Recent News

Copyright © 2024 Blaze themes. All Right Reserved.

భయంతో గుజరాత్‌ను వీడిన బిల్కిస్ బానో కుటుంబం!

Share It:

న్యూఢిల్లీ: తన కేసులో ఇద్దరు దోషులకు బెయిల్ మంజూరు చేస్తూ, వారి యావజ్జీవ శిక్షను నిలిపివేస్తూ సుప్రీంకోర్టు తీసుకున్న నిర్ణయంతో తీవ్ర భయాందోళనకు గురైన బిల్కిస్ బానో, ఆమె కుటుంబ సభ్యులు ఈ నెల ప్రారంభంలో గుజరాత్ విడిచి వెళ్లిపోయారు. ఈ విషయాన్ని ఆమె బంధువు మంగళవారం వెల్లడించారు.

2002 గుజరాత్ అల్లర్ల సమయంలో బిల్కిస్ బానోపై సామూహిక అత్యాచారం, ఆమె కుటుంబంలోని ఏడుగురి హత్య కేసులో 2008లో ముంబై ప్రత్యేక సీబీఐ కోర్టు 11 మందిని దోషులుగా నిర్ధారించింది. వీరిలో బిపిన్ చంద్ర జోషి, ప్రదీప్ మోర్ధియా కూడా ఉన్నారు. 2022లో వీరికి లభించిన సామూహిక శిక్షా తగ్గింపును సుప్రీంకోర్టు జనవరి 2024లో రద్దు చేసింది. అయితే, వీరు 17 ఏళ్లకు పైగా జైలు శిక్ష అనుభవించిన కారణంగా, జస్టిస్ ఎంఎం సుందరేష్, జస్టిస్ పిబి వరలేలతో కూడిన ధర్మాసనం అక్టోబర్ 28న వీరిద్దరి యావజ్జీవ శిక్షను నిలిపివేస్తూ బెయిల్ మంజూరు చేసింది.

ఈ పరిణామంపై దాహోద్ జిల్లా దేవ్‌గఢ్ బరియా పట్టణంలో నివసిస్తున్న బానో మామ రజాక్ మన్సూరి మాట్లాడుతూ కుటుంబం ఎదుర్కొంటున్న భయాన్ని వివరించారు. సుప్రీంకోర్టు తీర్పు గురించి తమకు గానీ, తమ న్యాయవాదికి గానీ ఎవరూ సమాచారం ఇవ్వలేదని, సోషల్ మీడియా ద్వారానే విషయం తెలిసిందని ఆయన ఆవేదన వ్యక్తం చేశారు. భద్రతా కారణాల దృష్ట్యా బానో కుటుంబం గుజరాత్‌లోనే ఎప్పటికప్పుడు నివాసాలు మారుస్తూ ఉండేదని, కానీ ఈసారి తీర్పు వెలువడిన వెంటనే నవంబర్ 2-3 తేదీల్లో ఏకంగా రాష్ట్రాన్నే విడిచి వెళ్లిపోయారని తెలిపారు. గోధ్రా, దాహోద్ సబ్-జైళ్లలో ఉన్న దోషులు తరచుగా 15 రోజులు లేదా నెల రోజుల పెరోల్‌పై తమ స్వగ్రామమైన రణధిక్‌పూర్‌కు వస్తుంటారని, ప్రస్తుతం కూడా ఒక దోషి నెల రోజుల పెరోల్‌పై బయటే ఉన్నాడని మన్సూరి చెప్పారు. బెయిల్ పొందిన దోషులు ఏదైనా చేయగలరన్న ప్రాణభయంతోనే బానో ఈ నిర్ణయం తీసుకున్నారని ఆయన పేర్కొన్నారు.

మరోవైపు, తన వాదన వినకుండానే సుప్రీంకోర్టు రెండోసారి కూడా ఉత్తర్వులు జారీ చేయడంపై బిల్కిస్ బానో మీడియాకు విడుదల చేసిన ప్రకటనలో తీవ్ర దిగ్భ్రాంతి, అవిశ్వాసం వ్యక్తం చేశారు. “బాధ, అవిశ్వాసంతో నిండిన కన్నీళ్ల మధ్య నేను ఈ మాటలు చెబుతున్నాను. నన్ను పిలవకుండా, నా వాదన వినకుండానే సుప్రీంకోర్టు ఇలాంటి ఉత్తర్వు ఇచ్చిందని నేను ఇప్పటికీ నమ్మలేకపోతున్నాను. 19 ఏళ్ల వయసులో నా ప్రపంచం, నా పసిబిడ్డ, నా కుటుంబం నా నుండి క్రూరంగా లాగేయబడ్డాయి. 24 ఏళ్ల సుదీర్ఘ పోరాటం తర్వాత, కుటుంబం, స్నేహితుల ప్రేమతో నా జీవితాన్ని తిరిగి నిర్మించుకున్నాను. ఇప్పుడిప్పుడే నవ్వడం నేర్చుకున్నాను. కానీ, ఎంతో కష్టపడి గెలుచుకున్న న్యాయాన్ని నేడు మళ్లీ కోల్పోతున్నాను. పాత భయాలు మళ్లీ నన్ను, నా పిల్లలను వెంటాడుతున్నాయి” అని ఆమె ఆవేదన చెందారు.

తన పిల్లలు జీవితాంతం ఈ భయం, గాయాలతో బతకడానికి వీల్లేదని, ఈ ఉత్తర్వుపై తాను న్యాయపోరాటం చేస్తానని బానో స్పష్టం చేశారు. తన మూడేళ్ల పసిబిడ్డ సలేహా జ్ఞాపకార్థం, ప్రపంచవ్యాప్తంగా ఉన్న మహిళల ఆత్మగౌరవం కోసం తన పోరాటం కొనసాగుతుందని, ఏ మహిళా జీవితాంతం న్యాయం కోసం ఇలాంటి అగ్నిపరీక్షను ఎదుర్కోకూడదని ఆమె ప్రతిజ్ఞ చేశారు

Tags :

Grid News

Latest Post

వర్తమానం ఒక ప్రముఖ తెలుగు వెబ్ పత్రిక. డిజిటల్ రంగంలో నిజాయితీ, పారదర్శకత, విశ్వసనీయతతో కూడిన వార్తలను ప్రజలకు అందించడమే లక్ష్యంగా ఏర్పాటైంది.

Latest News

Most Popular

Copyright © 2024 Vartamanam. All Right Reserved.