాకిస్తాన్‌లో హింసకు గురవుతున్న మైనారిటీ వర్గాలైన హిందువులు, క్రైస్తవులు, షియాలు, అహ్మదీయులకు కూడా, రక్తదాహం గల ఇస్లామిస్ట్ ముఠాలతో ఇలాంటి ‘శాంతి ఒప్పందాలు’ చేసుకోవాలని సలహా ఇచ్చి ఉండవచ్చు.

మరోవంక ఆర్‌ఎస్‌ఎస్ రాజ్యాంగేతర స్వభావం అప్పుడు ఈ ముస్లిం మేధావులను కలవరపెట్టలేదు; జూన్ 3న, ఆర్‌ఎస్‌ఎస్ ఆశీస్సులతో ప్రారంభించబోతున్న కొత్త వేదిక ‘పూర్తిగా రాజకీయేతర వేదిక’ అవుతుందని మధ్యవర్తి అన్సారీ అమాయకంగా ప్రకటించినప్పుడు కూడా ఆ విషయం వారి మనసులో మెదిలినట్లు లేదు.

“మత సామరస్యం, మతాల మధ్య ఉద్రిక్తతలను తగ్గించడంపై చర్చించేందుకు 2022 ఆగస్టు 22న న్యూఢిల్లీలో జంగ్, ఖురైషీ, నై దునియా సంపాదకుడు షాహిద్ సిద్ధిఖీ, రిటైర్డ్ లెఫ్టినెంట్ జనరల్ జమీర్ ఉద్దీన్ షా, వ్యాపారవేత్త సయీద్ షేర్వానీలతో సహా ఐదుగురు ప్రముఖ ముస్లింలు భగవత్‌ను కలిసినప్పుడు, సమాజంలోని ఒక వర్గం వారిపై తీవ్ర విమర్శలు చేసింది… మేము ఆర్‌ఎస్‌ఎస్ అధిపతితో ఒప్పందం చేసుకున్నామని వారు ఆరోపించారు. విమర్శలను లెక్కచేయకుండా, మేము చర్చలనే విశ్వసిస్తూనే ఉన్నాము” అని ఆ కార్యక్రమంలో మహ్మద్ వజీహుద్దీన్ గుర్తుచేసుకున్నారు.

ఈ కార్యక్రమంలో సీనియర్ ఆర్‌ఎస్‌ఎస్ (RSS) నాయకుడు రామ్ లాల్ కూడా ప్రసంగించారు; పరస్పర సంబంధాలను మెరుగుపరచుకోవడం, అపార్థాలను తొలగించుకోవడం, వివిధ వర్గాల నాయకుల మధ్య అనుబంధాలను పెంపొందించుకోవడం అవసరమని ఆయన పిలుపునిచ్చారు. మొహమ్మద్ వజీహుద్దీన్ ఒక సందర్భాన్ని గుర్తుచేశారు: ఉర్దూ కవి మీర్ తఖీ మీర్ (1723-1810), అతని సవతి సోదరుడిని, వారి తండ్రి తన మరణశయ్యపై ఉన్నప్పుడు పిలిపించారు. అప్పుడు ఆయన తన వద్ద మిగిలి ఉన్న రెండు విషయాలను—అంటే తనకున్న అప్పులు, 300 పుస్తకాల సేకరణను—వారికి పంచాలనుకున్నారు.

“భారతీయ ముస్లింలు నేడు ఇలాంటి పరిస్థితిలోనే ఉన్నారు; గతకాలపు అప్పులు తీర్చమని వారిని అడుగుతున్నారు. దేశ విభజనకు, దేవాలయాల విధ్వంసానికి, అల్లర్లు ప్రారంభించడానికి వారిని నిందిస్తున్నారు… లాల్ నా మాటలను ఓపికగా విని, పరిస్థితి మెరుగుపడుతుందని బదులిచ్చారు,” అని ఆయన ఇంకా ఇలా అన్నారు.

