హైదరాబాద్: తెలంగాణ ప్రభుత్వం వాట్సాప్లో పాఠశాల విద్యా సేవలను ప్రారంభించింది. ముఖ్యమైన సమాచారం, తాజా అప్డేట్లను అందించడం ద్వారా 18 లక్షల మందికి పైగా విద్యార్థులకు ఈ సేవలు ప్రయోజనం చేకూరుస్తాయని ప్రభుత్వం పేర్కొంది. ఈమేరకు నిన్న హైదరాబాద్లోని ఎల్బీ స్టేడియంలో జరిగిన కార్యక్రమంలో గవర్నర్ శివ్ ప్రతాప్ శుక్లా, ముఖ్యమంత్రి రేవంత్ రెడ్డి ఈ కార్యక్రమాన్ని అధికారికంగా ప్రారంభించారు.
గత ఏడాది కాలంగా, వాట్సాప్ ద్వారా అందుబాటులో ఉన్న విద్యా సేవల నుండి లక్షలాది మంది విద్యార్థులు ప్రయోజనం పొందారు. వీటిలో ప్రోగ్రెస్ రిపోర్ట్లు, హాల్ టికెట్ డౌన్లోడ్, మార్కుల మెమోలు, పరీక్ష ఫలితాలు, పాత ఎస్ఎస్సీ (SSC) మెమోలు, బోనఫైడ్ సర్టిఫికెట్లు, బదిలీ సర్టిఫికెట్లు (TC), ఎస్ఎస్సీ మెమో సవరణ అభ్యర్థనలు వంటి సేవలు ఉన్నాయి.
ఈ ప్రాజెక్ట్ తదుపరి దశలో విద్యార్థులు, తల్లిదండ్రుల నుండి అభిప్రాయాలను (ఫీడ్బ్యాక్) సేకరించే విధానం, యూనిఫాంలు, పాఠ్యపుస్తకాలు, నోట్బుక్ల పంపిణీ వివరాలు, హాజరు వివరాలు, ప్రీ-మెట్రిక్ స్కాలర్షిప్ దరఖాస్తులు, మధ్యాహ్న భోజన సమాచారం, ఆరోగ్యం, సంక్షేమ కార్యక్రమాలు, క్రీడలు, పాఠ్యేతర కార్యకలాపాలు, అలాగే రెసిడెన్షియల్ పాఠశాల సంక్షేమ కార్యక్రమాలకు సంబంధించిన అప్డేట్లను అందించడంపై దృష్టి సారిస్తామని ఒక ప్రకటనలో తెలిపారు.
భౌతికంగా కార్యాలయాలకు వెళ్లాల్సిన అవసరాన్ని, కాగితపు పనిని తగ్గించేందుకు, ఇన్ఫర్మేషన్ టెక్నాలజీ, ఎలక్ట్రానిక్స్ మరియు కమ్యూనికేషన్స్ (ITE&C) శాఖలోని ఎలక్ట్రానిక్ సర్వీస్ డెలివరీ (ESD) – మీసేవ విభాగం ఈ ప్లాట్ఫారమ్ను అభివృద్ధి చేసింది.
తల్లిదండ్రులు, విద్యార్థులకు ఆకర్షణీయమైన వీడియో సందేశాల ద్వారా ముఖ్యమైన సమాచారం, అప్డేట్లను అందించడానికి ‘పాలపిట్ట’ (Indian Roller) అనే స్నేహపూర్వక మస్కట్ను కూడా పరిచయం చేశారు. ఈ సేవలను పొందడానికి, 91 80969 58096 అనే ఫోన్ నంబర్ ద్వారా వాట్సాప్ సేవలను సంప్రదించవచ్చు.