నన్ను కలవరపరిచే మరో విషయం ఏమిటంటే, ఈ ‘ముస్లిం మేధావులు’ ఆర్‌ఎస్‌ఎస్ భారతదేశంలోని హిందువులందరికీ ప్రాతినిధ్యం వహిస్తుందనే నిర్ధారణకు ఎలా వచ్చారు. ఆర్‌ఎస్‌ఎస్‌కు మద్దతు ఇవ్వకుండా, భారతదేశ ప్రజాస్వామ్య-లౌకిక రాజకీయ వ్యవస్థకు విశ్వాసపాత్రంగా ఉన్న భారతదేశంలోని హిందువులపై వారు విశ్వాసం కోల్పోయారా? ఇటీవల ముగిసిన పశ్చిమ బెంగాల్ అసెంబ్లీ ఎన్నికలలో, లక్షలాది మంది ఓటర్ల ఓటు హక్కును కోల్పోయినప్పటికీ, మతపరమైన పోలరైజేషన్‌ ఉన్నప్పటికీ, బీజేపీ-ఆర్‌ఎస్‌ఎస్ కలిసి పోలైన ఓట్లలో కేవలం 46.4 శాతం మాత్రమే సాధించగలిగాయన్న విషయం వారికి తట్టలేదా? మరి ఈ ‘ముస్లిం మేధావుల’ గుంపు ఎవరి అధికారంతో భారతీయ ముస్లింలకు ప్రాతినిధ్యం వహిస్తున్నట్లు నటిస్తోంది?

భారతదేశంలో త్వరలో హిందువుల కంటే ముస్లింల సంఖ్య ఎక్కువగా ఉంటుందనే భూతాన్ని వ్యాప్తి చేయడానికి ఆర్‌ఎస్‌ఎస్, దాని అనుబంధ సంస్థలే కారణమయ్యాయి. ఆర్‌ఎస్‌ఎస్ వాదన ప్రకారం 1000 సంవత్సరాల ‘అణచివేత’ ముస్లిం పాలన ఉన్నప్పటికీ, 1871-72లో భారతదేశంలో జరిగిన మొదటి జనాభా లెక్కల ప్రకారం ‘145 మిలియన్ల హిందువులు, సిక్కులు, అంటే జనాభాలో 73.5 శాతం. దాదాపు 41 మిలియన్ల ముస్లింలు, అంటే 21.5 శాతం’ ఉన్నారని ఆ ‘ముస్లిం మేధావులు’ ఎత్తి చూపాల్సింది.

ప్రస్తుతం, జనాభాలో ముస్లింలు కేవలం 14 శాతం మాత్రమే ఉన్నారు. గత దశాబ్ద కాలంలో అమెరికా, ఆస్ట్రేలియా, కెనడా, న్యూజిలాండ్, యూకేలలో హిందువుల జనాభా దాదాపు 100 శాతం పెరిగిందనే విషయాన్ని కూడా వారు ఆర్‌ఎస్‌ఎస్ నాయకులకు చెప్పి ఉండాల్సింది. ఈ దేశాల్లోని క్రైస్తవులకు ఇది ఆందోళన కలిగించే విషయమా లేదా కలవరపెట్టే విషయమా?

భారతదేశ వాస్తవ పాలకులతో ప్రత్యక్ష సంబంధం కోసం ఆరాటపడే ఈ ‘ముస్లిం మేధావులు’ గోవధ విషయంలో కూడా సూటిగా మాట్లాడి ఉండాల్సింది. 1900 ఫిబ్రవరి 2న స్వామి వివేకానంద చెప్పిన ఈ మాటను వారు గుర్తుచేసుకుని ఉండాల్సింది: “పాత సంప్రదాయాల ప్రకారం, గోమాంసం తిననివాడు మంచి హిందువు కాడని నేను చెబితే మీరు ఆశ్చర్యపోతారు.”

గోవధను ముస్లింలు చేసే నేరంగా చిత్రీకరించడం ఆర్‌ఎస్‌ఎస్ చేస్తున్న ప్రచారం. అధిక సంఖ్యలో దళితులు, క్రైస్తవులు కూడా గోమాంసం తింటారు. అయినప్పటికీ, గోవా, అన్ని ఈశాన్య రాష్ట్రాలు, అంతకుముందు కర్ణాటకలోని ఆర్‌ఎస్‌ఎస్-బీజేపీ ప్రభుత్వాలు గోవధకు అనుమతి ఇచ్చాయి.
అంతేకాదు ముస్లిం, ముస్లిమేతర కార్యకర్తలను నిరంతరం నిర్బంధంలో ఉంచడానికి ప్రభుత్వం ఉగ్రవాద చట్టాలను విస్తృతంగా దుర్వినియోగం చేస్తున్న విషయాన్ని వారు లేవనెత్తినట్లు కనిపించడం లేదు.

మొత్తంగా భారతదేశానికి ఆర్‌ఎస్‌ఎస్‌ వంటి రాజ్యాంగేతర సంస్థ ముందు లొంగిపోయే మేధావులు కాదు. ప్రజాస్వామ్యం, స్వేచ్ఛ, ప్రజల రక్షణ కోసం నిలబడే మేధావులు మనకు కావాలి.

(నేషనల్ హెరాల్డ్ సౌజన్యంతో)